Shatapatha Brahmana · Chapter 14.5.2

sarvānnabrāhmaṇaṃ vā śiśubrāhmaṇam
yo ha vai śiśuṃ sādhānaṃ sapratyādhānaṃ sasthūṇaṃ sadāmaṃ veda sapta ha dviṣato bhrātṛvyānavaruṇaddhi -

ayaṃ vāva śiśuryo'yaṃ madhyamaḥ prāṇaḥ tasyedamevādhānamidaṃ pratyādhānamprāṇa sthūṇānnaṃ dāma tametāḥ saptākṣitaya upatiṣṭhante -

tadyā imā akṣaṃ lohinyo rājayaḥ/ tābhirenaṃ rudro'nvāyatto'tha yā akṣannāpastābhiḥ parjanyo yā kanīnakā tayā''dityo yacchuklaṃ tenāgniryatkṛṣṇaṃ tenendro'dharayainaṃ vartanyā pṛthivyanvāyattā dyauruttarayā nāsyānnaṃ kṣīyate ya evaṃ veda -

tadeṣa śloko bhavati/ arvāgbilaścamasa ūrdhvabudhnastasminyaśo nihitaṃ viśvarūpam/ tasyāsata ṛṣayaḥ sapta tīre vāgaṣṭamī brahmaṇā saṃvidāneti -

arvāgbilaścamasa ūrdhvabudhna iti/ idaṃ tacchira eṣa hyarvāgbilaścamasa'ūrdhvabudhnastasminyaśo nihitaṃ viśvarūpamiti prāṇā vai yaśo nihitaṃ viśvarūpamprāṇānetadāha tasyāsata ṛṣayaḥ sapta tīra iti prāṇā vā ṛṣayaḥ prāṇānetadāha vāgaṣṭamī brahmaṇā saṃvidāneti vāgghyaṣṭamī brahmaṇā saṃvitte -

imāveva gotamabharadvājau/ ayameva gotamo'yaṃ bharadvāja imāveva viśvāmitrajamadagnī ayameva viśvāmitro'yaṃ jamadagnirimāveva vasiṣṭhakaśyapāvayameva vasiṣṭho'yaṃ kaśyapo vāgevātrirvācā hyannamadyate'ttirha vai nāmaitadyadatririti sarvasyāttā bhavati sarvamasyānnambhavati ya evaṃ veda -