Scripture Library

Shatapatha Brahmana · Chapter 3.7.3

3.7.3.3.7.3.1

३.७.३ agnīṣomīyapaśuyāgaḥ
paśuśca vai yūpaśca / na vā ṛte yūpātpaśumālabhante kadā cana tadyattathā na ha vā etasmā agre paśavaścakṣamire yadannamabhaviṣyanyathedamannaṃ bhūtā yathā haivāyaṃ dvipātpuruṣa ucchrita evaṃ haiva dvipāda ucchritāśceruḥ -

3.7.3.3.7.3.2

tato devā etaṃ vajraṃ dadṛśuḥ / yadyūpaṃ tamucchiśriyustasmādbhīṣā prāvlīyanta tataścatuṣpādā abhavaṃstato'nnamabhavanyathedamannaṃ bhūtā etasmai hi vā ete'tiṣṭhanta tasmādyūpa eva paśumālabhante narte yūpātkadā cana -

3.7.3.3.7.3.3

athopākṛtya paśum / agniṃ mathitvā niyunakti tadyattathā na ha vā etasmā agre paśavaścakṣamire yaddhavirabhaviṣyanyathainānidaṃ havirbhūtānagnau juhvati tāndevā upanirurudhusta upaniruddhā nopāveyuḥ -

3.7.3.3.7.3.4

te hocuḥ / na vā ime'sya yāmaṃ viduryadagnau havirjuhvati naitāmpratiṣṭhāmuparudhyaiva paśūnagniṃ mathitvāgnāvagniṃ juhavāma te vediṣyantyeṣa vai kila haviṣo yāma eṣā pratiṣṭhāgnau vai kila havirjuhvatīti tato'bhyavaiṣyanti tato rātamanasa ālambhāya bhaviṣyantīti -

3.7.3.3.7.3.5

ta uparudhyaiva paśūn / agniṃ mathitvāgnāvagnimajuhuvuste'vidureṣa vai kila haviṣo yāmaḥ eṣā pratiṣṭhāgnau vai kila havirjuhvatīti tato'bhyavāyaṃstato rātamanasa ālambhāyābhavan -

3.7.3.3.7.3.6

tatho evaiṣa etat / uparudhyaiva paśumagniṃ mathitvāgnāvagniṃ juhoti sa vedaiṣa vai kila haviṣo yāma eṣā pratiṣṭhāgnau vai kila havirjuhvatīti tato'bhyavaiti tato rātamanā ālambhāya bhavati tasmādupākṛtya paśumagniṃ mathitvā niyunakti -

3.7.3.3.7.3.7

tadāhuḥ / nopākuryānnāgniṃ manthedraśanāmevādāyāñjasopaparetyābhidhāya niyuñjyāditi tadu tathā na kuryādyathādharmaṃ tiraścathā cikīrṣedevaṃ tattasmādetadevānuparīyāt -

3.7.3.3.7.3.8

atha tṛṇamādāyopākaroti / dvitīyavānniruṇadhā iti dvitīyavānhi vīryavān -

3.7.3.3.7.3.9

sa tṛṇamādatte / upāvīrasītyupa hi dvitīyo'vati tasmādāhopāvīrasītyupa devāndaivīrviśaḥ prāguriti daivyo vā etā viśo yatpaśavo'sthiṣata devebhya ityevaitadāha yadāhopa devāndaivīrviśaḥ prāguriti -

3.7.3.3.7.3.10

uśijo vahnitamāniti / vidvāṃso hi devāstasmādāhośijo vahnitamāniti -

3.7.3.3.7.3.11

deva tvaṣṭarvasu rameti / tvaṣṭā vai paśūnāmīṣṭe paśavo vasu tānetaddevā atiṣṭhamānāṃstvaṣṭāramabruvannupanimadeti yadāha deva tvaṣṭarvasu rameti -

3.7.3.3.7.3.12

havyā te svadantāmiti / yadā vā eta etasmā adhriyanta yaddhavirabhaviṣyaṃstasmādāha havyā te svadantāmiti -

3.7.3.3.7.3.13

revatī ramadhvamiti / revanto hi paśavastasmādāha revatī ramadhvamiti bṛhaspate dhārayā vasūnīti brahma vai bṛhaspatiḥ paśavo vasu tānetaddevā atiṣṭhamānānbrahmaṇaiva parastātparyadadhustannātyāyaṃstatho evaināneṣa etadbrahmaṇaiva parastātparidadhāti tannātiyanti tasmādāha bṛhaspate dhārayā vasūnīti pāśaṃ kṛtvā pratimuñcatyathāto niyojanasyaiva -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0