Shatapatha Brahmana · Chapter 14.6.7

uddālakabrāhmaṇaṃ, antaryāmibrāhmaṇaṃ vā sṛṣṭipraveśabrāhmaṇam
atha hainamuddālaka āruṇiḥ papraccha/ yājñavalkyeti hovāca madreṣvavasāma patañcalasya kāpyasya gṛheṣu yajñamadhīyānāstasyāsīdbhāryā gandharvagṛhītā tamapṛcchāma ko'sīti so'bravītkabandha ātharvaṇa iti -

so'bravīt/ patañcalaṃ kāpyaṃ yājñikāṃśca vettha nu tvaṃ kāpya tatsūtraṃ yasminnayaṃ ca lokaḥ paraśca lokaḥ sarvāṇi ca bhūtāni saṃdṛbdhāni bhavantīti so'bravītpatañcalaḥ kāpyo nāhaṃ tadbhagavanvedeti -

so'bravīt/ patañcalaṃ kāpyaṃ yājñikāṃśca vettha nu tvaṃ kāpya tamantaryāmiṇaṃ ya imaṃ ca lokaṃ paraṃ ca lokaṃ sarvāṇi ca bhūtānyantaro yamayatīti so'bravītpatañcalaḥ kāpyo nāhaṃ taṃ bhagavanvedeti -

so'bravīt/ patañcalaṃ kāpyaṃ yājñikāṃśca yo vai tatkāpya sūtraṃ vidyāttaṃ cāntaryāmiṇaṃ sa brahmavitsa lokavitsa devavitsa vedavitsa yajñavitsa bhūtavitsa ātmavitsa sarvaviditi tebhyo'bravīttadahaṃ veda taccettvaṃ yājñavalkya sūtramavidvāṃstaṃ cāntaryāmiṇaṃ brahmagavīrudajase mūrddhā te vipatiṣyatīti -

veda vā ahaṃ gautama tatsūtraṃ/ taṃ cāntaryāmiṇamiti yo vā idaṃ kaśca brūyādveda vedeti yathā vettha tathā brūhīti -

vāyurvai gautama tatsūtram/ vāyunā vai gautama sūtreṇāyaṃ ca lokaḥ paraśca lokaḥ sarvāṇi ca bhūtāni saṃdṛbdhāni bhavanti tasmādvai gautama puruṣampretamāhurvyasraṃsiṣatāsyāṅgānīti vāyunā hi gautama sūtreṇa saṃdṛbdhāni bhavantītyevamevaitadyājñavalkyāntaryāmiṇaṃ brūhīti -

yaḥ pṛthivyāṃ tiṣṭhan/ pṛthivyā antaro yaṃ pṛthivī na veda yasya pṛthivī śarīraṃ yaḥ pṛthivīmantaro yamayati sa ta ātmāntaryāmyamṛtaḥ -

yo'psu tiṣṭhan/ adbhyo'ntaro yamāpo na viduryasyāpaḥ śarīraṃ yo'po'ntaro yamayati sa ta ātmāntaryāmyamṛtaḥ -

yo'gnau tiṣṭhan/ agnerantaro yamagnirna veda yasyāgniḥ śarīraṃ yo'gnimantaro yamayati sa ta ātmāntaryāmyamṛtaḥ -

ya ākāśe tiṣṭhan/ ākāśādantaro yamākāśo na veda yasyākāśaḥ śarīraṃ ya ākāśamantaro yamayati sa ta ātmāntaryāmyamṛtaḥ -

yo vāyau tiṣṭhan/ vāyorantaro yaṃ vāyurna veda yasya vāyuḥ śarīraṃ yo vāyumantaro yamayati sa ta ātmāntaryāmyamṛtaḥ -

ya āditye tiṣṭhan/ ādityādantaro yamādityo na veda yasyādityaḥ śarīraṃ ya ādityamantaro yamayati sa ta ātmāntaryāmyamṛtaḥ -

yaścandratārake tiṣṭhan/ candratārakādantaro yaṃ candratārakaṃ na veda yasya candratārakaṃ śarīraṃ yaścandratārakamantaro yamayati sa ta ātmāntaryāmyamṛtaḥ -

yo dikṣu tiṣṭhan/ digbhyo'ntaro yaṃ diśo na viduryasya diśaḥ śarīraṃ yo diśo'ntaro yamayati sa ta ātmāntaryāmyamṛtaḥ -

