Shatapatha Brahmana · Chapter 4.1.4

४.१.४ maitrāvaruṇagrahaḥ
kratūdakṣau ha vā asya mitrāvaruṇau / etannvadhyātmaṃ sa yadeva manasā kāmayata idaṃ me syādidaṃ kurvīyeti sa eva kraturatha yadasmai tatsamṛdhyate sa dakṣo mitra eva kraturvaruṇo dakṣo brahmaiva mitraḥ kṣatraṃ varuṇo'bhigantaiva brahma kartā kṣatriyaḥ -

te haite'agre nānevāsatuḥ / brahma ca kṣatraṃ ca tataḥ śaśākaiva brahma mitra ṛte kṣatrādvaruṇātsthātum -

na kṣatraṃ varuṇaḥ / ṛte brahmaṇo mitrādyaddha kiṃ ca varuṇaḥ karma cakre'prasūtaṃ brahmaṇā mitreṇa na haivāsmai tatsamānṛdhe -

sa kṣatraṃ varuṇaḥ / brahma mitramupamantrayāṃ cakra upa mā''vartasva saṃsṛjāvahai purastvā karavai tvatprasūtaḥ karma karavā iti tatheti tau samasṛjetāṃ tata eṣa maitrāvaruṇo graho'bhavat -

so eva purodhā / tasmānna brāhmaṇaḥ sarvasyeva kṣatriyasya purodhāṃ kāmayeta saṃ hyevaitau sṛjete sukṛtaṃ ca duṣkṛtaṃ ca no eva kṣatriyaḥ sarvamiva brāhmaṇampurodadhīta saṃ hyevaitau sṛjete sukṛtaṃ ca duṣkṛtaṃ ca sa yattato varuṇaḥ karma cakre prasūtaṃ brahmaṇā mitreṇa saṃ haivāsmai tadānṛdhe -

tattadavakḷptameva / yadbrāhmaṇo'rājanyaḥ syādyadyu rājānaṃ labheta samṛddhaṃ tadetaddha tvevānavakḷptaṃ yatkṣatriyo brāhmaṇo bhavati yaddha kiṃ ca karma kurute prasūtaṃ brahmaṇā mitreṇa na haivāsmai tatsamṛdhyate tasmādu kṣatriyeṇa karma kariṣyamāṇenopasartavya eva brāhmaṇaḥ saṃ haivāsmai tadbrahmaprasūtaṃ karma'rdhyate -

athāto gṛhṇātyeva / ayaṃ vāṃ mitrāvaruṇā sutaḥ soma ṛtāvṛdhā mamediha śrutaṃ havamupayāmagṛhīto'si mitrāvaruṇābhyāṃ tveti -

taṃ payasā śrīṇāti / tadyatpayasā śrīṇāti vṛtro vai soma āsīttaṃ yatra devā aghnaṃstammitramabruvaṃstvamapi haṃsīti sa na cakame sarvasya vā ahaṃ mitramasmi na mitraṃ sannamitro bhaviṣyāmīti taṃ vai tvā yajñādantareṣyāma ityahamapi hanmīti hovāca tasmātpaśavo'pākrāmanmitraṃ sannamitro'bhūditi sa paśubhirvyārdhyata tametaddevāḥ paśubhiḥ samārdhayanyatpayasā'śrīṇaṃstatho evainameṣa etatpaśubhiḥ samardhayati yatpayasā śrīṇāti -

tadāhuḥ / śaśvaddha naiva cakame hantumiti tadyadevātra payastanmitrasya soma eva varuṇasya tasmātpayasā śrīṇāti -

sa śrīṇāti / rāyā vayaṃ sasavāṃso madema havyena devā yavasena gāvaḥ tāṃ dhenummitrāvaruṇā yuvaṃ no viśvāhā dhattamanapasphurantīmeṣa te yonirṛtāyubhyāṃ tveti sādayati sa yadāha'rtāyubhyāṃ tveti brahma vā ṛtaṃ brahma hi mitro brahmo hyṛtaṃ varuṇa evāyuḥ saṃvatsaro hi varuṇaḥ saṃvatsara āyustasmādāhaiṣa te yonirṛtāyubhyāṃ tveti -