Scripture Library

Shatapatha Brahmana · Chapter 5.2.2

5.2.2.5.2.2.1

bārhaspatyena caruṇā pracarati / tasyāniṣṭa eva sviṣṭakṛdbhavatyathāsmā annaṃ sambharatyannaṃ vā eṣa ujjayati yo vājapeyena yajate'nnapeyaṃ ha vai nāmaitadyadvājapeyaṃ tadyadevaitadannamudajaiṣīttadevāsmā etatsambharati -

5.2.2.5.2.2.2

audumbare pātre / annaṃ vā ūrgudumbara ūrjo'nnādyasyāvaruddhyai tasmādaudumbare pātre so'pa eva prathamāḥ sambharatyatha payo'tha yathopasmāramannāni -

5.2.2.5.2.2.3

taddhaike / saptadaśānnāni sambharanti saptadaśaḥ prajāpatiriti vadantastadu tathā na kuryātprajāpaternveva sarvamannamanavaruddhaṃ ka u tasmai manuṣyo yaḥ sarvamannamavarundhīta tasmādu sarvamevānnaṃ yathopasmāraṃ sambharannekamannaṃ na sambharet -

5.2.2.5.2.2.4

sa yanna sambharati / tasyodbruvīta tasya nāśnīyādyāvajjīvaṃ tathā nāntameti tathā jyogjīvati sa etasya sarvasyānnādyasya sambhṛtasya sruveṇopaghātaṃ vājaprasavīyāni juhoti tadyābhya evaitaddevatābhyo juhoti tā asmai prasuvanti tābhiḥ prasūta ujjayati tasmādvājaprasavīyāni juhoti -

5.2.2.5.2.2.5

sa juhoti / vājasyemaṃ prasavaḥ suṣuve'gre somaṃ rājānamoṣadhīṣvapsu // tā asmabhyaṃ madhumatīrbhavantu vayaṃ rāṣṭre jāgṛyāma purohitāḥ svāhā -

5.2.2.5.2.2.6

vājasyemām / prasavaḥ śiśriye divamimā ca viśvā bhuvanāni samrāṭ/ aditsantaṃ dāpayati prajānantsa no rayiṃ sarvavīraṃ niyacchatu svāhā -

5.2.2.5.2.2.7

vājasya nu / prasava ābabhūvemā ca viśvā bhuvanāni sarvataḥ// sanemi rājā pariyāti vidvānprajāṃ puṣṭiṃ vardhayamāno asme svāhā -

5.2.2.5.2.2.8

somaṃ rājānamavase'gnimanvārabhāmahe / ādityānviṣṇuṃ sūryaṃ brahmāṇaṃ ca bṛhaspatiṃ svāhā -

5.2.2.5.2.2.9

aryamaṇaṃ bṛhaspatim / indraṃ dānāya codaya vācaṃ viṣṇuṃ sarasvatīṃ savitāraṃ ca vājinaṃ svāhā -

5.2.2.5.2.2.10

agne acchā / vadeha naḥ prati naḥ sumanā bhava/ pra no yaccha sahasrajittvaṃ hi dhanadā
asi svāhā -

5.2.2.5.2.2.11

pra naḥ / yacchatvaryamā pra pūṣā pra bṛhaspatiḥ pra vāgdevī dadātu naḥ svāheti -

5.2.2.5.2.2.12

athainaṃ pariśiṣṭenābhiṣiñcati /annādyenaivainametadabhiṣiñcatyannādyamevāsminnetaddadhāti tasmādenampariśiṣṭenābhiṣiñcati -

5.2.2.5.2.2.13

so'bhiṣiñcati / devasya tvā savituḥ prasave'śvinorbāhubhyāṃ pūṣṇo hastābhyāmiti devahastairevainametadabhiṣiñcati sarasvatyai vāco yanturyantriye dadhāmīti vāgvai sarasvatī tadenaṃ vāca eva yanturyantriye dadhāti -

5.2.2.5.2.2.14

tadu haika āhuḥ / viśveṣāṃ tvā devānāṃ yanturyantriye dadhāmīti sarvaṃ vai viśvedevāstadenaṃ sarvasyaiva yanturyantriye dadhāti tadu tathā na brūyātsarasvatyai tvā vāco yanturyantriye dadhāmītyeva brūyādvāgvai sarasvatī tadenaṃ vāca eva yanturyantriye dadhāti bṛhaspateṣṭvā sāmrājyenābhiṣiñcāmyasāviti nāma gṛhṇāti tadbṛhaspaterevainametatsāyujyaṃ salokatāṃ gamayati -

5.2.2.5.2.2.15

athāha / samrāḍayamasau samrāḍayamasāviti niveditamevainametatsantaṃ devebhyo nivedayatyayaṃ mahāvīryo yo'bhyaṣecītyayaṃ yuṣmākaiko'bhūttaṃ gopāyatetyevaitadāha triṣkṛtva āha trivṛddhi yajñaḥ -

5.2.2.5.2.2.16

athojjitīḥ / juhoti vā vācayati vā yadi juhoti yadi vācayati samāna eva bandhuḥ -

5.2.2.5.2.2.17

sa vācayati / agnirekākṣareṇa prāṇamudajayattamujjeṣaṃ prajāpatiḥ saptadaśākṣareṇa saptadaśaṃ stomamudajayattamujjeṣamiti tadyadevaitābhiretādevatā udajayaṃstadevaiṣa etābhirujjayati saptadaśa bhavanti saptadaśo vai prajāpatistatprajāpatimujjayati -

5.2.2.5.2.2.18

athāhāgnaye sviṣṭakṛte'nubrūhīti / tadyadantareṇāhutī etatkarma kriyata eṣa vai prajāpatirya eṣa yajñastāyate yasmādimāḥ prajāḥ prajātā etamvevāpyetarhyanu prajāyante tanmadhyata evaitatprajāpatimujjayati tasmādantareṇāhutī etatkarma kriyata āśrāvyāhāgniṃ sviṣṭakṛtaṃ yajeti vaṣaṭkṛte juhoti -

5.2.2.5.2.2.19

atheḍāmādadhāti / upahūtāyāmiḍāyāmapa upaspṛśya māhendraṃ grahaṃ gṛhṇāti māhendraṃ grahaṃ gṛhītvā stotramupākaroti taṃ stotrāya pramīvati sa upāvarohati so'nte stotrasya bhavatyante śastrasya -

5.2.2.5.2.2.20

taddhaike / etatkṛtvāthaitatkurvanti tadu tathā na kuryādātmā vai stotraṃ prajā śastrametasmāddha sa yajamānaṃ praṇāśayati sa jihma eti sa hvalati tasmādetadeva kṛtvā'thaitatkuryāt -

5.2.2.5.2.2.21

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0