yo vidyuti tiṣṭhan/ vidyuto'ntaro yaṃ vidyunna veda yasya vidyuccharīraṃ yo vidyutamantaro yamayati sa ta ātmāntaryāmyamṛtaḥ -

ya stanayitnau tiṣṭhan/ stanayitnorantaro yaṃ stanayitnurna veda yasya stanayitnuḥ śarīraṃ ya stanayitnumantaro yamayati sa ta ātmāntaryāmyamṛta ityadhidevatamathādhilokam -

yaḥ sarveṣu lokeṣu tiṣṭhan/ sarvebhyo lokebhyo'ntaro yaṃ sarve lokā na viduryasya sarve lokāḥ śarīraṃ yaḥ sarvāṃllokānantaro yamayati sa ta ātmāntaryāmyamṛta ityu evādhilokamathādhivedam -

yaḥ sarveṣu vedeṣu tiṣṭhan/ sarvebhyo vedebhyo'ntaro yaṃ sarve vedā na viduryasya sarve vedāḥ śarīraṃ yaḥ sarvānvedānantaro yamayati sa ta ātmāntaryāmyamṛta ityu evādhivedamathādhiyajñam -

sarveṣu yajñeṣu tiṣṭhan/ sarvebhyo yajñebhyo'ntaro yaṃ sarve yajñā na viduryasya sarve yajñāḥ śarīraṃ yaḥ sarvānyajñānantaro yamayati sa ta ātmāntaryāmyamṛta ityu evādhiyajñamathādhibhūtam -

yaḥ sarveṣu bhūteṣu tiṣṭhan/ sarvebhyo bhūtebhyo'ntaro yaṃ sarvāṇi bhūtāni na viduryasya sarvāṇi bhūtāni śarīraṃ yaḥ sarvāṇi bhūtānyantaro yamayati sa ta ātmāntaryāmyamṛta ityu evādhibhūtamathādhyātmam -

yaḥ prāṇe tiṣṭhan/ prāṇādantaro yaṃ prāṇo na veda yasya prāṇaḥ śarīraṃ yaḥ prāṇamantaro yamayati sa ta ātmāntaryāmyamṛtaḥ -

yo vāci tiṣṭhan vāco'ntaro yamvāṅna veda yasya vākśarīraṃ yo vācamantaro yamayati sa ta ātmāntaryāmyamṛtaḥ -

yaścakṣuṣi tiṣṭhan/ cakṣuṣo'ntaro yaścakṣurna veda yasya cakṣuḥ śarīraṃ yaścakṣurantaro yamayati sa ta ātmāntaryāmyamṛtaḥ/ -

yaḥ śrotre tiṣṭhan/ śrotrādantaro yaṃ śrotranna veda yasya śrotraṃ śarīraṃ yaḥ śrotramantaro yamayati sa ta ātmāntaryāmyamṛtaḥ -

yo manasi tiṣṭhan/ manaso'ntaro yammano na veda yasya manaḥ śarīraṃ yo manontaro yamayati sa ta ātmāntaryāmyamṛtaḥ -

yastvaci tiṣṭhan/ tvaco'ntaro yantvaṅna veda yasya tvakcharīraṃ yastvacamantaro yamayati sa ta ātmāntaryāmyamṛtaḥ -

yastejasi tiṣṭhan/ tejaso'ntaro yantejo na veda yasya tejaḥ śarīraṃ yastejontaro yamayati sa ta ātmāntaryāmyamṛtaḥ -

yastamasi tiṣṭhan/ tamaso'ntaro yantamo na veda yasya tamaḥ śarīraṃ yastamontaro yamayati sa ta ātmāntaryāmyamṛtaḥ -

yo retasi tiṣṭhan/ retaso'ntaro yaṃ reto na veda yasya retaḥ śarīraṃ yo retontaro yamayati sa ta ātmāntaryāmyamṛtaḥ -

ya ātmani tiṣṭhan ātmano'ntaro yamātmā na veda yasyātmā śarīraṃ ya ātmānamantaro yamayati sa ta ātmāntaryāmyamṛtaḥ -

adṛṣṭo draṣṭā/ aśrutaḥ śrotā amato mantā'vijñāto vijñātā nānyo'sti draṣṭānānyo'sti śrotā nānyo'sti mantā nānyo'sti vijñātaiṣa ta ātmāntaryāmyamṛto'to'nyadārtaṃ tato hoddālaka āruṇirupararāma -