શતપથબ્રાહ્મણમ્ · અધ્યાય 6.3.2

હસ્ત એષાભ્રિર્ભવત્યથ પશૂનભિમન્ત્રયતે । એતદ્વા એષુ દેવા અન્વેષિષ્યન્તઃ પુરસ્તાદ્વીર્યમદધુસ્તથૈવૈષ્વયમેતદન્વેષિષ્યન્પુરસ્તાદ્વીર્યં દધાતિ -

સોઽશ્વમભિમન્ત્રયતે । પ્રતૂર્તં વાજિન્નાદ્રવેતિ યદ્વૈ ક્ષિપ્રં તત્તૂર્તમથ યત્ક્ષિપ્રાત્ક્ષેપીયસ્તત્પ્રતૂર્ત વરિષ્ઠામનુ સંવતમિતીયં વૈ વરિષ્ઠા સંવદિમામનુ સંવતમિત્યેતદ્દિવિ તે જન્મ પરમમન્તરિક્ષે તવ નાભિઃ પૃથિવ્યામધિ યોનિરિદિતિ તદેનમેતા દેવતાઃ કરોત્યગ્નિં વાયુમાદિત્યં તદશ્વે વીર્યં દધાતિ -

અથ રાસભમ્ । યુઞ્જાથાં રાસભં યુવમિત્યધ્વર્યું ચૈતદ્યજમાનં ચાહાસ્મિન્યામે વૃષણ્વસૂ ઇત્યસ્મિન્કર્મણિ વૃષણ્વસૂ ઇત્યેતદગ્નિં ભરન્તમસ્મયુમિત્યગ્નિં ભરન્તમસ્મત્પ્રેષિતમિત્યેતત્તદ્રાસભે વીર્યં દધાતિ -

અથાજમ્ । યોગે યોગે તવસ્તરં વાજે વાજે હવામહ ઇત્યન્નં વૈ વાજઃ કર્મણિ કર્મણિ તવસ્તરમન્નેઽન્ને હવામહ ઇત્યેતત્સખાય ઇન્દ્રમૂતય ઇતીન્દ્રિયવન્તમૂતય ઇત્યેતત્તદજે વીર્યં દધાતિ -

ત્રિભિરભિમન્ત્રયતે । ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈષ્વેતદ્વીર્યં દધાતિ -

અથૈનાન્પ્રાચ ઉત્ક્રમયતિ । તદેનમેતૈઃ પશુભિરન્વિચ્છતિ નોપસ્પૃશત્યગ્નિરેષ યત્પશવો નેન્માઽયમગ્નિર્હિનસદિતિ -

સોઽશ્વમુત્ક્રમયતિ । પ્રતૂર્વન્નેહ્યવક્રામન્નશસ્તીરિતિ પાપ્મા વા અશસ્તિસ્ત્વરમાણ એહ્યવક્રામન્પાપ્માનમિત્યેતદ્રુદ્રસ્ય ગાણપત્યં મયોભૂરેહીતિ રૌદ્રા વૈ પશવો યા તે દેવતા તસ્યૈ ગાણપત્યં મયોભૂરેહીત્યેતત્તદેનમશ્વેનાન્વિચ્છતિ -

અથ રાસભમ્ । ઉર્વન્તરિક્ષં વીહિ સ્વસ્તિ ગવ્યૂતિરભયાનિ કૃણ્વન્નિતિ યથૈવ યજુસ્તથા બન્ધુઃ પૂષ્ણા સયુજા સહેતીયં વૈ પૂષાઽનયા સયુજા સહેત્યેતત્તદેનં રાસભેનાન્વિચ્છતિ -

અથાજમ્ । પૃથિવ્યાઃ સધસ્થાદગ્નિં પુરીષ્યમઙ્ગિરસ્વદાભરેતિ પૃથિવ્યા ઉપસ્થાદગ્નિં પશવ્યમગ્નિવદાભરેત્યેતત્તદેનમજેનાન્વિચ્છતિ -

ત્રિભિરન્વિચ્છતિ । ત્રિવૃદગ્નિર્યાવાનગ્નિર્યાવત્યસ્ય માત્રા તાવતૈવૈનમેતદન્વિચ્છતિ ત્રિભિઃ પુરસ્તાદભિમન્ત્રયતે તત્ષટ્ષડૃતવઃ સંવત્સરઃ સંવત્સરોઽગ્નિર્યાવાનગ્નિર્યાવત્યસ્ય માત્રા તાવત્તદ્ભવતિ -