Shatapatha Brahmana · Chapter 14.5.3

mūrtāmūrtabrāhmaṇam
dve vāva brahmaṇo rūpe/ mūrtaṃ caivāmūrtaṃ ca martyaṃ cāmṛtaṃ ca sthitaṃ ca yacca sacca tyacca -

tadetanmūrtam/ yadanyadvāyoścāntarikṣāccaitanmartyametatsthitametatsat -

tasyaitasya mūrtasyaitasya martyasyaitasya sthitasyaitasya sata eṣa raso ya eṣa tapati sato hyeṣa rasaḥ -

athāmūrttam/ vāyuścāntarikṣaṃ caitadamṛtametadyadetattyam -

tasyaitasyāmūrttasya/ etasyāmṛtasyaitasya yata etasya tyasyaiṣa raso ya eṣa etasminmaṇḍale puruṣastyasya hyeṣa rasa ityadhidevatam -

athādhyātmam/ idameva mūrttaṃ yadanyatprāṇācca yaścāyamantarātmannākāśa etanmartyametatsthitametatsat -

tasyaitasya mūrttasya/ etasya martyasyaitasya sthitasyaitasya sata eṣa raso yaccakṣuḥ sato hyeṣa rasaḥ -

athāmūrttam/ prāṇaśca yaścāyamantarātmannākāśa etadamṛtametadyadetattyam -

tasyaitasyāmūrttasya/ etasyāmṛtasyaitasya yata etasya tyasyaiṣa raso yo'yaṃ dakṣiṇe'kṣanpuruṣastyasya hyeṣa rasaḥ -

tasya haitasya puruṣasya rūpam/ yathā māhārajanaṃ vāso yathā pāṇḍvāvikaṃ yathendragopo yathāgnyarciryathā puṇḍarīkaṃ yathā sakṛdvidyuttaṃ sakṛdvidyutteva ha vā asya śrīrbhavati ya evaṃ veda -

athāta ādeśo neti neti na hyetasmāditi netyanyatparamastyatha nāmadheyaṃ satyasya satyamiti prāṇā vai satyaṃ teṣāmeṣa satyam -