Scripture Library

Shatapatha Brahmana · Chapter 5.2.3

5.2.3.5.2.3.1

५.२.३ atha rājasūyayajñaḥ
pūrṇāhutiṃ juhoti / sarvaṃ vai pūrṇaṃ sarvaṃ parigṛhya sūyā iti tasyāṃ varaṃ dadāti sarvaṃ vai varaḥ sarvaṃ parigṛhya sūyā iti sa yadi kāmayeta juhuyādetāṃ yadyu kāmayetāpi nādriyeta -

5.2.3.5.2.3.2

atha śvo bhūte / anumatyai haviraṣṭākapālaṃ puroḍāśaṃ nirvapati sa ye jaghanena śamyāṃ piṣyamāṇānāmavaśīyante piṣṭāni vā taṇḍulā vā tāntsruve sārdhaṃ saṃvapatyanvāhāryapacanādulmukamādadate tena dakṣiṇā yanti sa yatra svakṛtaṃ veriṇaṃ vindati śvabhrapradaraṃ vā -

5.2.3.5.2.3.3

tadagniṃ samādhāya juhoti / eṣa te nirṛte bhāgastaṃ juṣasva svāhetīyaṃ vai nirṛtiḥ sā yaṃ pāpmanā gṛhṇāti taṃ nirṛtyā gṛhṇāti tadyadevāsyā atra nairṛtaṃ rūpaṃ tadevaitacchamayati tatho hainaṃ sūyamānaṃ nirṛtirna gṛhṇātyatha yatsvakṛte veriṇe juhoti śvabhrapradare vaitadu hyasyai nirṛtigṛhītam -

5.2.3.5.2.3.4

athāpratīkṣaṃ punarāyanti / athānumatyā aṣṭākapālena puroḍāśena pracaratīyaṃ vā anumatiḥ sa yastatkarma śaknoti kartuṃ yaccikīrṣatīyaṃ hāsmai tadanumanyate tadimāmevaitatprīṇātyanayā'numatyā'numataḥ sūyā iti -

5.2.3.5.2.3.5

atha yadaṣṭākapālo bhavati / aṣṭākṣarā vai gāyatrī gāyatrī vā iyaṃ pṛthivyatha yatsamānasya haviṣa ubhayatra juhotyeṣā hyevaitadubhayaṃ tasya vāso dakṣiṇā yadvai savāsā araṇyaṃ nodāśaṃsate nidhāya vai tadvāso'timucyate tatho hainaṃ sūyamānamāsaṅgo na vindati -

5.2.3.5.2.3.6

atha śvo bhūte / āgnāvaiṣṇavamekādaśakapālaṃ puroḍāśaṃ nirvapati tena yatheṣṭyaivaṃ yajate tadyadevādaḥ prajātamāgnāvaiṣṇavaṃ dīkṣaṇīyaṃ havistadevaitadagnirvai sarvā devatā agnau hi sarvābhyo devatābhyo juhvatyagnirvai yajñasyāvarārdhyo viṣṇuḥ parārdhyastatsarvāścaivaitaddevatāḥ parigṛhya sarvaṃ ca yajñaṃ parigṛhya sūyā iti tasmādāgnāvaiṣṇava ekādaśakapālaḥ puroḍāśo bhavati tasya hiraṇyaṃ dakṣiṇāgneyo vā eṣa yajño bhavatyagne reto hiraṇyaṃ yo vai viṣṇuḥ sa yajño'gniru vai yajña eva tadu tadāgneyameva tasmāddhiraṇyaṃ dakṣiṇā -

5.2.3.5.2.3.7

atha śvo bhūte / agnīṣomīyamekādaśakapālaṃ puroḍāśaṃ nirvapati tena yatheṣṭyaivaṃ yajata etena vā indro vṛtramahanneteno eva vyajayata yā'syeyaṃ vijitistāṃ tatho evaiṣa etena pāpmānaṃ dviṣantaṃ bhrātṛvyaṃ hanti tatho eva vijayate vijite'bhaye'nāṣṭre sūyā iti tasmādagnīṣomīya ekādaśakapālaḥ puroḍāśo bhavati tasyotsṛṣṭo gaurdakṣiṇotsarjaṃ vā amuṃ candramasaṃ ghnanti paurṇamāsenāha ghnantyāmāvāsyenotsṛjanti tasmādutsṛṣṭo gaurdakṣiṇā -

5.2.3.5.2.3.8

atha śvo bhūte / aindrāgnaṃ dvādaśakapālaṃ puroḍāśaṃ nirvapati tena yatheṣṭyaivaṃ yajate yatra vā indro vṛtramahaṃstadasya bhītasyendriyaṃ vīryamapacakrāma sa etena haviṣendriyaṃ vīryaṃ punarātmannadhatta tatho evaiṣa etena haviṣendriyaṃ vīryamātmandhatte tejo vā agnirindriyaṃ vīryamindra ubhe vīrye parigṛhya sūyā iti tasmādaindrāgno dvādaśakapālaḥ puroḍāśo bhavati tasyarṣabho'naḍvāndakṣiṇā sa hi vahenāgneya āṇḍābhyāmaindrastasmādṛṣabho'naḍvāndakṣiṇā -

5.2.3.5.2.3.9

athāgrayaṇeṣṭyā yajate / sarvānvā eṣa yajñakratūnavarunddhe sarvā iṣṭīrapi darvihomānyo rājasūyena yajate devasṛṣṭo vā eṣeṣṭiryadāgrayaṇeṣṭiranayā me'pīṣṭamasadanayāpi sūyā iti tasmādāgrayaṇeṣṭyā yajata oṣadhīrvā eṣa sūyamāno'bhisūyate tadoṣadhīrevaitadanamīvā akilviṣāḥ kurute'namīvā akilviṣā oṣadhīrabhisūyā iti tasya gaurdakṣiṇā -

5.2.3.5.2.3.10

atha cāturmāsyairyajate / sarvānvā eṣa yajñakratūnavarunddhe sarvā iṣṭīrapi darvihomānyo rājasūyena yajate devasṛṣṭo vā eṣa yajñakraturyaccāturmāsyānyebhirme'pīṣṭamasadebhirapi sūyā iti tasmāccāturmāsyairyajate -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0