શતપથબ્રાહ્મણમ્ · અધ્યાય 6.5.1

પર્ણકષાયનિષ્પક્વા એતા આપો ભવન્તિ । સ્થેમ્ને ન્વેવ યદ્વેવ પર્ણકષાયેણ સોમો વૈ પર્ણશ્ચન્દ્રમા ઉ વૈ સોમ એતદુ વા એકમગ્નિરૂપમેતસ્યૈ વાગ્નિરૂપસ્યોપાપ્ત્યૈ -

તા ઉપસૃજતિ । આપો હિ ષ્ઠા મયોભુવ ઇતિ યાં વૈ દેવતામૃગભ્યનૂક્તા યાં યજુઃ સૈવ દેવતા સઽર્ક્ષો દેવતા તદ્યજુસ્તા હૈતા આપ એવૈષ ત્રિચસ્તદ્યા અમૂરાપ એકં રૂપં સમદૃશ્યન્ત તા એતાસ્તદેવૈતદ્રૂપં કરોતિ -

અથ ફેનં જનયિત્વાન્વવદધાતિ । યદેવ તત્ફેનો દ્વિતીયં રૂપમસૃજ્યત તદેવૈતદ્રૂપં કરોત્યથ યામેવ તત્ર મૃદં સંયૌતિ સૈવ મૃદ્યત્તત્તૃતીયં રૂપમસૃજ્યતૈતેભ્યો વા એષ રૂપેભ્યોઽગ્રેઽસૃજ્યત તેભ્ય એવૈનમેતજ્જનયતિ -

અથાજલોમૈઃ સંસૃજતિ । સ્થેમ્ને ન્વેવ યદ્વેવાજલોમૈરેતદ્વા એનં દેવાઃ પશુભ્યોઽધિ સમભરંસ્તથૈવૈનમયમેતત્પશુભ્યોઽધિ સમ્ભરતિ તદ્યદજલોમૈરેવાજે હિ સર્વેષાં પશૂનાં રૂપમથ યલ્લોમ લોમ હિ રૂપમ્ -

મિત્રઃ સંસૃજ્ય । પૃથિવીં ભૂમિં ચ જ્યોતિષા સહેતિ પ્રાણો વૈ મિત્રઃ પ્રાણો વા એતદગ્રે કર્માકરોત્સુજાતં જાતવેદસમયક્ષ્માય ત્વા સંસૃજામિ પ્રજાભ્ય ઇતિ યથૈવ યજુસ્તથા બન્ધુઃ -

અથૈતત્ત્રયં પિષ્ટં ભવતિ । શર્કરાશ્માયોરસસ્તેન સંસૃજતિ સ્થેમ્ને ન્વેવ યદ્વેવ તેનૈતાવતી વા ઇયમગ્રેઽસૃજ્યત તદ્યાવતીયમગ્રેઽસૃજ્યત તાવતીમેવૈનામેતત્કરોતિ -

રુદ્રાઃ સંસૃજ્ય । પૃથિવીં બૃહજ્જ્યોતિઃ સમીધિર ઇત્યસૌ વા આદિત્ય એષોઽગ્નિરેતદ્વૈ
તદ્રુદ્રાઃ સંસૃજ્ય પૃથિવીં બૃહજ્જ્યોતિઃ સમીધિરે તેષાં ભાનુરજસ્ર ઇચ્છુક્રો દેવેષુ રોચત ઇત્યેષ વા એષાં ભાનુરજસ્રઃ શુક્રો દેવેષુ રોચતે -

દ્વાભ્યાં સંસૃજતિ । દ્વિપાદ્યજમાનો યજમાનોઽગ્નિર્યાવાનગ્નિર્યાવત્યસ્ય માત્રા તાવતૈવૈનમેતત્સંસૃજતિ -

અથ પ્રયૌતિ । સંસૃષ્ટાં વસુભી રુદ્રૈરિતિ સંસૃષ્ટા હ્યેષા વસુભિશ્ચ ભવતિ યન્મિત્રેણ તદ્વસુભિર્યદ્રુદ્રૈસ્તદ્રુદ્રૈર્ધીરૈઃ કર્મણ્યાં મૃદમિતિ ધીરા હિ તે કર્મણ્યો ઇયં મૃદ્ધસ્તાભ્યાં મૃદ્વીં કૃત્વા સિનીવાલી કૃણોતુ તામિતિ વાગ્વૈ સિનીવાલી સૈનાં હસ્તાભ્યાં મૃદ્વીં કૃત્વા કરોત્વિત્યેતત્ -

સિનીવાલી સુકપર્દા સુકુરીરા સ્વૌપશેતિ । યોષા વૈ સિનીવાલ્યેતદુ વૈ યોષાયૈ સમૃદ્ધં રૂપં યત્સુકપર્દા સુકુરીરા સ્વૌપશા સમર્ધયત્યેવૈનામેતત્સા તુભ્યમદિતે મહ્યોખાં દધાતુ હસ્તયોરિતીયં વા અદિતિર્મહ્યસ્યૈ તદાહ -

ઉખાં કૃણોતુ । શક્ત્યા બાહુભ્યામદિતિર્દ્ધિયેતિ શક્ત્યા ચ હિ કરોતિ બાહુભ્યાં ચ ધિયા ચ માતા પુત્રં યથોપસ્થે સાગ્નિં બિભર્તુ ગર્ભ એતિ યથા માતા પુત્રમુપસ્થે બિભૃયાદેવમગ્નિં ગર્ભે બિભર્ત્વિત્યેતત્ -

ત્રિભિઃ પ્રયૌતિ । ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈનમેતત્પ્રયૌતિ દ્વાભ્યાં સંસૃજતિ તત્પઞ્ચ પઞ્ચચિતિકોઽગ્નિઃ પઞ્ચઽર્તવઃ સંવત્સરઃ સંવત્સરોઽગ્નિર્યાવાનગ્નિર્યાવત્યસ્ય માત્રા તાવત્તદ્ભવતિ ત્રિભિરપ ઉપસૃજતિ તદષ્ટાવષ્ટાક્ષરા ગાયત્રી ગાયત્રોઽગ્નિર્યાવાનગ્નિર્યાવત્યસ્ય માત્રા તાવત્તદ્ભવત્યથો અષ્ટાક્ષરા વા ઇયમગ્રેઽસૃજ્યત તદ્યાવતીયમગ્રેઽસૃજ્યત તાવતીમેવૈનામેતત્કરોતિ -