Shatapatha Brahmana · Chapter 6.4.4

hasta eṣa bhavatyatha paśūnabhimantrayate / etadvā eṣu devāḥ sambhariṣyantaḥ purastādvīryamadadhustathaivaiṣvayametatsambhariṣyanpurastādvīryaṃ dadhāti -

so'śvamabhimantrayate / sa jāto garbho'asi rodasyoritīme vai dyāvāpṛthivī rodasī tayoreṣa jāto garbho'gne cārurvibhṛta oṣadhīṣviti sarvāsu hyeṣa cārurvibhṛta oṣadhiṣu citraḥ śiśuḥ pari tamāṃsyaktūniti citro vā eṣa śiśuḥ pareṇa tamāṃsyaktūnati rocate pra mātṛbhyo adhi kanikradadgā ityoṣadhayo vā etasya mātarastābhya eṣa kanikradatpraiti tadaśve vīryaṃ dadhāti -

atha rāsabham / sthiro bhava vīḍvaṅga āśurbhava vājyarvanniti sthiraśca bhava vīḍvaṅgaścāśuśca bhava vājī cārvannityetatpṛthurbhava suṣadastvamagneḥ purīṣavāhaṇa iti pṛthurbhava suśīmastvamagneḥ paśavyavāhana ityetattadrāsabhe vīryaṃ dadhāti -

athājam / śivo bhava prajābhyo mānuṣībhyastvamaṅgira ityaṅgirā vā agnirāgneyo'jaḥ śamayatyevainametadahiṃsāyai mā dyāvāpṛthivī abhiśocīrmāntarikṣaṃ mā vanaspatīnityetatsarvaṃ mā hiṃsīrityetattadaje vīryaṃ dadhāti -

tribhirabhimantrayate / trivṛdagniryāvānagniryāvatyasya mātrā tāvataivaiṣvetadvīryaṃ dadhāti -

athainameteṣāṃ paśūnāmupariṣṭātpragṛhṇāti / tadenametaiḥ paśubhiḥ sambharati nopaspṛśati vajro vai paśavo reta idaṃ nedidaṃ reto vajreṇa hinasānītyatho agnirayaṃ paśava ime nedayamagnirimānpaśūnhinasaditi -

tamaśvasyopariṣṭātpragṛhṇāti / praitu vājī kanikradaditi praitu vājī kanikradyamāna ityetannānadadrāsabhaḥ patveti tadaśvasya yajuṣi rāsabhaṃ nirāha tadrāsabhe śucaṃ dadhāti bharannagniṃ purīṣyaṃ mā pādyāyuṣaḥ pureti bharannagniṃ paśavyaṃ mo asmātkarmaṇaḥ purā pādītyetattadenamaśvena sambharati -

atha rāsabhasya / vṛṣāgniṃ vṛṣaṇaṃ bharanniti vṛṣā vā agnirvṛṣā rāsabhaḥ sa vṛṣā vṛṣāṇaṃ bharatyapāṃ garbhaṃ samudriyamityapāṃ hyeṣa garbhaḥ samudriyastadenaṃ rāsabhena sambharati -

athāpādatte / agna āyāhi vītaya ityavitava ityetattadenaṃ brahmaṇā yajuṣaitasmācchaudrādvarṇādapādatte -

athājasya / ṛtaṃ satyamṛtaṃ satyamityayaṃ vā agnirṛtamasāvādityaḥ satyaṃ yadi vā'sāvṛtamayaṃ satyamubhayamvetadayamagnistasmādāha'rtaṃ satyamṛtaṃ satyamiti tadenamajena sambharati -

tribhiḥ sambharati / trivṛdagniryāvānagniryāvatyasya mātrā tāvataivainametatsambharati tribhiḥ purastādabhimantrayate tatṣaṭ tasyokto bandhuḥ -

athaitānpaśūnāvartayanti / teṣāmajaḥ prathama etyatha rāsabho'thāśvo'theto yatāmaśvaḥ prathama etyatha rāsabho'thājaḥ kṣatraṃ vā anvaśvo vaiśyaṃ ca śūdraṃ cānu rāsabho brāhmaṇamajaḥ -

