Shatapatha Brahmana · Chapter 6.6.4

atha viṣṇukramānkrāntvā / vātsapreṇopasthāyāstamita āditye bhasmaiva prathamamudvapatyetadvā enametenānnena prīṇātyetābhiḥ samidbhistasyānnasya jagdhasyaiṣa pāpmā sīdati bhasma tenainametadvyāvartayati tasminnapahatapāpmanvācaṃ visṛjate vācaṃ visṛjya samidhamādadhāti rātryā evainametadannena prīṇāti rātrīṃrātrīmaprayāvaṃ bharanta iti tasyokto bandhū rātryā evaitāmariṣṭiṃ svastimāśāste tadyatkiṃ cātī rātryopasamādadhātyāhutikṛtaṃ haivāsmai tadupasamādadhāti -

atha prātarudita āditye / bhasmaiva prathamamudvapatyetadvā enametenānnena prīṇātyetayā samidhā yacca rātryopasamādadhāti tasyānnasya jagdhasyaiṣa pāpmā sīdati bhasma tenainametadvyāvartayati tasminnapahatapāpmanvācaṃ visṛjate vācaṃ visṛjya samidhamādadhātyahna evainametadannena prīṇātyaharaharaprayāvambharanta iti tasyokto bandhurahna evaitāmariṣṭiṃ svastimāśāste tadyatkiṃ cāto'hnopasamādadhātyāhutikṛtaṃ haivāsmai tadupasamādadhāti -

ahorātre vā 'abhivartamāne saṃvatsaramāpnutaḥ saṃvatsara' idaṃ sarvamāhnāyaivaitāmariṣṭiṃ svastimāśāste -

atha yadāsmai vrataṃ prayacchanti / atha vrate nyajya samidhamādadhāti na vrate nyañjyādityu haika āhurāhutiṃ tajjuhuyādanavakḷptaṃ vai tadyaddīkṣita āhutiṃ juhuyāditi -

sa vai nyañjyādeva / devo vā asyaiṣa ātmā mānuṣo'yaṃ sa yanna nyañjyānna haitaṃ daivamātmānaṃ prīṇīyādatha yannyanakti tatho haitaṃ daivamātmānaṃ prīṇāti sā yatsamittena nāhutiryadu vrate nyaktā tenānnamannaṃ hi vratam -

sa vai samidhamādhāyātha vratayati / daivo vā asyaiṣa ātmā mānuṣo'yaṃ devā u vāagre'tha manuṣyāstasmātsamidhamādhāyātha vratayati -

annapate'nnasya no dehīti / aśanapate'śanasya no dehītyetadanamīvasya śuṣmiṇa ityanaśanāyasya śuṣmiṇa ityetatprapra dātāraṃ tāriṣa iti yajamāno vai dātā pra yajamānaṃ tāriṣa ityetadūrjaṃ no dhehi dvipade catuṣpada ityāśiṣamāśāste yadu bhinnāyai prāyaścittimāhottarasmiṃstadanvākhyāna iti -

yadyeṣokhā bhidyeta / yā'bhinnā navā sthālyurubilo syāttasyāmenaṃ paryāvapedārcchati vā eṣokhā yā bhidyate'nārto vā iyaṃ devatānārtāyāmimamanārtaṃ bibharāṇīti tatrokhāyai kapālaṃ purastātprāsyati tatho haiṣa etasyai yonerna cyavate -

atha mṛdamāhṛtya / ukhāṃ copaśayāṃ ca piṣṭvā saṃsṛjyokhāṃ karotyetayaivāvṛtā'nupaharanyajustūṣṇīmeva paktvā paryāvapati karmaṇireva tatra prāyaścittiḥ punastatkapālamukhāyāmupasamasyokhāṃ copaśayāṃ ca piṣṭvā saṃsṛjya nidadhāti prāyaścittibhyaḥ -

atha yadyeṣa ukhyo'gniranugacchet / gārhapatyaṃ vāva sa gacchati gārhapatyāddhi sa āhṛto bhavati gārhapatyādevainaṃ prāñcamuddhṛtyopasamādhāyokhāṃ pravṛñjyādetayaivāvṛtānupaharanyajustūṣṇīmeva tāṃ yadā'gnirārohati -

atha prāyaścittī karoti / sarvebhyo vā eṣa etaṃ kāmebhyo ādhatte tadyadevāsyātra kāmānāṃ vyavacchidyate'gnāvanugate tadevaitatsaṃtanoti saṃdadhātyubhe prāyaścittī karotyadhvaraprāyaścittiṃ cāgniprāyaścittiṃ cādhvarasya pūrvāmathāgnestasyokto bandhuḥ -

sa samidhā''jyasyopahatya / āsīna āhutiṃ juhoti viśvakarmaṇe svāhetyathopotthāya samidhamādadhāti punastvā'''dityā rudrā vasavaḥ samindhatāṃ punarbrahmāṇo vasunītha yajñairityetāstvā devatāḥ punaḥ samindhatāmityetadghṛtena tvaṃ tanvaṃ vardhayasva satyāḥ santu yajamānasya kāmā iti ghṛtenāha tvaṃ tanvaṃ varddhayasva yebhya' u tvāṃ kāmebhyo yajamāna ādhatta te'sya sarve satyāḥ santvityetat -

atha yadi gārhapatyo'nugacchet / araṇī vāva sa gacchatyaraṇibhyāṃ hi sa āhṛto bhavatyaraṇibhyāmevainaṃ mathitvopasamādhāya prāyaścittī karoti -

atha yadi prasuta āhavanīyo'nugacchet / gārhapatyaṃ vāva sa gacchati gārhapatyāddhi sa āhṛto bhavati gārhapatyādevainaṃ prāñcaṃ sāṃkāśinena hṛtvopasamādhāya prāyaścittī karoti yastasminkāle'dhvaraḥ syāttāmadhvaraprāyaścittiṃ kuryātsamānyagniprāyaścittiḥ -

atha yadyāgnīdhrīyo'nugacchet / gārhapatyaṃ vāva sa gacchati gārhapatyāddhi sa āhṛto bhavati gārhapatyādevainaṃ prāñcamuttareṇa sado hṛtvopasamādhāya prāyaścittī karotyatha yadi gārhapatyo'nugacchettasyokto bandhuḥ -