Scripture Library

Shatapatha Brahmana · Chapter 4.3.2

4.3.2.4.3.2.1

४.३.२ mādhyaṃdinasavanagrahāḥ
gṛṇāti ha vā etaddhotā yacchaṃsati / tasmā etadgṛṇate pratyevādhvaryurāgṛṇāti tasmātpratigaro nāma -

4.3.2.4.3.2.2

taṃ vai prāñcamāsīnamāhvayate / sarve vā anya udgātuḥ prāñca ārtvijyaṃ kurvanti tatho hāsyaitatprāgevārtvijyaṃ kṛtaṃ bhavati -

4.3.2.4.3.2.3

prajāpatirvā udgātā / yoṣargghotā sa etatprajāpatirudgātā yoṣāyāmṛci hotari retaḥ siñcati yatstute taddhotā śastreṇa prajanayati tacchyati yathāyaṃ puruṣaḥ śitastadyadenacchyati tasmācchastraṃ nāma -

4.3.2.4.3.2.4

tadupapalyayya pratigṛṇāti / idamevaitadretaḥ siktamupanimadatyatha yatparāṅtiṣṭhanpratigṛṇīyātparāgu haivaitadretaḥ siktaṃ praṇaśyettanna prajāyeta samyañcā u caivaitadbhūtvaitadretaḥ siktaṃ prajanayataḥ -

4.3.2.4.3.2.5

yātayāmāni vai devaiśchandāṃsi / cchandobhirhi devāḥ svargaṃ lokaṃ samāśnuvata mado vai pratigaro yo vā ṛci mado yaḥ sāmanraso vai sa tacchandaḥ svevaitadrasaṃ dadhātyayātayāmāni karoti tairayātayāmairyajñaṃ tanvate -

4.3.2.4.3.2.6

tasmādyadyardharcaśaḥ śaṃset / ardharce'rdharce pratigṛṇīyādyadi pacchaḥ śaṃsetpadepade pratigṛṇīyādyatra vai śaṃsannavāniti tadasurarakṣasāni yajñamanvavacaranti tatpratigareṇa saṃdadhāti nāṣṭrāṇāṃ rakṣasāmananvavacārāya yajamānasyo caivaitadbhrātṛvyalokaṃ chinatti -

4.3.2.4.3.2.7

caturakṣarāṇi ha vā agre cchandāṃsyāsuḥ / tato jagatī somamacchāpatatsā trīṇyakṣarāṇi
hitvā jagāma tatastriṣṭupsomamacchāpatatsaikamakṣaraṃ hitvā jagāma tato gāyatrī somamacchāpatatsaitāni cākṣarāṇi harantyāgacchatsomaṃ ca tato'ṣṭākṣarā gāyatryabhavattasmādāhuraṣṭākṣarā gāyatrīti -

4.3.2.4.3.2.8

tayā prātaḥsavanamatanvata / tasmādgāyatraṃ prātaḥsavanaṃ tayaiva mādhyandinaṃ savanamatanvata tāṃ ha triṣṭubuvācopa tvāhamāyāni tribhirakṣarairupa mā hvayasva mā mā yajñādantargā iti tatheti tāmupāhvayata tata ekādaśākṣarā triṣṭubabhavattasmādāhustraiṣṭubhaṃ mādhyandinaṃ savanamiti -

4.3.2.4.3.2.9

tayaiva tṛtīyasavanamatanvata / tāṃ ha jagatyuvācopa tvāhamāyānyekenākṣareṇopa mā hvayasva mā mā yajñādantargā iti tatheti tāmupāhvayata tato dvādaśākṣarā jagatyabhavattasmādāhurjāgataṃ tṛtīyasavanamiti -

4.3.2.4.3.2.10

tadāhuḥ / gāyatrāṇi vai sarvāṇi savanāni gāyatrī hyevaitadupasṛjamānaiditi tasmātsaṃsiddhaṃ prātaḥsavane pratigṛṇīyātsaṃsiddhā hi gāyatryāgacchatsakṛnmadvanmādhyandine savana ekaṃ hi sā'kṣaraṃ hitvā''gacchattenaivaināmetatsamardhayati kṛtsnāṃ karoti -

4.3.2.4.3.2.11

yatra triṣṭubhaḥ śasyante / trimadvattṛtīyasavane trīṇi hi sā'kṣarāṇi hitvā''gacchattairevaināmetatsamardhayati kṛtsnāṃ karoti -

4.3.2.4.3.2.12

yatra dyāvāpṛthivyaṃ śasyate / ime ha vai dyāvāpṛthivī imāḥ prajā upajīvanti tadanayorevaitaddyāvāpṛthivyo rasaṃ dadhāti te rasavatyā upajīvanīye imāḥ prajā upajīvanti sa vā omityeva pratigṛṇīyāttaddhi satyaṃ taddevā viduḥ -

4.3.2.4.3.2.13

taddhaike / othāmo daiva vāgiti pratigṛṇanti vākpratigara etadvācamupāpnuma iti vadantastadu tathā na kuryādyathā vai kathā ca pratigṛṇātyupāptaivāsya vāgbhavati vācā hi pratigṛṇāti tasmādomityeva pratigṛṇīyāttaddhi satyaṃ taddevā viduḥ -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0