Shatapatha Brahmana · Chapter 4.4.4

४.४.४ samiṣṭayajuḥ
tāni vā etāni / nava samiṣṭayajūṃṣi juhoti tadyannava samiṣṭayajūṃṣi juhoti nava vā amūrbahiṣpavamāne stotriyā bhavanti saiṣobhayato nyūnā virāṭprajananāyaitasmādvā ubhayato nyūnātprajananātprajāpatiḥ prajāḥ sasṛja itaścordhvā itaścāvācīstatho evaiṣa etasmādubhayata eva nyūnātprajananātprajāḥ sṛjata itaścordhvā itaścāvācīḥ -

hiṅkāra stotriyāṇāṃ daśamaḥ / svāhākāra eteṣāṃ tatho hāsyaiṣā nyūnā virāḍdaśaṃdaśinī bhavati -

atha yasmātsamiṣṭayajūṃṣi nāma / yā vā etena yajñena devatā hvayati yābhya eṣa yajñastāyate sarvā vai tattāḥ samiṣṭā bhavanti tadyattāsu sarvāsu samiṣṭāsvathaitāni juhoti tasmātsamiṣṭayajūṃṣi nāma-

atha yasmātsamiṣṭayajūṃṣi juhoti / riricāna iva vā etadījānasyātmā bhavati yaddhyasya bhavati tasya hi dadāti tamevātastribhiḥ punarāpyāyayati -

atha yānyuttarāṇi trīṇi juhoti / yā vā etena yajñena devatā hvayati yābhya eṣa yajñastāyata upa haiva tā āsate yāvanna samiṣṭayajūṃṣi juhvatīmāni nu no juhvatviti tā evaitadyathāyathaṃ vyavasṛjati yatra yatrāsāṃ caraṇaṃ tadanu -

atha yānyuttamāni trīṇi juhoti / yajñaṃ vā etadajījanata yadenamatata taṃ janayitvā yatrāsya pratiṣṭhā tatpratiṣṭhāpayati tasmātsamiṣṭayajūṃṣi juhoti -

sa juhoti / samindra ṇo manasā neṣi gobhiriti manaseti tanmanasā riricānamāpyāyayati gobhiriti tadgobhī riricānamāpyāyayati saṃ sūribhirmaghavantsaṃ svastyā saṃ brahmaṇā devakṛtaṃ yadastīti brahmaṇeti tadbrahmaṇā riricānamāpyāyayati saṃ devānāṃ sumatau yajñiyānāṃ svāhā -

saṃ varcasā / payasā saṃ tanūbhiriti varcaseti tadvarcasā riricānamāpyāyayati payaseti raso vai payastatpayasā riricānamāpyāyayatyaganmahi manasā saṃ śivena tvaṣṭā sudatro vidadhātu rāyo'numārṣṭu tanvo yadviliṣṭamiti vivṛḍhaṃ tatsaṃdadhāti -

savitedaṃ juṣantāṃ prajāpatirnidhipā devo agniḥ / tvaṣṭā viṣṇuḥ prajayā saṃrarāṇā yajamānāya draviṇaṃ dadhāta svāheti tadveva riricānaṃ punarāpyāyayati yadāha yajamānāya draviṇaṃ dadhāta svāheti -

sugā vo devāḥ / sadanā akarma ya ājagmedaṃ savanaṃ juṣāṇā iti sugāni vo devāḥ sadanānyakarma ya āgantedaṃ savanaṃ juṣāṇā ityevaitadāha bharamāṇā vahamānā havīṃṣīti taddevatā vyavasṛjati bharamāṇā aha te yantu ye'vāhanā vahamānā u te yantu ye vāhanavanta ityevaitadāha tasmādāha bharamāṇā vahamānā havīṃṣyasme dhatta vasavo vasūni svāhā -

yāṃ āvahaḥ / uśato deva devāṃstānpreraya sve agne sadhastha ityagniṃ vā āhāmūndevānāvahāmūndevānāvaheti tamevaitadāha yāndevānāvākṣīstāngamaya yatrayatraiṣāṃ caraṇaṃ tadanviti jakṣivāṃsaḥ papivāṃsaśca viśva iti jakṣivāṃso hi paśuṃ puroḍāśaṃ bhavanti papivāṃsa iti papivāṃso hi somaṃ rājānaṃ bhavanti tasmādāha jakṣivāṃsaḥ papivāṃsaśca viśve'suṃ gharmaṃ svarātiṣṭhatānu svāheti tadveva devatā vyavasṛjati -

vayaṃ hi tvā / prayati yajñe asminnagne hotāramavṛṇīmahīha ṛdhagayā ṛdhagutāśamiṣṭhāḥ prajānanyajñamupayāhi vidvāntsvāhetyagnimevaitayā vimuñcatyagniṃ vyavasṛjati -

devā gātuvida iti / gātuvido hi devā gātuṃ vittveti yajñaṃ vittvetyevaitadāha gātumiteti tadetena yathāyathaṃ vyavasṛjati manasaspata imaṃ deva yajñaṃ svāhā vāte dhā ityayaṃ vai yajño yo'yaṃ pavate tadimaṃ yajñaṃ sambhṛtyaitasminyajñe pratiṣṭhāpayati yajñena yajñaṃ saṃdadhāti tasmādāha svāhā vāte dhā iti -

yajña yajñaṃ gaccha / yajñapatiṃ gaccha svāṃ yoniṃ gaccha svāheti tatpratiṣṭhitamevaitadyajñaṃ santaṃ svāyāṃ yonau pratiṣṭhāpayatyeṣa te yajño yajñapate sahasūktavākaḥ sarvavīrastaṃ juṣasva svāheti tatpratiṣṭhitamevaitadyajñaṃ santaṃ sahasūktavākaḥ sarvavīraṃ yajamāne'ntataḥ pratiṣṭhāpayati -