Shatapatha Brahmana · Chapter 3.9.2

.
३.९.२ vasatīvarīgrahaṇam
yatra vai yajñasya śiro'cchidyata / tasya raso drutvāpaḥ praviveṣa tenaivaitadrasenāpaḥ syandante tamevaitadrasaṃ syandamānaṃ manyante -

sa yadvasatīvarīracchaiti / tamevaitadrasamāhṛtya yajñe dadhāti rasavantaṃ yajñaṃ karoti tasmādvasatīvarīracchaiti -

tā vai sarveṣu savaneṣu vibhajati / sarveṣvevaitatsavaneṣu rasaṃ dadhāti sarvāṇi savanāni rasavanti karoti tasmātsarveṣu vibhajati -

tā vai syandamānānāṃ gṛhṇīyāt / aiddhi sa yajñasya rasastasmātsyandamānānāṃ gṛhṇīyāt -

gopīthāya vā etā gṛhyante / sarvaṃ vā idamanyadilayati yadidaṃ kiṃ cāpi yo'yampavate'thaitā eva nelayanti tasmātsyandamānānāṃ gṛhṇīyāt -

divā gṛhṇīyāt / paśyanyajñasya rasaṃ gṛhṇānīti tasmāddivā gṛhṇīyādetasmai vai gṛhṇāti ya eṣa tapati viśvebhyo hyenā devebhyo gṛhṇāti raśmayo hyasya viśvedevāstasmāddivā gṛhṇīyāddiveva vā eṣa tasmādveva divā gṛhṇīyāt -

etaddha vai viśve devāḥ / yajamānasya gṛhānāgacchanti sa yaḥ purādityasyāstamayādvasatīvarīrgṛhṇāti yathā śreyasyāgamiṣyatyāvasathenopakḷptenopāsītaivaṃ tatta etaddhaviḥ praviśanti ta'etāsu vasatīvarīṣūpavasanti sa upavasathaḥ -

sa yasyāgṛhītā abhyastamiyāt / tatra prāyaścittiḥ kriyate yadi purejānaḥ syānnināhyādgṛhṇīyāddivā hi tasya tāḥ purā gṛhītā bhavanti yadyu anījānaḥ syādya enamījāna upāvasito vā paryavasito vā syāttasya nināhyādgṛhṇīyāddivā hi tasya tāḥ purā gṛhītā bhavanti -

yadyu etadubhayaṃ na vindet / ulkuṣīmevādāyopapareyāttāmuparyupari dhārayangṛhṇīyāddhiraṇyaṃ voparyupari dhārayangṛhṇīyāttadetasya rūpaṃ kriyate ya eṣa tapati -

athāto gṛhṇātyeva / haviṣmatīrimā āpa iti yajñasya hyāsu rasaḥ prāviśattasmādāha haviṣmatīrimā āpa iti haviṣmānāvivāsatīti haviṣmānhyenā yajamāna āvivāsati tasmādāha haviṣmānāvivāsatīti -

haviṣmāndevo adhvara iti / adhvaro vai yajñastadyasmai yajñāya gṛhṇāti taṃ haviṣmantaṃ karoti tasmādāha haviṣmāndevo adhvara iti -

haviṣmānastu sūrya iti / etasmai vai gṛhṇāti ya eṣa tapati viśvebhyo hyenā devebhyo gṛhṇāti raśmayo hyasya viśve devāstasmādāha haviṣmānastu sūrya iti -

tā āhṛtya jaghanena gārhapatyaṃ sādayati / agnervo'pannagṛhasya sadasi sādayāmītyagnervo'nārtagṛhasya sadasi sādayāmītyevaitadāhātha yadāgnīṣomīyaḥ paśuḥ saṃtiṣṭhate'tha pariharati vyutkrāmatetyāhāgreṇa havirdhāne yajamāna āste tā ādatte -

sa dakṣiṇena niṣkrāmati / tā dakṣiṇāyāṃ śroṇau sādayatīndrāgnyorbhāgadheyī stheti viśvebhyo hyenā devebhyo gṛhṇātīndrāgnī hi viśve devāstāḥ punarāhṛtyāgreṇa patnīṃ sādayati sa jaghanena patnīṃ paryetya tā ādatte -

sa uttareṇa niṣkrāmati / tā uttarāyāṃ śroṇau sādayati mitrāvaruṇayorbhāgadheyī stheti naivaṃ sādayedatiriktametannaivaṃ sampatsampadyata indrāgnyorbhāgadheyī sthetyeva brūyāttadevānatiriktaṃ tathā sampatsampadyate -

guptyai vā etāḥ parihriyante / agniḥ purastādathaitāḥ samantaṃ palyaṅgyante nāṣṭrā rakṣāṃsyapaghnatyastā āgnīdhre sādayati viśveṣāṃ devānāṃ bhāgadheyī stheti tadāsu viśvāndevāntsaṃveśayatyete vai vasatāṃ varaṃ tasmādvasatīvaryo nāma vasatāṃ ha vai varaṃ bhavati ya evametadveda -

tāni vā etāni sapta yajūṃṣi bhavanti / caturbhirgṛhṇātyekena jaghanena gārhapatyaṃ sādayatyekena pariharatyekenāgnīdhre tāni sapta yatra vai vācaḥ prajātāni chandāṃsi saptapadā vai teṣāṃ parārdhyā śakvaryetāmabhisampadaṃ tasmātsapta yajūṃṣi bhavanti -