Shatapatha Brahmana · Chapter 6.4.1

athainamataḥ khanatyeva / etadvā enaṃ devā anuvidyākhanaṃstathaivainamayametadanuvidya khanati devasya tvā savituḥ prasave'śvinorbāhubhyāṃ pūṣṇo hastābhyāṃ pṛthivyāḥ sadhasthādagniṃ purīṣyamaṅgirasvatkhanāmīti savitṛprasūta evainametadetābhirdevatābhiḥ pṛthivyā upasthādagniṃ paśavyamagnivatkhanati -

jyotiṣmantaṃ tvāgne supratīkamiti / jyotiṣmānvā ayamagniḥ supratīko'jasreṇabhānunā dīdyatamityajasreṇārciṣā dīpyamānamityetacchivaṃ prajābhyo'hiṃsantaṃ pṛthivyāḥ sadhasthādagniṃ purīṣyamaṅgirasvatkhanāma iti śivaṃ prajābhyo'hiṃsantaṃ pṛthivyā upasthādagniṃ paśavyamagnivatkhanāma ityetat -

dvābhyāṃ khanati / dvipādyajamāno yajamāno'gniryāvānagniryāvatyasya mātrā tāvataivainametatkhanatyatho dvayaṃ hyevaitadrūpaṃ mṛccāpaśca -

sa vai khanāmi khanāma iti khanati / khanāmīti vā etaṃ prajāpatirakhanatkhanāma iti devāstasmātkhanāmi khanāma iti -

sa vā abhryā khanan / vācā khanāmi khanāma ityāha vāgvā abhrirārambhāyaiveyaṃ vaiṇavī kriyate vācā vā etamabhryā devā akhanaṃstathaivainamayametadvācaivābhryā khanati -

athainaṃ kṛṣṇājine sambharati / yajño vai kṛṣṇājinaṃ yajña evainametatsambharati lomataśchandāṃsi vai lomāni chandaḥsvevainametatsambharati tattūṣṇīmupastṛṇāti yajño vai kṛṣṇājinaṃ prajāpatirvai yajño'nirukto vai prajāpatiruttaratastasyoparibandhuḥ prācīnagrīve taddhi devatrā -

athainaṃ puṣkaraparṇe sambharati / yonirvai puṣkaraparṇaṃ yonau tadretaḥ siñcati yadvai yonau retaḥ sicyate tatprajaniṣṇu bhavati tanmantreṇopastṛṇāti vāgvai mantro vākpuṣkaraparṇam -

apāṃ pṛṣṭhamasi yoniragneriti / apāṃ hyetatpṛṣṭhaṃ yonirhyetadagneḥ samudramabhitaḥ pinvamānamiti samudro hyetadabhitaḥ pinvate vardhamāno mahāṃ ā ca puṣkara iti vardhamāno mahīyasva puṣkara ityetaddivo mātrayā varimṇā prathasvetyanuvimārṣṭyasau vā āditya eṣo'gnirno haitamanyo divo varimā yantumarhati dyaurbhūtvanaṃ yacchetyevaitadāha -

taduttaraṃ kṛṣṇājinādupastṛṇāti / yajño vai kṛṣṇājinamiyaṃ vai kṛṣṇājinamiyamu vai yajño'syāṃ hi yajñastāyate dyauṣpuṣkaraparṇamāpo vai dyaurāpaḥ puṣkaraparṇamuttaro vā asāvasyai -

athaine abhimṛśati / saṃjñāmevābhyāmetatkaroti śarma ca stho varma ca stha iti śarma ca hyasyaite varma cācchidre bahule ubhe ityacchidre hyete bahule ubhe vyacasvatī saṃvasāthāmityavakāśavatī saṃvasāthāmityetadbhṛtamagniṃ purīṣyamiti bibhṛtamagniṃ paśavyamityetat -

saṃvasāthāṃ svarvidā / samīcī urasā''tmaneti saṃvasāthāmenaṃ svarvidā samīcī'urasā cātmanā cetyetadagnimantarbhariṣyantī jyotiṣmantamajasramidityasau vā āditya eṣo'gniḥ sa eṣa jyotiṣmānajasrastamete antarā bibhṛtastasmādāha jyotiṣmantamajasramiditi -

dvābhyāmabhimṛśati / dvipādyajamāno yajamāno'gniryāvānagniryāvatyasya mātrā tāvataivābhyāmetatsaṃjñāṃ karotyatho dvayaṃ hyevaitadrūpaṃ kṛṣṇājinaṃ ca puṣkaraparṇaṃ ca -