Scripture Library

Shatapatha Brahmana · Chapter 6.3.2

6.3.2.6.3.2.1

hasta eṣābhrirbhavatyatha paśūnabhimantrayate / etadvā eṣu devā anveṣiṣyantaḥ purastādvīryamadadhustathaivaiṣvayametadanveṣiṣyanpurastādvīryaṃ dadhāti -

6.3.2.6.3.2.2

so'śvamabhimantrayate / pratūrtaṃ vājinnādraveti yadvai kṣipraṃ tattūrtamatha yatkṣiprātkṣepīyastatpratūrta variṣṭhāmanu saṃvatamitīyaṃ vai variṣṭhā saṃvadimāmanu saṃvatamityetaddivi te janma paramamantarikṣe tava nābhiḥ pṛthivyāmadhi yoniriditi tadenametā devatāḥ karotyagniṃ vāyumādityaṃ tadaśve vīryaṃ dadhāti -

6.3.2.6.3.2.3

atha rāsabham / yuñjāthāṃ rāsabhaṃ yuvamityadhvaryuṃ caitadyajamānaṃ cāhāsminyāme vṛṣaṇvasū ityasminkarmaṇi vṛṣaṇvasū ityetadagniṃ bharantamasmayumityagniṃ bharantamasmatpreṣitamityetattadrāsabhe vīryaṃ dadhāti -

6.3.2.6.3.2.4

athājam / yoge yoge tavastaraṃ vāje vāje havāmaha ityannaṃ vai vājaḥ karmaṇi karmaṇi tavastaramanne'nne havāmaha ityetatsakhāya indramūtaya itīndriyavantamūtaya ityetattadaje vīryaṃ dadhāti -

6.3.2.6.3.2.5

tribhirabhimantrayate / trivṛdagniryāvānagniryāvatyasya mātrā tāvataivaiṣvetadvīryaṃ dadhāti -

6.3.2.6.3.2.6

athainānprāca utkramayati / tadenametaiḥ paśubhiranvicchati nopaspṛśatyagnireṣa yatpaśavo nenmā'yamagnirhinasaditi -

6.3.2.6.3.2.7

so'śvamutkramayati / pratūrvannehyavakrāmannaśastīriti pāpmā vā aśastistvaramāṇa ehyavakrāmanpāpmānamityetadrudrasya gāṇapatyaṃ mayobhūrehīti raudrā vai paśavo yā te devatā tasyai gāṇapatyaṃ mayobhūrehītyetattadenamaśvenānvicchati -

6.3.2.6.3.2.8

atha rāsabham / urvantarikṣaṃ vīhi svasti gavyūtirabhayāni kṛṇvanniti yathaiva yajustathā bandhuḥ pūṣṇā sayujā sahetīyaṃ vai pūṣā'nayā sayujā sahetyetattadenaṃ rāsabhenānvicchati -

6.3.2.6.3.2.9

athājam / pṛthivyāḥ sadhasthādagniṃ purīṣyamaṅgirasvadābhareti pṛthivyā upasthādagniṃ paśavyamagnivadābharetyetattadenamajenānvicchati -

6.3.2.6.3.2.10

tribhiranvicchati / trivṛdagniryāvānagniryāvatyasya mātrā tāvataivainametadanvicchati tribhiḥ purastādabhimantrayate tatṣaṭṣaḍṛtavaḥ saṃvatsaraḥ saṃvatsaro'gniryāvānagniryāvatyasya mātrā tāvattadbhavati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0