Shatapatha Brahmana · Chapter 14.6.8

vācaknavībrāhmaṇaṃ, akṣarabrāhmaṇaṃ vā sṛṣṭipraveśabrāhmaṇam
atha ha vācaknavyuvāca/ brāhmaṇā bhagavanto hantāhamimaṃ yājñavalkyaṃ dvau praśnau prakṣyāmi tau cenme vivakṣyati na vai jātu yuṣmākamimaṃ kaścidbrahmodyaṃ jeteti tau cenme na vivakṣyati mūrddhā'sya vipatiṣyatīti pṛccha gārgīti -

sā hovāca/ ahaṃ vai tvā yājñavalkya yathā kāśyo vā vaideho vograputra udyandhanuradhijyaṃ kṛtvā dvau bāṇavantau sapatnādhivyādhinau haste kṛtvopottiṣṭhedevamevāhaṃ tvā dvābhyāṃ praśnābhyāmupodasthāṃ tau me brūhīti pṛccha gārgīti -

sā hovāca/ yadūrdhvaṃ yājñavalkya divo yadavākpṛthivyā yadantarā dyāvāpṛthivī ime yadbhūtaṃ ca bhavacca bhaviṣyaccetyācakṣate kasmiṃstadotaṃ ca protaṃ ceti -

sa hovāca/ yadūrdhvaṃ gārgī divo yadavākpṛthivyā yadantarā dyāvāpṛthivī ime yadbhūtaṃ ca bhavacca bhaviṣyaccetyācakṣata ākāśe tadotaṃ ca protaṃ ceti -

sā hovāca/ namaste yājñavalkya yo ma etaṃ vyavoco'parasmai dhārayasveti pṛccha gārgīti -

sā hovāca/ yadūrdhvaṃ yājñavalkya divo yadavākpṛthivyā yadantarā dyāvāpṛthivī ime yadbhūtaṃ ca bhavacca bhaviṣyaccetyācakṣate kasminneva tadotaṃ ca protaṃ ceti -

sa hovāca/ yadūrdhvaṃ gārgi divo yadavākpṛthivyā yadantarā dyāvāpṛthivī ime yadbhūtaṃ ca bhavacca bhaviṣyaccetyācakṣata ākāśa eva tadotaṃ ca protaṃ ceti kasminnvākāśa otaśca protaśceti -

sa hovāca/ etadvai tadakṣaraṃ gārgi brāhmaṇā abhivadantyasthūlamanaṇvahrasvamadīrghamalohitamasnehamacchāyamatamo'vāyvanākāśamasaṅga-masparśamagandhamarasamacakṣuṣkamaśrotramavāgamano'tejaskamaprāṇamamukhamanāmāgotramajaramamaramabhayamamṛtamarajo'śabdamavivṛtamasaṃvṛtamapūrvamanaparamanantaramabāhyaṃ na tadaśnoti kaṃ cana na tadaśnoti kaścana -

etasya vā akṣarasya praśāsane gārgi dyāvāpṛthivī vidhṛte tiṣṭhata etasya vā akṣarasya praśāsane gārgi sūryācandramasau vidhṛtau tiṣṭhata etasya vā akṣarasya praśāsane gārgyahorātrāṇyardhamāsā māsā ṛtavaḥ saṃvatsarā vidhṛtāstiṣṭhantyetasya vā akṣarasya praśāsane gārgi prācyo'nyā nadyaḥ syandante śvetebhyaḥ parvatebhyaḥ pratīcyo'nyā yāṃ yāṃ ca diśametasya vā akṣarasya praśāsane gārgi dadatammanuṣyāḥ praśaṃsanti yajamānaṃ devā darvyaṃ pitaro'nvāyattāḥ -

yo vā etadakṣaramaviditvā gārgi/ asmiṃloke juhoti dadāti tapasyatyapi bahūni varṣasahasrāṇyantavānevāsya sa loko bhavati yo vā etadakṣaramaviditvā gārgyasmāllokātpraiti sa kṛpaṇo'tha ya etadakṣaraṃ gārgi viditvā'smāllokātpraiti sa
brāhmaṇaḥ -

tadvā etadakṣaraṃ gārgi/ adṛṣṭaṃ draṣṭraśrutaṃ śrotamataṃ mantravijñātaṃ vijñātṛ nānyadasti draṣṭṛ nānyadasti śrotṛ nānyadasti mantṛ nānyadasti vijñātretadvai tadakṣaraṃ gārgi yasminnākāśa otaśca protaśceti -

sā hovāca/ brāhmaṇā bhagavantastadeva bahu manyadhvaṃ yadasmānnamaskāreṇa mucyādhvai na vai jātu yuṣmākamimaṃ kaścidbrahmodyaṃ jeteti tato ha vācaknavyupararāma -