Scripture Library

Shatapatha Brahmana · Chapter 4.5.7

4.5.7.4.5.7.1

४.५.७ prāyaścittam
tā vā etāḥ / catustriṃśadvyāhṛtayo bhavanti prāyaścittayo nāmaiṣa vai prajāpatirya eṣa yajñastāyate yasmādimāḥ prajāḥ prajātā etamvevāpyetarhyanu prajāyante -

4.5.7.4.5.7.2

aṣṭau vasavaḥ / ekādaśa rudrā dvādaśādityā ime eva dyāvāpṛthivī trayastriṃśyau trayastriṃśadvai devāḥ prajāpatiścatustriṃśastadenaṃ prajāpatiṃ karotyetadvā astyetaddhyamṛtaṃ yaddhyamṛtaṃ taddhyastyetadu tadyanmartyaṃ sa eṣa prajāpatiḥ sarvaṃ vai prajāpatistadenaṃ prajāpatiṃ karoti tasmādetāścatustriṃśadvyāhṛtayo bhavanti prāyaścittayo nāma -

4.5.7.4.5.7.3

tā haike / yajñatanva ityācakṣate yajñasya ha tvevaitāni parvāṇi sa eṣa yajñastāyamāna etā eva devatā bhavanneti -

4.5.7.4.5.7.4

sa yadi gharmadughā hvalet / anyāmupasaṃkrāmeyuḥ sa yasyāmevainaṃ velāyāṃ purā pinvayanti tadvaivaināmudīcīṃ sthāpayedagreṇa vā śālāṃ prācīm -

4.5.7.4.5.7.5

tadye ete abhitaḥ / pucchakāṇḍaṃ śikhaṇḍāsthe anucchayāte tayoryaddakṣiṇaṃ tasminnetāścatustriṃśatamājyāhutīrjuhotyetāvānvai sarvo yajño yāvatya etāścatustriṃśadvyāhṛtayo bhavanti tadasyāṃ kṛtsnameva sarvaṃ yajñaṃ dadhātyeṣā hyato gharmaṃ pinvata eṣo tatra prāyaścittiḥ kriyate -

4.5.7.4.5.7.6

atha yadyajñasya hvalet / tatsamanvīkṣya juhuyāddīkṣopasatsvāhavanīye prasutaāgnīdhre vi vā etadyajñasya parva srṃsate yaddhvalati sā yaiva tarhi tatra devatā bhavati tayaivaitadbhiṣajyati tayā saṃdadhāti -

4.5.7.4.5.7.7

atha yadi skandet / tadadbhirupaninayedadbhirvā idaṃ sarvamāptaṃ sarvasyaivāptyai vaiṣṇavavāruṇyarcā yadvā idaṃ kiṃ cārcati varuṇa evedaṃ sarvamārpayati yayorojasā skabhitā rajāṃsi vīryebhirvīratamā śaviṣṭhā yā patyete apratītā sahobhirviṣṇū aganvaruṇā pūrvahūtāviti yajño vai viṣṇustasyaitadārcchati varuṇo vā ārpayitā tadyasyāścaivaitaddevatāyā ārcchati yo ca devatārpayati tābhyāmavaitadubhābhyāmbhiṣajyatyubhābhyāṃ saṃdadhāti -

4.5.7.4.5.7.8

atho abhyeva mṛśet / devāndivamaganyajñastato mā draviṇamaṣṭu manuṣyānantarikṣamaganyajñastato mā draviṇamaṣṭupitṝnpṛthivīmaganyajñastato mā draviṇamaṣṭu yaṃ kaṃ ca lokamaganyajñastato me bhadramabhūdityevaitadāha -

4.5.7.4.5.7.9

taddha smaitadāruṇirāha / kiṃ sa yajeta yo yajñasya vyṛddhyā pāpīyānmanyeta yajñasya vā ahaṃ vyṛddhyā śreyānbhavāmītyetaddha sma sa tadabhyāha yadetā āśiṣa upagacchati -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0