tadyadito yatām / aśvaḥ prathama eti tasmātkṣatriyaṃ prathamaṃ yantamitare trayo varṇāḥ paścādanuyantyatha yadamuta āyatāmajaḥ prathama eti tasmādbrāhmaṇaṃ prathamaṃ yantamitare trayo varṇāḥ paścādanuyantyatha yannaiveto yatāṃ nāmuto rāsabhaḥ prathama eti tasmānna kadā cana brāhmaṇaśca kṣatriyaśca vaiśyaṃ ca śūdraṃ ca paścādanvitastasmādevaṃ yantyapāpavasyasāyātho brahmaṇā caivaitatkṣatreṇa caitau varṇāvabhitaḥ parigṛhṇīte'napakramiṇau kurute-

athānaddhāpuruṣamīkṣate / agniṃ purīṣyamaṅgirasvadbharāma ityagniṃ paśavyamagnivadbharāma ityetattadenamanaddhāpuruṣeṇa sambharati -

tamajasyopariṣṭātpragṛhṇannaiti / āgneyo vā ajaḥ svenaivainametadātmanā svayā devatayā sambharatyatho brahma vā ajo brahmaṇaivainametatsambharati -

athainamupāvaharati / oṣadhayaḥ pratimodadhvamagnimetaṃ śivamāyantamabhyatra yuṣmā ityetaddhaitasmādāyata oṣadhayo bibhyati yadvai no'yaṃ na hiṃsyāditi tābhya evainametacchamayati pratyenaṃ modadhvaṃ śivo vo'bhyaiti na vo hiṃsiṣyatīti vyasyanviśvā anirā amīvā niṣīdanno apa durmatiṃ jahīti vyasyanviśvā anirāścāmīvāśca niṣīdanno'pa sarvaṃ pāpmānaṃ jahītyetat -

oṣadhayaḥ pratigṛbhṇīta / puṣpavatīḥ supippalā ityetaddhaitāsāṃ samṛddhaṃ rūpaṃ yatpuṣpavatyaḥ supippalāḥ samṛddhā enaṃ pratigṛhṇītetyetadayaṃ vo garbha ṛtviyaḥ pratnaṃ sadhasthamāsadadityayaṃ vo garbha ṛtavyaḥ sanātanaṃ sadhasthamāsadadityetat -

dvābhyāmupāvaharati / dvipādyajamāno yajamāno'gniryāvānagniryāvatyasya mātrā tāvataivainametadupāvaharati taṃ dakṣiṇata udañcamupāvaharati tasyokto bandhuruddhatamavokṣitaṃ bhavati yatrainamupāvaharatyuddhate vā avokṣite'gnimādadhati sikatā upakīrṇā bhavanti tāsāmupari bandhuḥ -

pariśritaṃ bhavati / etadvai devā abibhayuryadvai na imamiha rakṣāṃsi nāṣṭrā na hanyuriti tasmā etāṃ puraṃ paryaśrayaṃstathaivāsmā ayametāṃ puraṃ pariśrayatyatho yonirvā iyaṃ reta idaṃ tira iva vai yonau retaḥ sicyate yonirūpametatkriyate tasmādapi svayā jāyayā tira ivaiva cicariṣati -

athainaṃ viṣyati / tadyadevāsyātropanaddhasya saṃśucyati tāmevāsmādetacchucaṃ bahirdhā dadhātyatho etasyā evainametadyoneḥ prajanayati -

vi pājasā pṛthunā śośucāna iti / vi pājasā pṛthunā dīpyamāna ityetadbādhasva dviṣo rakṣaso amīvā iti bādhasva sarvānpāpmana ityetatsuśarmaṇo bṛhataḥ śarmaṇi syāmagnerahaṃ suhavasya praṇītāvityāśiṣamāśāste -

athājalomānyācchidya / udīcaḥ prācaḥ paśūnprasṛjatyeṣā hobhayeṣāṃ devamanuṣyāṇāṃ digyadudīcī prācyetasyāṃ taddiśi paśūndadhāti tasmādubhaye devamanuṣyāḥ paśūnupajīvanti -