Scripture Library

Shatapatha Brahmana · Chapter 3.2.3

3.2.3.3.2.3.1

३.२.३.prāyaṇīyadevatāvidhiḥ
ādityaṃ caruṃ prāyaṇīyaṃ nirvapati / devā ha vā asyāṃ yajñaṃ tanvānā imāṃ yajñādantarīyuḥ sā haiṣāmiyaṃ yajñaṃ mohayāṃcakāra kathaṃ nu mayi yajñaṃ tanvānā māṃ yajñādantarīyuriti taṃ ha yajñaṃ na prajajñuḥ -

3.2.3.3.2.3.2

te hocuḥ / yannvasyāmeva yajñamataṃsmahi kathaṃ nu no'mahatkathaṃ na prajānīma iti -

3.2.3.3.2.3.3

te hocuḥ / asyāmeva yajñaṃ tanvānā imāṃ yajñādantaragāma sā na iyameva yajñamamūmuhadimāmevopadhāvāmeti -

3.2.3.3.2.3.4

te hocuḥ / yannu tvayyeva yajñamataṃsmahi kathaṃ nu no'muhatkathaṃ na prajānīma iti -

3.2.3.3.2.3.5

sā hovāca / mayyeva yajñaṃ tanvānā māṃ yajñādantaragāta sā vo'hameva yajñamamūmuhaṃ bhāgaṃ nu me kalpayatātha yajñaṃ drakṣyathātha prajñāsyatheti -

3.2.3.3.2.3.6

tatheti devā abruvan / tavaiva prāyaṇīyastavodayanīya iti tasmādeṣa āditya eva prāyaṇīyo bhavatyāditya udayanīya iyaṃ hyevāditistato yajñamapaśyaṃstamatanvata -

3.2.3.3.2.3.7

sa yadādityaṃ caruṃ prāyaṇīyaṃ nirvapati / yajñasyaiva dṛṣṭyai yajñaṃ dṛṣṭvā krīṇāni taṃ tanavā iti tasmādādityaṃ caruṃ prāyaṇīyaṃ nirvapati tadvai niruptaṃ havirāsīdaniṣṭā devatā -

3.2.3.3.2.3.8

athaibhyaḥ pathyā svastiḥ prārocata / tāmayajanvāgvai pathyāsvastirvāgyajñastadyajñamapaśyaṃstamatanvata -

3.2.3.3.2.3.9

athaibhyo'gniḥ prārocata / tamayajantsa yadāgneyaṃ yajñasyāsīttadapaśyanyadvai śuṣkaṃ yajñasya tadāgneyaṃ tadapaśyaṃstadatanvata -

3.2.3.3.2.3.10

athaibhyaḥ somaḥ prārocata / tamayajantsa yatsaumyaṃ yajñasyāsīttadapaśyanyadvā ārdraṃ yajñasya tatsaumyaṃ tadapaśyaṃstadatanvata -

3.2.3.3.2.3.11

athaibhyaḥ savitā prārocata / tamayajanpaśavo vai savitā paśavo yajñastadyajñamapaśyaṃstamatanvatātha yasyai devatāyai havirniruptamāsīttāmayajan -

3.2.3.3.2.3.12

tā vā etāḥ / pañca devatā yajati yo vai sa yajño mugdha āsītpāṅkto vai sa āsīttametābhiḥ pañcabhirdevatābhiḥ prājānan -

3.2.3.3.2.3.13

ṛtavo mugdhā āsanpañca / tānetābhireva pañcabhirdevatābhiḥ prājānan -

3.2.3.3.2.3.14

diśo mugdhā āsanpañca / tā etābhireva pañcabhirdevatābhiḥ prājānan -

3.2.3.3.2.3.15

udīcīmeva diśam pathyayā svastyā prājānaṃstasmādatrottarā hi vāgvadati kurupañcālatrā vāgghyeṣā nidānenodīcīṃ hyetayā diśaṃ prājānannudīcī hyetasyai dik -

3.2.3.3.2.3.16

prācīmeva diśam / agninā prājānaṃstasmādagniṃ paścātprāñcamuddhṛtyopāsate prācīṃ hyetena diśaṃ prājānanprācī hyetasya dik -

3.2.3.3.2.3.17

dakṣiṇāmeva diśam somena prājānaṃstasmātsomaṃ krītaṃ dakṣiṇā parivahanti tasmādāhuḥ pitṛdevatyaḥ soma iti dakṣiṇāṃ hyetena diśaṃ prājānandakṣiṇā hyetasya dik -

3.2.3.3.2.3.18

pratīcīmeva diśam savitrā prājānanneṣa vai savitā ya eṣa tapati tasmādeṣa pratyaṅṅeti pratīcīṃ hyetena diśaṃ prājānanpratīcī hyetasya dik -

3.2.3.3.2.3.19

ūrdhvāmeva diśam / adityā prājānanniyaṃ vā aditistasmādasyāmūrdhvā oṣadhayo jāyanta ūrdhvā vanaspataya ūrdhvāṃ hyetayā diśaṃ prājānannūrdhvā hyetasyai dik -

3.2.3.3.2.3.20

śiro vai yajñasyātithyam / bāhū prāyaṇīyodayanīyāvabhito vai śiro bāhū bhavatastasmādabhita ātithyamete haviṣī bhavataḥ prāyaṇīyaścodayanīyaśca -

3.2.3.3.2.3.21

tadāhuḥ / yadeva prāyaṇīye kriyeta tadudayanīye kriyeta yadeva prāyaṇīyasya barhirbhavati tadudayanīyasya barhirbhavatīti tadapoddhṛtya nidadhāti tāṃ sthālīṃ sakṣāmakarṣāṃ pramṛjya mekṣaṇaṃ nidadhāti ya eva prāyaṇīyasyartvijo bhavanti ta udayanīyasyartvijo bhavanti tadyadetatsamānaṃ yajñe kriyate tena bāhū sadṛśau tena sarūpau -

3.2.3.3.2.3.22

tadu tathā na kuryāt / kāmamevaitadbarhiranupraharedevaṃ mekṣaṇaṃ nirṇijya sthālīṃ nidadhyādya eva prāyaṇīyasyartvijo bhavanti ta udayanīyasyartvijo bhavanti yadyu te vipretāḥ syurapyanya eva syuḥ sa yadvai samānīrdevatā yajati samānāni havīṃṣi bhavanti tenaiva bāhū sadṛśau tena sarūpau -

3.2.3.3.2.3.23

sa vai pañca prāyaṇīye devatā yajati / pañcodayanīye tasmātpañcetthādaṅgulayaḥ pañcetthāttacchamyvantaṃ bhavati na patnīḥ saṃyājayanti pūrvārdhaṃ vā anvātmano bāhū pūrvārdhamevaitadyajñasyābhisaṃskaroti tasmācchamyvantaṃ bhavati na patnīḥ saṃyājayanti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0