Scripture Library

Shatapatha Brahmana · Chapter 3.7.2

3.7.2.3.7.2.1

yāvatī vai vedistāvatī pṛthivī / vajrā vai yūpāstadimāmevaitatpṛthivīmetairvajraiḥ spṛṇute'syai sapatnānnirbhajati tasmādyūpaikādaśinī bhavati dvādaśa upaśayo bhavati vitaṣṭastaṃ dakṣiṇata upanidadhāti tadyaddvādaśa upaśayo bhavati -

3.7.2.3.7.2.2

devā ha vai yajñaṃ tanvānāḥ / te'surarakṣasebhya āsaṅgādbibhayāñcakrustadya eta ucchritā yatheṣurastā tayā vai stṛṇute vā na vā stṛṇute yathā daṇḍaḥ prahṛtastena vai stṛṇute vā na vā stṛṇute'tha ya eṣa dvādaśa upaśayo bhavati yatheṣurāyatānastā yathodyatamaprahṛtamevameṣa vajra udyato dakṣiṇato nāṣṭrāṇāṃ rakṣasāmapahatyai tasmāddvādaśa upaśayo bhavati -

3.7.2.3.7.2.3

taṃ nidadhāti / eṣa te pṛthivyāṃ loka āraṇyaste paśuriti paśuśca vai yūpaśca tadasmā āraṇyameva paśūnāmanudiśati teno eṣa paśumānbhavati tadvayaṃ yūpaikādaśinyai sammayanamāhuḥ śvaḥsutyāyai ha nvevaike samminvanti prakubdratāyai caiva śvaḥsutyāyai yūpaṃ minvantītyu ca -

3.7.2.3.7.2.4

tadu tathā na kuryāt / agniṣṭhamevocchrayedidaṃ vai yūpamucchrityādhvaryurāparivyayaṇānnānvarjatyaparivītā vā eta etāṃ rātriṃ vasanti sā nveva paricakṣā paśave vai yūpamucchrayanti prātarvai paśūnālabhante tasmādu prātarevocchrayet -

3.7.2.3.7.2.5

sa ya uttaro'gniṣṭhātsyāt / tamevāgra ucchrayedatha dakṣiṇamathottaraṃ dakṣiṇārddhyamuttamaṃ tathodīcī bhavati -

3.7.2.3.7.2.6

atho itarathāhuḥ / dakṣiṇamevāgre'gniṣṭhāducchrayedathottaramatha dakṣiṇamuttarārdhyamuttamaṃ tatho hāsyodageva karmānusaṃtiṣṭhata iti -

3.7.2.3.7.2.7

sa yo varṣiṣṭhaḥ sa dakṣiṇārdhyaḥ syāt / atha hrasīyānatha hrasīyānuttarārdhyo hrasiṣṭhastathodīcī bhavati -

3.7.2.3.7.2.8

atha patnībhyaḥ patnīyūpamucchrayanti / sarvatvāya nveva patnīyūpa ucchrīyate tattvāṣṭraṃ paśumālabhate tvaṣṭā vai siktaṃ reto vikaroti tadeṣa evaitatsiktaṃ reto vikaroti muṣkaro bhavatyeṣa vai prajanayitā yanmuṣkarastasmānmuṣkaro bhavati taṃ na saṃsthāpayetparyagnikṛtamevotsṛjetsa yatsaṃsthāpayetprajāyai hāntamiyāttatprajāmutsṛjati tasmānna saṃsthāpayetparyagnikṛtamevotsṛjet -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0