Shatapatha Brahmana · Chapter 6.5.1

parṇakaṣāyaniṣpakvā etā āpo bhavanti / sthemne nveva yadveva parṇakaṣāyeṇa somo vai parṇaścandramā u vai soma etadu vā ekamagnirūpametasyai vāgnirūpasyopāptyai -

tā upasṛjati / āpo hi ṣṭhā mayobhuva iti yāṃ vai devatāmṛgabhyanūktā yāṃ yajuḥ saiva devatā sa'rkṣo devatā tadyajustā haitā āpa evaiṣa tricastadyā amūrāpa ekaṃ rūpaṃ samadṛśyanta tā etāstadevaitadrūpaṃ karoti -

atha phenaṃ janayitvānvavadadhāti / yadeva tatpheno dvitīyaṃ rūpamasṛjyata tadevaitadrūpaṃ karotyatha yāmeva tatra mṛdaṃ saṃyauti saiva mṛdyattattṛtīyaṃ rūpamasṛjyataitebhyo vā eṣa rūpebhyo'gre'sṛjyata tebhya evainametajjanayati -

athājalomaiḥ saṃsṛjati / sthemne nveva yadvevājalomairetadvā enaṃ devāḥ paśubhyo'dhi samabharaṃstathaivainamayametatpaśubhyo'dhi sambharati tadyadajalomairevāje hi sarveṣāṃ paśūnāṃ rūpamatha yalloma loma hi rūpam -

mitraḥ saṃsṛjya / pṛthivīṃ bhūmiṃ ca jyotiṣā saheti prāṇo vai mitraḥ prāṇo vā etadagre karmākarotsujātaṃ jātavedasamayakṣmāya tvā saṃsṛjāmi prajābhya iti yathaiva yajustathā bandhuḥ -

athaitattrayaṃ piṣṭaṃ bhavati / śarkarāśmāyorasastena saṃsṛjati sthemne nveva yadveva tenaitāvatī vā iyamagre'sṛjyata tadyāvatīyamagre'sṛjyata tāvatīmevaināmetatkaroti -

rudrāḥ saṃsṛjya / pṛthivīṃ bṛhajjyotiḥ samīdhira ityasau vā āditya eṣo'gniretadvai
tadrudrāḥ saṃsṛjya pṛthivīṃ bṛhajjyotiḥ samīdhire teṣāṃ bhānurajasra icchukro deveṣu rocata ityeṣa vā eṣāṃ bhānurajasraḥ śukro deveṣu rocate -

dvābhyāṃ saṃsṛjati / dvipādyajamāno yajamāno'gniryāvānagniryāvatyasya mātrā tāvataivainametatsaṃsṛjati -

atha prayauti / saṃsṛṣṭāṃ vasubhī rudrairiti saṃsṛṣṭā hyeṣā vasubhiśca bhavati yanmitreṇa tadvasubhiryadrudraistadrudrairdhīraiḥ karmaṇyāṃ mṛdamiti dhīrā hi te karmaṇyo iyaṃ mṛddhastābhyāṃ mṛdvīṃ kṛtvā sinīvālī kṛṇotu tāmiti vāgvai sinīvālī saināṃ hastābhyāṃ mṛdvīṃ kṛtvā karotvityetat -

sinīvālī sukapardā sukurīrā svaupaśeti / yoṣā vai sinīvālyetadu vai yoṣāyai samṛddhaṃ rūpaṃ yatsukapardā sukurīrā svaupaśā samardhayatyevaināmetatsā tubhyamadite mahyokhāṃ dadhātu hastayoritīyaṃ vā aditirmahyasyai tadāha -

ukhāṃ kṛṇotu / śaktyā bāhubhyāmaditirddhiyeti śaktyā ca hi karoti bāhubhyāṃ ca dhiyā ca mātā putraṃ yathopasthe sāgniṃ bibhartu garbha eti yathā mātā putramupasthe bibhṛyādevamagniṃ garbhe bibhartvityetat -

tribhiḥ prayauti / trivṛdagniryāvānagniryāvatyasya mātrā tāvataivainametatprayauti dvābhyāṃ saṃsṛjati tatpañca pañcacitiko'gniḥ pañca'rtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati tribhirapa upasṛjati tadaṣṭāvaṣṭākṣarā gāyatrī gāyatro'gniryāvānagniryāvatyasya mātrā tāvattadbhavatyatho aṣṭākṣarā vā iyamagre'sṛjyata tadyāvatīyamagre'sṛjyata tāvatīmevaināmetatkaroti -