Scripture Library

Shatapatha Brahmana · Chapter 6.6.3

6.6.3.6.6.3.1

atha vaikaṅkatīmādadhāti / prajāpatiryāṃ prathamāmāhutimajuhotsa hutvā yatra nyamṛṣṭa tato vikaṅkataḥ samabhavatsaiṣā prathamāhutiryadvikaṅkatastāmasminnetajjuhoti tayainametatprīṇāti parasyā adhi saṃvato'varāṃ abhyātara yatrāhamasmi tāṃ aveti yathaiva yajustathā bandhuḥ -

6.6.3.6.6.3.2

athaudumbarīmādadhāti / devāścāsurāścobhaye prājāpatyā aspardhanta te ha sarva'eva vanaspatayo'surānabhyupeyurudumbaro haiva devānna jahau te devā asurāñjitvā teṣāṃ vanaspatīnavṛñjata -

6.6.3.6.6.3.3

te hocuḥ / hanta yaiṣu vanaspatiṣūrgyo rasa udumbare taṃ dadhāma te yadyapakrāmeyuryātayāmā apakrāmeyuryathā dhenurdugdhā yathā'naḍvānūhivāniti tadyaiṣu vanaspatiṣūrgyo rasa āsīdudumbare tamadadhustayaitadūrjā sarvānvanaspatīnprati pacyate tasmātsa sarvadārdraḥ sarvadā kṣīrī tadetatsarvamannaṃ yadudumbaraḥ sarve vanaspatayaḥ sarveṇaivainametadannena prīṇāti sarvairvanaspatibhiḥ saminddhe -

6.6.3.6.6.3.4

paramasyāḥ parāvata iti / yā paramā parāvadityetadrohidaśva ihāgahīti rohito hāgneraśvaḥ purīṣyaḥ purupriya iti paśavyo bahupriya ityetadagne tvaṃ tarā mṛdha ityagne tvaṃ tara sarvānpāpmana ityetat -

6.6.3.6.6.3.5

athāparaśuvṛkṇamādadhāti / jāyata eṣa etadyaccīyate sa eṣa sarvāsmā annāya jāyata etadvekamannaṃ yadaparaśuvṛkṇaṃ tenainametatprīṇāti yadagne kāni kāni cidā te dārūṇi dadhmasi sarvaṃ tadastu te ghṛtaṃ tajjuṣasva yaviṣṭhyeti yathaiva yajustathā bandhustadyatkiṃ cāparaśuvṛkṇaṃ tadasmā etatsvadayati tadasmā annaṃ kṛtvā'pidadhāti -

6.6.3.6.6.3.6

athādhaḥśayamādadhāti / jāyata eṣa etadyaccīyate sa eṣa sarvasmā annāya jāyata etadvekamannaṃ yadadhaḥśayaṃ tenainametatprīṇāti yadattyupajihvikā yadvamro atisarpatītyupajihvikā vā hi tadatti vamro vātisarpati sarvaṃ tadastu te ghṛtaṃ tajjuṣasva yaviṣṭhyeti yathaiva yajustathā bandhustadyatkiṃ cādhaḥśayaṃ tadasmā etatsvadayati tadasmā annaṃ kṛtvā'pidadhāti -

6.6.3.6.6.3.7

athaitā uttarāḥ pālāśyo bhavanti / brahma vai palāśo brahmaṇaivainametatsaminddhe yadveva pālāśyaḥ somo vai palāśa eṣo ha paramāhutiryatsomāhutistāmasminnetajjuhīti tayainametatprīṇāti -

6.6.3.6.6.3.8

aharaharaprayāvaṃ bharanta iti / aharaharapramattā āharanta ityetadaśvāyeva tiṣṭhate ghāsamasmā iti yathāśvāya tiṣṭhate ghāsamityetadrāyaspoṣeṇa samiṣā madanta iti rayyā ca poṣeṇa ca samiṣā madanta ityetadagne mā te prativeśā riṣāmeti yathaivāsya prativeśo na riṣyedevametadāha -

6.6.3.6.6.3.9

nābhā pṛthivyāḥ samidhāne agnāviti / eṣā ha nābhiḥ pṛthivyai yatraiṣa etatsamidhyate rāyaspoṣāya bṛhate havāmaha iti rayyai ca poṣāya ca bṛhate havāmaha ityetadirammadamitīrayā hyeṣa matto bṛhadukthamiti bṛhaduktho hyeṣa yajatramiti yajñiyamityetajjetāramagniṃ pṛtanāsu sāsahimiti jetā hyagniḥ pṛtanā u sāsahiḥ -

6.6.3.6.6.3.10

yāḥ senā abhītvarīḥ / daṃṣṭrābhyāṃ malimlūnye janeṣu malimlavo yo'asmabhyamarātīyādyaśca no dveṣate janaḥ nindādyo asmāndhipsācca sarvaṃ taṃ masmasā kurviti -

6.6.3.6.6.3.11

etadvai devāḥ / yaścainānadveḍyaṃ cādviṣustamasmā annaṃ kṛtvāpyadadhustenainamaprīṇannannamahaitasyābhavadadahadu devānāṃ pāpmānaṃ tathaivaitadyajamāno yaścainaṃ dveṣṭi yaṃ ca dveṣṭi tamasmā annaṃ kṛtvā'pidadhāti tenainaṃ prīṇātyannamahaitasya bhavati dahatyu yajamānasya pāpmānam -

6.6.3.6.6.3.12

tā etā ekādaśādadhāti / akṣatriyasya vā'purohitasya vā'sarvaṃ vai tadyadekādaśā sarvaṃ tadyadakṣatriyo vā'purohito vā -

6.6.3.6.6.3.13

dvādaśa kṣatriyasya vā purohitasya vā / sarvaṃ vai tadyaddvādaśa sarvaṃ tadyatkṣatriyo vā purohito vā -

6.6.3.6.6.3.14

sa purohitasyādadhāti / saṃśitaṃ me brahma saṃśitaṃ vīryaṃ balaṃ saṃśitaṃ kṣatraṃ jiṣṇu yasyāhamasmi purohita iti tadasya brahma ca kṣatraṃ ca saṃśyati -

6.6.3.6.6.3.15

atha kṣatriyasya / udeṣāṃ bāhū atiramudvarco atho balaṃ kṣiṇomi brahmaṇā'mitrānunnayāmi svāṃ ahamiti yathaiva kṣiṇuyādamitrānunnayetsvānevametadāhobhe tvevaite ādadhyādayaṃ vā agnirbrahma ca kṣatraṃ cemamevaitadagnimetābhyāmubhābhyāṃ saminddhe brahmaṇā ca kṣatreṇa ca -

6.6.3.6.6.3.16

tāstrayodaśa sampadyante / trayodaśa māsāḥ saṃvatsaraḥ saṃvatsaro'gniryāvānagniryāvatyasya mātrā tāvataivainametadannena prīṇāti -

6.6.3.6.6.3.17

prādeśamātryo bhavanti / prādeśamātro vai garbho viṣṇurannametadātmasammitenaivainametadannena prīṇāti yadu vā'ātmasammitamannaṃ tadavati tanna hinasti yadbhūyo hinasti tadyatkanīyo na tadavati tiṣṭhannādadhāti tasyopari bandhuḥ svāhākāreṇa reto vā idaṃ siktamayamagnistasminyatkāṣṭhānyasvāhākṛtānyabhyādadhyāddhiṃsyāddhainaṃ tā yatsamidhastena nāhutayo yadu svāhākāreṇa tenānnamannaṃ hi svāhākārastatho hainaṃ na hinasti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0