Scripture Library

Shatapatha Brahmana · Chapter 4.5.10

4.5.10.4.5.10.1

yadi somamapahareyuḥ / vidhāvatecchateti brūyātsa yadi vindanti kimādriyeranyadyu na vindanti tatra prāyaścittiḥ kriyate -

4.5.10.4.5.10.2

dvayāni vai phālgunāni / lohitapuṣpāṇi cāruṇapuṣpāṇi ca sa yānyaruṇapuṣpāṇi phālgunāni tānyabhiṣuṇuyādeṣa vai somasya nyaṅgo yadaruṇapuṣpāṇi phālgunāni tasmādaruṇapuṣpāṇyabhiṣuṇuyāt -

4.5.10.4.5.10.3

yadyaruṇapuṣpāṇi na vindeyuḥ / śyenahṛtamabhiṣuṇuyādyatra vai gāyatrī somamacchāpatattasyā āharantyai somasyāṃśurapatattacchyenahṛtamabhavattasmācchyenahṛtamabhiṣuṇuyāt -

4.5.10.4.5.10.4

yadi śyenahṛtaṃ na vindeyuḥ / ādārānabhiṣuṇuyādyatra vai yajñasya śiro'cchidyattasya yo raso vyapruṣyattata ādārāḥ samabhavaṃstasmādādārānabhiṣuṇuyāt -

4.5.10.4.5.10.5

yadyādārānna vindeyuḥ / aruṇadūrvā abhiṣuṇuyādeṣa vai somasya nyaṅgo yadaruṇadūrvāstasmādaruṇadūrvā abhiṣuṇuyāt -

4.5.10.4.5.10.6

yadyaruṇadūrvā na vindeyuḥ / api yāneva kāṃśca haritānkuśānabhiṣuṇuyāttatrāpyekāmeva gāṃ dadyādathāvabhṛthādevodetya punardīkṣeta punaryajño hyeva tatra prāyaścittiriti nu somāpahṛtānām -

4.5.10.4.5.10.7

atha kalaśadirām / yadi kalaśo dīryetānulipsadhvamiti brūyātsa yadyanulabheranprasṛtamātraṃ vāñjalimātraṃ vā tadanyairekadhanairabhyunnīya yathāprabhāvaṃ pracareyuryadyu nānulabherannāgrayaṇasyaiva praskandyānyairekadhanairabhyunnīya yathāprabhāvaṃ pracareyuḥ sa yadyanītāsu dakṣiṇāsu kalaśo dīryeta tatrāpyekāmeva gāṃ dadyādathāvabhṛthādevodetya punardīkṣeta punaryajño hyeva tatra prāyaścittiriti nu kalaśadirām -

4.5.10.4.5.10.8

atha somātiriktānām / yadyagniṣṭomamatiricyeta pūtabhṛta evokthyaṃ gṛhṇīyādyadyukthyamatiricyeta ṣoḍaśinamupeyuryadi ṣoḍaśinamatiricyeta rātrimupeyuryadi rātrimatiricyetāharupeyurnettvevātīreko'sti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0