Shatapatha Brahmana · Chapter 6.4.3

atha tatrāpa upaninayati / yadvā asyai kṣataṃ yadviliṣṭamadbhirvai tatsaṃdhīyate'dbhirevāsyā etatkṣataṃ viliṣṭaṃ saṃtanoti saṃdadhāti -

apo devīrupasṛja / madhumatīrayakṣmāya prajābhya iti raso vai madhu rasavatīrayakṣmatvāya prajābhya ityetattāsāmāsthānādujjihatāmoṣadhayaḥ supippalā ityapāṃ vā āsthānādujjihata oṣadhayaḥ supippalāḥ -

athaināṃ vāyunā saṃdadhāti / yadvā asyai kṣataṃ yadviliṣṭaṃ vāyunā vai tatsaṃdhīyate vāyunaivāsyā etatkṣataṃ viliṣṭaṃ saṃtanoti saṃdadhāti -

saṃ te vāyurmātariśvā dadhātviti / ayaṃ vai vāyurmātariśvā yo'yaṃ pavata uttānāyā hṛdayaṃ yadvikastamityuttānāyā hyasyā etaddhṛdayaṃ vikastaṃ yo devānāṃ carasi prāṇathenetyeṣa hi sarveṣāṃ devānāṃ carati prāṇathena kasmai deva vaṣaḍastu tubhyamiti prajāpatirvai kastasmā evaitadimāṃ vaṣaṭkaroti no haitāvatyanyā''hutirasti yathaiṣā -

athaināṃ digbhiḥ saṃdadhāti / yadvā asyai kṣataṃ yadviliṣṭaṃ digbhirvai tatsaṃdhīyate digbhirevāsyā etatkṣataṃ viliṣṭaṃ saṃtanoti saṃdadhāti sa imāṃ cemāṃ ca diśau saṃdadhāti tasmādete diśau saṃhite athemāṃ cemāṃ ca tasmādvevaite saṃhite ityagre'theti athetyatheti taddakṣiṇāvṛttaddhi devatrā'nayā'nayā vai bheṣajaṃ kriyate'nayaivaināmetadbhiṣajyati -

atha kṛṣṇājinaṃ ca puṣkaraparṇaṃ ca samudgṛhṇāti / yonirvai puṣkaraparṇaṃ yonyā tadretaḥ siktaṃ samudgṛhṇāti tasmādyonyā retaḥ siktaṃ samudgṛhyate sujāto jyotiṣā saha śarma varūthamāsadatsvariti sujāto hyeṣa jyotiṣā saha śarma caitadvarūthaṃ ca svaścāsīdati -

athainamupanahyati / yonau tadreto yunakti tasmādyonau reto yuktaṃ na niṣpadyate yoktreṇa yoktreṇa hi yogyaṃ yuñjanti mauñjena trivṛtā tasyokto bandhuḥ -

tatparyasyati / vāso agne viśvarūpaṃ saṃvyayasva vibhāvasaviti varuṇyā vai yajñe rajjuravaruṇyamevainadetatkṛtvā yathā vāsaḥ paridhāpayedevaṃ paridhāpayati -

athainamādāyottiṣṭhati / asau vā āditya eṣo'gniramuṃ tadādityamutthāpayatyudu tiṣṭha svadhvaretyadhvaro vai yajña udu tiṣṭha suyajñiyetyetadavā no devyā dhiyeti yā te daivī dhīstayā no'vetyetaddṛśe ca bhāsā bṛhatā suśukvaniriti darśanāya ca bhāsā bṛhatā suśukvanirityetadā'gne yāhi suśastibhiriti ye voḍhāraste suśastaya ā'gne yāhi voḍhṛbhirityetat -

athainamita ūrdhvaṃ prāñcaṃ pragṛhṇāti / asau vā āditya eṣo'gniramuṃ tadādityamita ūrdhvaṃ prāñcaṃ dadhāti tasmādasāvāditya ita ūrdhvaḥ prāṅdhīyata ūrdhva ū ṣu ṇa ūtaye tiṣṭhā devo na saviteti yathaiva yajustathā bandhurūrdhvo vājasya sanitetyūrdhvo vā eṣa tiṣṭhanvājamannaṃ sanoti yadañjibhirvāghadbhirvihvayāmaha iti raśmayo vā etasyāñjayo vāghatastānetadāha parobāhu pragṛhṇāti parobāhu hyeṣa ito'thainamupāvaharati tamupāvahṛtyoparinābhi dhārayati tasyopari bandhuḥ -