Shatapatha Brahmana · Chapter 4.5.8

४.५.८ gargatrirātramahīnam
tadyatraitattrirātre sahasraṃ dadāti / tadeṣā sāhasrī kriyate sa prathame'haṃstrīṇi ca śatāni nayati trayastriṃśataṃ caivameva dvitīye'haṃstrīṇi caiva śatāni nayati trayastriṃśataṃ caivameva tṛtīye'haṃstrīṇi caiva śatāni nayati trayastriṃśataṃ cāthaiṣā sāhasryatiricyate -

sā vai trirūpā syādityāhuḥ / etaddhyasyai rūpatamamiveti rohiṇī ha tvevopadhvastā syādetaddhaivāsyai rūpatamamiva -

sā syādapravītā / vāgvā eṣā nidānena yatsāhasryayātayāmnī vā'iyaṃ vāgayātayāmnyapravītā tasmādapravītā syāt -

tāṃ prathame'hannayet / vāgvā eṣā nidānena yatsāhasrī tasyā etatsahasraṃ vācaḥ prajātaṃ pūrvā haiṣaiti paścādenāṃ prajātamanvetyuttamevaināmahannayetpūrvamahāsyai prajātameti paścādeṣānveti so eṣā mīmāṃsaivottama evaināmahannayetpūrvamahāsyai prajātameti paścādeṣānveti -

tāmuttareṇa havirdhāne / dakṣiṇenāgnīdhraṃ droṇakalaśamavaghrāpayati yajño vai droṇakalaśo yajñamevaināmetaddarśayati -

ājighra kalaśam / mahyā tvā viśantvindava iti riricāna iva vā eṣa bhavati yaḥ sahasraṃ dadāti tamevaitadriricānaṃ punarāpyāyayati yadāhājighra kalaśaṃ mahyātvā viśantvindava iti -

punarūrjā nivartasveti / tadveva riricānaṃ punarāpyāyayati yadāha punarūrjā nivartasveti -

sā naḥ sahasraṃ dhukṣveti / tatsahasreṇa riricānaṃ punarāpyāyayati yadāha sā naḥ sahasraṃ dhukṣveti -

urudhārā payasvatī punarmāviśatādrayiriti / tadveva riricānaṃ punarāpyāyayati yadāha punarmāviśatādrayiriti -

atha dakṣiṇe karṇa ājapati / iḍe rante havye kāmye candre jyote'diti sarasvati mahi viśruti etā te aghnye nāmāni devebhyo mā sukṛtaṃ brūtāditi voceriti vaitāni ha vā asyai devatrā nāmāni sā yāni te devatrā nāmāni tairmā devebhyaḥ sukṛtambrūtādityevaitadāha -

tāmavārjanti / sā yadyapuruṣābhivītā prācīyāttatra vidyādarātsīdayaṃ yajamānaḥ kalyāṇaṃ lokamajaiṣīditi yadyudīcīyāñchreyānasmiṃloke yajamāno bhaviṣyatīti vidyādyadi pratīcīyādibhyatilvila iva dhānyatilvilo bhaviṣyatīti vidyādyadi dakṣiṇeyātkṣipre'smāllokādyajamānaḥ praiṣyatīti vidyādetāni vijñānāni -

tadyā etāstisrastisrastriṃśatyadhi bhavanti / tāsvetāmupasamākurvanti vi vā etāṃ virājaṃ vṛhanti yāṃ vyākurvanti vicchinno eṣā virāḍyā vivṛḍhā daśākṣarā vai virāṭtatkṛtsnāṃ virājaṃ saṃdadhāti tāṃ hotre dadyāddhotā hi sāhasrastasmāttāṃ hotre dadyāt -

dvau vonnetārau kurvīta / tayoryataro nāśrāvayettasmā enāṃ dadyādvyṛddho vā eṣa unnetā ya ṛtviksannāśrāvayati vyṛddho eṣā virāḍyā vivṛḍhā tadvyṛddha evaitadvyṛddhaṃ dadhāti -

tadāhuḥ / na sahasre'dhi kiṃ cana dadyātsahasreṇa hyeva sarvān kāmānāpnotīti tadu hovācāsuriḥ kāmameva dadyātsahasreṇāha sarvān kāmānāpnoti kāmenoasyetaraddattaṃ bhavatīti -

atha yadi rathaṃ vā yuktaṃ dāsyantsyāt / yadvā vaśāyai vā vapāyāṃ hutāyāṃ dadyādudavasānīyāyāṃ veṣṭau -

sa vai dakṣiṇā nayan / anyūnā daśato nayedyasmā ekāṃ dāsyantsyāddaśabhyastebhyo daśatamupāvartayedyasmai dve dāsyantsyātpañcabhyastebhyo daśatamupāvartayedyasmai tisro dāsyantsyāttribhyastebhyo daśatamupāvartayedyasmai pañca dāsyantsyāddvābhyāṃ tābhyāṃ daśatamupāvartayedevamā śatāttatho hāsyaiṣānyūnā virāḍamuṣmiṃloke kāmadughā bhavati -