શતપથબ્રાહ્મણમ્ · અધ્યાય 14.5.3

મૂર્તામૂર્તબ્રાહ્મણમ્
દ્વે વાવ બ્રહ્મણો રૂપે। મૂર્તં ચૈવામૂર્તં ચ મર્ત્યં ચામૃતં ચ સ્થિતં ચ યચ્ચ સચ્ચ ત્યચ્ચ -

તદેતન્મૂર્તમ્। યદન્યદ્વાયોશ્ચાન્તરિક્ષાચ્ચૈતન્મર્ત્યમેતત્સ્થિતમેતત્સત્ -

તસ્યૈતસ્ય મૂર્તસ્યૈતસ્ય મર્ત્યસ્યૈતસ્ય સ્થિતસ્યૈતસ્ય સત એષ રસો ય એષ તપતિ સતો હ્યેષ રસઃ -

અથામૂર્ત્તમ્। વાયુશ્ચાન્તરિક્ષં ચૈતદમૃતમેતદ્યદેતત્ત્યમ્ -

તસ્યૈતસ્યામૂર્ત્તસ્ય। એતસ્યામૃતસ્યૈતસ્ય યત એતસ્ય ત્યસ્યૈષ રસો ય એષ એતસ્મિન્મણ્ડલે પુરુષસ્ત્યસ્ય હ્યેષ રસ ઇત્યધિદેવતમ્ -

અથાધ્યાત્મમ્। ઇદમેવ મૂર્ત્તં યદન્યત્પ્રાણાચ્ચ યશ્ચાયમન્તરાત્મન્નાકાશ એતન્મર્ત્યમેતત્સ્થિતમેતત્સત્ -

તસ્યૈતસ્ય મૂર્ત્તસ્ય। એતસ્ય મર્ત્યસ્યૈતસ્ય સ્થિતસ્યૈતસ્ય સત એષ રસો યચ્ચક્ષુઃ સતો હ્યેષ રસઃ -

અથામૂર્ત્તમ્। પ્રાણશ્ચ યશ્ચાયમન્તરાત્મન્નાકાશ એતદમૃતમેતદ્યદેતત્ત્યમ્ -

તસ્યૈતસ્યામૂર્ત્તસ્ય। એતસ્યામૃતસ્યૈતસ્ય યત એતસ્ય ત્યસ્યૈષ રસો યોઽયં દક્ષિણેઽક્ષન્પુરુષસ્ત્યસ્ય હ્યેષ રસઃ -

તસ્ય હૈતસ્ય પુરુષસ્ય રૂપમ્। યથા માહારજનં વાસો યથા પાણ્ડ્વાવિકં યથેન્દ્રગોપો યથાગ્ન્યર્ચિર્યથા પુણ્ડરીકં યથા સકૃદ્વિદ્યુત્તં સકૃદ્વિદ્યુત્તેવ હ વા અસ્ય શ્રીર્ભવતિ ય એવં વેદ -

અથાત આદેશો નેતિ નેતિ ન હ્યેતસ્માદિતિ નેત્યન્યત્પરમસ્ત્યથ નામધેયં સત્યસ્ય સત્યમિતિ પ્રાણા વૈ સત્યં તેષામેષ સત્યમ્ -