Shatapatha Brahmana · Chapter 6.6.2

tāṃ tiṣṭhanpravṛṇakti ime vai lokā ukhā tiṣṭhantīva vā ime lokā atho tiṣṭhanvai vīryavattamaḥ -

udaṅprāṅtiṣṭhan / udaṅvai prāṅtiṣṭhanprajāpatiḥ prajā asṛjat -

yadvevodaṅprāṅtiṣṭhan / eṣā hobhayeṣāṃ devamanuṣyāṇāṃ digyadudīcī prācī -

yadvevodaṅprāṅtiṣṭhan / etasyāṃ ha diśi svargasya lokasya dvāraṃ tasmādudaṅprāṅtiṣṭhannāhutīrjuhotyudaṅprāṅtiṣṭhandakṣiṇā nayati dvāraiva tatsvargasya lokasya vittaṃ prapādayati -

mā su bhitthā mā su riṣa iti / yathaiva yajustathā bandhuramba dhṛṣṇu vīrayasva sviti yoṣā vā ukhā'mbeti vai yoṣāyā āmantraṇaṃ sviva vīrayasvāgniścedaṃ kariṣyatha ityagniśca hyetatkariṣyantau bhavataḥ -

dṛṃhasva devī pṛthivī svastaya iti / yathaiva yajustathā bandhurāsurī māyā svadhayākṛtā'sīti prāṇo vā asustasyaiṣā māyā svadhayā kṛtā juṣṭaṃ devebhya idamastu havyamiti yā evaitasminnagnāvāhutīrhoṣyanbhavati tā etadāhātho eṣaiva havyamariṣṭā tvamudihi yajñe asminniti yathaivāriṣṭā'nārtaitasminyajña udiyādevametadāha -

dvābhyāṃ pravṛṇakti / dvipādyajamāno yajamāno'gniryāvānagniryāvatyasya mātrā tāvataivaināmetatpravṛṇakti gāyatryā ca triṣṭubhā ca prāṇo gāyatryātmā triṣṭubetāvānvai paśuryāvānprāṇaścātmā ca tadyāvānpaśustāvataivaināmetatpravṛṇaktyatho agnirvai gāyatrīndrastriṣṭubaindrāgno'gniryāvānagniryāvatyasya mātrā tāvataivaināmetatpravṛṇaktīndrāgnī vai sarve devāḥ sarvadevatyo'gniryāvānagniryāvatyasya mātrā tāvataivaināmetatpravṛṇakti tayoḥ sapta padāni saptacitiko'gniḥ sapta'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati -

tāṃ yadāgniḥ saṃtapati / athaināmarcirārohati yoṣā vā ukhā vṛṣā'gnistasmādyadā vṛṣā yoṣāṃ saṃtapatyathāsyāṃ reto dadhāti -

taddhaike / yadi ciramarcirārohatyaṅgārānevāvapantyubhayenaiṣo'gniriti na tathā kuryādasthanvānvāva paśurjāyate'tha taṃ nāgra 'evāsthanvantamiva nyṛṣanti reta'ivaiva dadhati reta u etadanasthikaṃ yadarcistasmādenāmarcirevārohet -

tāṃ yadārcirārohati / athāsmintsamidhamādadhāti reto vā enāmetadāpadyata eṣo'gnistasminnetāṃ retasi sambhūtiṃ dadhāti -

sā kārmukī syāt / devāścāsurāścobhaye prājāpatyā asparddhanta te devā agnimanīkaṃ kṛtvā'surānabhyāyaṃstasyārciṣaḥ pragṛhītasyāsurā agraṃ prāvṛścaṃstadasyāṃ pratyatiṣṭhatsa kṛmuko'bhavattasmātsa svādū raso hi tasmādu lohito'rcirhi sa eṣo'gnireva yatkṛmuko'gnimevāsminnetatsambhūtiṃ dadhāti -

prādeśamātrī bhavati / prādeśamātro vai garbho viṣṇurātmasammitāmevāsminnetatsambhūtiṃ dadhāti -

ghṛte nyuttā bhavati / agniryasyai yonerasṛjyata tasyai ghṛtamulbamāsīttasmāttatpratyuddīpyata 'ātmā hyasyaiṣa tasmāttasya na bhasma bhavatyātmaiva tadātmānamapyeti na vā ulbaṃ garbhaṃ hinastyahiṃsāyā' ulbādvai jāyamāno jāyata ulbājjāyamāno jāyātā iti -

tāmādadhāti / drvannaḥ sarpirāsutiriti dārvannaḥ sarpiraśana ityetatpratno hotāvareṇya iti sanātano hotā vareṇya ityetatsahasasputro adbhuta iti balaṃ vai saho balasya putro 'dbhuta ityetattiṣṭhannādadhāti svāhākāreṇa tasyopari bandhuḥ -

tadvā ātmaivokhā / yonirmuñjāḥ śaṇā jarāyūlbaṃ ghṛtaṃ garbhaḥ samit -

bāhyokhā bhavati / antare muñjā bāhyo hyātmā'ntarā yonirbāhye muñjā bhavantyantare śaṇā bāhyā hi yonirantaraṃ jarāyu bāhye śaṇā bhavantyantaraṃ ghṛtaṃ bāhyaṃ hi jarāyvantaramulbaṃ bāhyaṃ ghṛtaṃ bhavatyantarā samidbāhyaṃ hyulbamantaro garbha etebhyo vai jāyamāno jāyate tebhya evainametajjanayati -