Scripture Library

Shatapatha Brahmana · Chapter 5.5.5

5.5.5.5.5.5.1

५.५.५ traidhātavīyasaṃjñikā udavasānīyeṣṭiḥ
aindrāvaiṣṇavaṃ dvādaśakapālaṃ puroḍāśaṃ nirvapati / tadyadetayā yajate vṛtre ha vā idamagre sarvamāsa yadṛco yadyajūṃṣi yatsāmāni tasmā indro vajraṃ prājihīrṣat -

5.5.5.5.5.5.2

sa ha viṣṇumuvāca / vṛtrāya vai vajraṃ prahariṣyāmyanu mā tiṣṭhasveti tatheti ha viṣṇuruvācānu tvā sthāsye prahareti tasmā indro vajramudyayāma sa udyatādvajrādvṛtro bibhayāñcakāra -

5.5.5.5.5.5.3

sa hovāca / asti vā idaṃ vīryaṃ tannu te prayacchāni mā tu me prahārṣīriti tasmai yajūṃṣi prāyacchattasmai dvitīyamudyayāma -

5.5.5.5.5.5.4

sa hovāca / asti vā idaṃ vīryaṃ tannu te prayacchāni mā tu me prahārṣīriti tasmā ṛcaḥ prāyacchattasmai tṛtīyamudyayāma -

5.5.5.5.5.5.5

asti vā idaṃ vīryaṃ tannu te prayacchāni mā tu me prahāṣīriti tasmai sāmāni prāyacchattasmādapyetarhyevamevaitairvedairyajñaṃ tanvate yajurbhirevāgre'thargbhiratha sāmabhirevaṃ hyasmā etatprāyacchat -

5.5.5.5.5.5.6

tasya yo yonirāśaya āsa / tamanuparāmṛśya saṃlupyācchinatsaiṣeṣṭirabhavattadyadetasminnāśaye tridhāturivaiṣā vidyā''śeta tasmāttraidhātavī nāma -

5.5.5.5.5.5.7

atha yadaindrāvaiṣṇavaṃ havirbhavati / indro hi vajramudayacchadviṣṇuranvatiṣṭhata -

5.5.5.5.5.5.8

atha yaddvādaśakapālo bhavati / dvādaśa vai māsāḥ saṃvatsarasya saṃvatsarasammitaiṣeṣṭistasmāddvādaśakapālo bhavati -

5.5.5.5.5.5.9

tamubhayeṣāṃ vrīhiyavāṇāṃ gṛhṇāti / vrīhimayamevāgre piṇḍamadhiśrayati tadyajuṣāṃ rūpamatha yavamayaṃ tadṛcāṃ rūpamatha vrīhimayaṃ tatsāmnāṃ rūpam / tadetattrayyai vidyāyai rūpaṃ kriyate saiṣā rājasūyayājina udavasānīyeṣṭirbhavati -

5.5.5.5.5.5.10

sarvānvā eṣa yajñakratūnavarunddhe / sarvā iṣṭīrapi darvihomānyo rājasūyena yajate tasya yātayāmeva yajño bhavati so'smātparāṅiva bhavatyetāvānvai sarvo yajño yāvāneṣa trayo vedastasyaitadrūpaṃ kriyata eṣa yonirāśayastadetena trayeṇa vedena punaryajñamārabhate tathā'syāyātayāmā yajño bhavati tatho asmānna parāṅbhavati -

5.5.5.5.5.5.11

sarvānvā eṣa yajñakratūnavarunddhe / sarvā iṣṭīrapi darvihomānyo rājasūyena yajate devasṛṣṭo vā eṣeṣṭiryattraidhātavyanayā me'pīṣṭamasadanayāpi sūyā iti tasmādvā eṣā rājasūyayājina udavasānīyeṣṭirbhavati -

5.5.5.5.5.5.12

atho yaḥ sahasraṃ vā bhūyo vā dadyāt / tasya hāpyudavasānīyā syādriricāna iva vā eṣa bhavati yaḥ sahasraṃ vā bhūyo vā dadātyetadvai sahasraṃ vācaḥ prajātaṃ yadeṣa trayovedastatsahasreṇa riricānaṃ punarāpyāyayati tasmādu ha tasyāpyudavasānīyā syāt -

5.5.5.5.5.5.13

atho ye dīrghasattramāsīran / saṃvatsaraṃ vā bhūyo vā teṣāṃ hāpyudavasānīyā syātsarvaṃ vai teṣāmāptaṃ bhavati sarvaṃ jitaṃ ye dīrghasattramāsate saṃvatsaraṃ vā bhūyo vā sarvameṣā tasmādu ha teṣāmapyudavasānīyā syāt -

5.5.5.5.5.5.14

atho hainayā'pyabhicaret / etayā vai bhadrasenamājātaśatravamāruṇirabhicacāra kṣipraṃ kilāstṛṇuteti ha smāha yājñavalkyo'pi ha vā enayendro vṛtrasyāsthānamacchinadapi ha vā enayā''sthānaṃ chinatti ya enayābhicarati tasmādu hainayā'pyabhicaret -

5.5.5.5.5.5.15

atho hainayāpi bhiṣajyet / yaṃ nvevaikayarcā bhiṣajyedekena yajuṣaikena sāmnā taṃ nvevāgadaṃ kuryātkimu yaṃ trayeṇa vedena tasmādu hainayāpi bhiṣajyet -

5.5.5.5.5.5.16

tasyai trīṇi śatamānāni hiraṇyāni dakṣiṇā / tāni brahmaṇe dadāti na vai brahmā pracarati na stute na śaṃsatyatha sa yaśo na vai hiraṇyena kiṃ cana kurvantyatha tadyaśastasmāttrīṇi śatamānāni brahmaṇe dadāti -

5.5.5.5.5.5.17

tisro dhenūrhotre / bhūmā vai tisro dhenavo bhūmā hotā tasmāttisro dhenūrhotre -

5.5.5.5.5.5.18

trīṇi vāsāṃsyadhvaryave / tanute vā adhvaryuryajñaṃ tanvate vāsāṃsi tasmāttrīṇi vāsāṃsyadhvaryave gāmagnīdhe -

5.5.5.5.5.5.19

tā vā etāḥ / dvādaśa vā trayodaśa vā dakṣiṇā bhavanti dvādaśa vā vai trayodaśa vā saṃvatsarasya māsāḥ saṃvatsarasammitaiṣeṣṭistasmāddvādaśa vā trayodaśa vā dakṣiṇā bhavanti -

5.5.5.5

caturtha prapāṭhakaḥ pañcamo'dhyāyaḥ samāptaḥ/
iti mādhyaṃdinīye śatapatabrāhmaṇe savanāma pañcamaṃ kāṇḍaṃ samāptam

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0