Shatapatha Brahmana · Chapter 4.4.3

४.४.३ hāriyojanagrahaḥ
paśavo vai devānāṃ chandāṃsi / tadyathedaṃ paśavo yuktā manuṣyebhyo vahantyevaṃ chandāṃsi yuktāni devebhyo yajñaṃ vahanti tadyatra chandāṃsi devāntsamatarpayannatha chandāṃsi devāḥsamatarpayaṃstadatastatprāgabhūdyacchandāṃsi yuktāni devebhyo yajñamavākṣuryadenāntsamatītṛpan

atha hāriyojanaṃ gṛhṇāti / chandāṃsi vai hāriyojanaśchandāṃsyevaitatsaṃtarpayati tasmāddhāriyojanaṃ gṛhṇāti

taṃ vā atiriktaṃ gṛhṇāti / yadā hi śaṃyorāhāthainaṃ gṛhṇātīdaṃ vai devā atha chandāṃsyatiriktānyatha manuṣyā atha paśavo'tiriktāstasmādatiriktaṃ gṛhṇāti

droṇakalaśe gṛhṇāti / vṛtro vai soma āsīttaṃ yatra devā aghnaṃstasya mūrdhodvavarta sa droṇakalaśo'bhavattasminyāvānvā yāvānvā rasaḥ samasravadatirikto vai sa āsīdatirikta eṣa grahastadatirikta evaitadatiriktaṃ dadhāti tasmāddroṇakalaśe gṛhṇāti

taṃ vā apurorukkaṃ gṛhṇāti / cchandobhyo hyenaṃ gṛhṇāti sa yadevainaṃ cchandobhyo gṛhṇāti teno hāsyaiṣa puroruṅmānbhavati tasmādapurorukkaṃ gṛhṇāti

athāto gṛhṇātyeva / upayāmagṛhīto'si harirasi hāriyojano haribhyāṃ tvetyṛksāme vai harī ṛkasāmābhyāṃ hyenaṃ gṛhṇāti

atha dhānā āvapati / haryordhānā stha sahasomā indrāyeti tadyadevātra mitaṃ ca cchando'mitaṃ ca tadevaitatsarvaṃ bhakṣayati

tasyonnetā''śrāvayati / atirikto vā unnetā na hyeṣo'nyasyāśrāvayatyatirikta eṣa grahastadatirikta evaitadatiriktaṃ dadhāti tasmādunnetā''śrāvayati

mūrdhannabhinidhāyāśrāvayati / mūrdhā hyasyaiṣo'thāha dhānāsomebhyo'nubrūhītyāśrāvyāha dhānāsomānprasthitānpreṣyeti vaṣaṭkṛte juhotyanuvaṣaṭkṛte'tha dhānā vilipsante bhakṣāya

taddhaike / hotre droṇakalaśaṃ pratiparāharanti vaṣaṭkarturbhakṣa iti vadantastadu tathā na kuryādyathācamasaṃ vā anye bhakṣā athaiṣo'tiriktastasmādetasmintsarveṣāmeva bhakṣastasmāddhānā vilipsante bhakṣāya

tā na dadbhiḥ khādeyuḥ / paśavo vā ete netpaśūnpramrade karavāmahā iti prāṇaireva bhakṣayanti yaste aśvasanirbhakṣo yo gosaniriti paśavo hyete tasmādāha yaste aśvasanirbhakṣo yo gosaniriti tasya ta iṣṭayajuṣa stutastomasyetīṣṭāni hi yajūṃṣi bhavanti stutā stomāḥ śastokthasyeti śastāni hyukthāni bhavantyupahūtasyopahūto bhakṣayāmītyupahūtasya hyetadupahūto bhakṣayati

tā nāgnau prakireyuḥ / neducchiṣṭamagnau juhavāmetyuttaravedāveva nivapanti tathā na bahirdhā yajñādbhavanti

atha pūrṇapātrāntsamavamṛśanti / yāneke'psuṣomā ityācakṣate yathā vai yukto vahedevamete ya ārtvijyaṃ kurvantyuta vai yuktaḥ kṣaṇute vā vi vā liśate śāntirāpo bheṣajaṃ tadyadevātra kṣaṇvate vā vi vā liśante śāntirāpastadadbhiḥ śāntyā śamayante tadadbhiḥ saṃdadhate tasmātpūrṇapātrāntsamavamṛśanti

te samavamṛśanti / saṃ varcasā payasā sa tanūbhiraganmahi manasā saṃ śivena tvaṣṭā sudatro vidadhātu rāyo'numārṣṭu tanvo yadviliṣṭamiti yadvivṛḍhaṃ tatsaṃdadhate

atha mukhānyupaspṛśante / dvayaṃ tadyasmānmukhānyupaspṛśante'mṛtaṃ vā āpo'mṛtenaivaitatsaṃspṛśanta etadu caivaitatkarmātmankurvate tasmānmukhānyupaspṛśante