શતપથબ્રાહ્મણમ્ · અધ્યાય 14.6.8

વાચક્નવીબ્રાહ્મણં, અક્ષરબ્રાહ્મણં વા સૃષ્ટિપ્રવેશબ્રાહ્મણમ્
અથ હ વાચક્નવ્યુવાચ। બ્રાહ્મણા ભગવન્તો હન્તાહમિમં યાજ્ઞવલ્ક્યં દ્વૌ પ્રશ્નૌ પ્રક્ષ્યામિ તૌ ચેન્મે વિવક્ષ્યતિ ન વૈ જાતુ યુષ્માકમિમં કશ્ચિદ્બ્રહ્મોદ્યં જેતેતિ તૌ ચેન્મે ન વિવક્ષ્યતિ મૂર્દ્ધાઽસ્ય વિપતિષ્યતીતિ પૃચ્છ ગાર્ગીતિ -

સા હોવાચ। અહં વૈ ત્વા યાજ્ઞવલ્ક્ય યથા કાશ્યો વા વૈદેહો વોગ્રપુત્ર ઉદ્યન્ધનુરધિજ્યં કૃત્વા દ્વૌ બાણવન્તૌ સપત્નાધિવ્યાધિનૌ હસ્તે કૃત્વોપોત્તિષ્ઠેદેવમેવાહં ત્વા દ્વાભ્યાં પ્રશ્નાભ્યામુપોદસ્થાં તૌ મે બ્રૂહીતિ પૃચ્છ ગાર્ગીતિ -

સા હોવાચ। યદૂર્ધ્વં યાજ્ઞવલ્ક્ય દિવો યદવાક્પૃથિવ્યા યદન્તરા દ્યાવાપૃથિવી ઇમે યદ્ભૂતં ચ ભવચ્ચ ભવિષ્યચ્ચેત્યાચક્ષતે કસ્મિંસ્તદોતં ચ પ્રોતં ચેતિ -

સ હોવાચ। યદૂર્ધ્વં ગાર્ગી દિવો યદવાક્પૃથિવ્યા યદન્તરા દ્યાવાપૃથિવી ઇમે યદ્ભૂતં ચ ભવચ્ચ ભવિષ્યચ્ચેત્યાચક્ષત આકાશે તદોતં ચ પ્રોતં ચેતિ -

સા હોવાચ। નમસ્તે યાજ્ઞવલ્ક્ય યો મ એતં વ્યવોચોઽપરસ્મૈ ધારયસ્વેતિ પૃચ્છ ગાર્ગીતિ -

સા હોવાચ। યદૂર્ધ્વં યાજ્ઞવલ્ક્ય દિવો યદવાક્પૃથિવ્યા યદન્તરા દ્યાવાપૃથિવી ઇમે યદ્ભૂતં ચ ભવચ્ચ ભવિષ્યચ્ચેત્યાચક્ષતે કસ્મિન્નેવ તદોતં ચ પ્રોતં ચેતિ -

સ હોવાચ। યદૂર્ધ્વં ગાર્ગિ દિવો યદવાક્પૃથિવ્યા યદન્તરા દ્યાવાપૃથિવી ઇમે યદ્ભૂતં ચ ભવચ્ચ ભવિષ્યચ્ચેત્યાચક્ષત આકાશ એવ તદોતં ચ પ્રોતં ચેતિ કસ્મિન્ન્વાકાશ ઓતશ્ચ પ્રોતશ્ચેતિ -

સ હોવાચ। એતદ્વૈ તદક્ષરં ગાર્ગિ બ્રાહ્મણા અભિવદન્ત્યસ્થૂલમનણ્વહ્રસ્વમદીર્ઘમલોહિતમસ્નેહમચ્છાયમતમોઽવાય્વનાકાશમસઙ્ગ-મસ્પર્શમગન્ધમરસમચક્ષુષ્કમશ્રોત્રમવાગમનોઽતેજસ્કમપ્રાણમમુખમનામાગોત્રમજરમમરમભયમમૃતમરજોઽશબ્દમવિવૃતમસંવૃતમપૂર્વમનપરમનન્તરમબાહ્યં ન તદશ્નોતિ કં ચન ન તદશ્નોતિ કશ્ચન -

એતસ્ય વા અક્ષરસ્ય પ્રશાસને ગાર્ગિ દ્યાવાપૃથિવી વિધૃતે તિષ્ઠત એતસ્ય વા અક્ષરસ્ય પ્રશાસને ગાર્ગિ સૂર્યાચન્દ્રમસૌ વિધૃતૌ તિષ્ઠત એતસ્ય વા અક્ષરસ્ય પ્રશાસને ગાર્ગ્યહોરાત્રાણ્યર્ધમાસા માસા ઋતવઃ સંવત્સરા વિધૃતાસ્તિષ્ઠન્ત્યેતસ્ય વા અક્ષરસ્ય પ્રશાસને ગાર્ગિ પ્રાચ્યોઽન્યા નદ્યઃ સ્યન્દન્તે શ્વેતેભ્યઃ પર્વતેભ્યઃ પ્રતીચ્યોઽન્યા યાં યાં ચ દિશમેતસ્ય વા અક્ષરસ્ય પ્રશાસને ગાર્ગિ દદતમ્મનુષ્યાઃ પ્રશંસન્તિ યજમાનં દેવા દર્વ્યં પિતરોઽન્વાયત્તાઃ -

યો વા એતદક્ષરમવિદિત્વા ગાર્ગિ। અસ્મિંલોકે જુહોતિ દદાતિ તપસ્યત્યપિ બહૂનિ વર્ષસહસ્રાણ્યન્તવાનેવાસ્ય સ લોકો ભવતિ યો વા એતદક્ષરમવિદિત્વા ગાર્ગ્યસ્માલ્લોકાત્પ્રૈતિ સ કૃપણોઽથ ય એતદક્ષરં ગાર્ગિ વિદિત્વાઽસ્માલ્લોકાત્પ્રૈતિ સ
બ્રાહ્મણઃ -

તદ્વા એતદક્ષરં ગાર્ગિ। અદૃષ્ટં દ્રષ્ટ્રશ્રુતં શ્રોતમતં મન્ત્રવિજ્ઞાતં વિજ્ઞાતૃ નાન્યદસ્તિ દ્રષ્ટૃ નાન્યદસ્તિ શ્રોતૃ નાન્યદસ્તિ મન્તૃ નાન્યદસ્તિ વિજ્ઞાત્રેતદ્વૈ તદક્ષરં ગાર્ગિ યસ્મિન્નાકાશ ઓતશ્ચ પ્રોતશ્ચેતિ -

સા હોવાચ। બ્રાહ્મણા ભગવન્તસ્તદેવ બહુ મન્યધ્વં યદસ્માન્નમસ્કારેણ મુચ્યાધ્વૈ ન વૈ જાતુ યુષ્માકમિમં કશ્ચિદ્બ્રહ્મોદ્યં જેતેતિ તતો હ વાચક્નવ્યુપરરામ -