શતપથબ્રાહ્મણમ્ · અધ્યાય 14.5.2

સર્વાન્નબ્રાહ્મણં વા શિશુબ્રાહ્મણમ્
યો હ વૈ શિશું સાધાનં સપ્રત્યાધાનં સસ્થૂણં સદામં વેદ સપ્ત હ દ્વિષતો ભ્રાતૃવ્યાનવરુણદ્ધિ -

અયં વાવ શિશુર્યોઽયં મધ્યમઃ પ્રાણઃ તસ્યેદમેવાધાનમિદં પ્રત્યાધાનમ્પ્રાણ સ્થૂણાન્નં દામ તમેતાઃ સપ્તાક્ષિતય ઉપતિષ્ઠન્તે -

તદ્યા ઇમા અક્ષં લોહિન્યો રાજયઃ। તાભિરેનં રુદ્રોઽન્વાયત્તોઽથ યા અક્ષન્નાપસ્તાભિઃ પર્જન્યો યા કનીનકા તયાઽઽદિત્યો યચ્છુક્લં તેનાગ્નિર્યત્કૃષ્ણં તેનેન્દ્રોઽધરયૈનં વર્તન્યા પૃથિવ્યન્વાયત્તા દ્યૌરુત્તરયા નાસ્યાન્નં ક્ષીયતે ય એવં વેદ -

તદેષ શ્લોકો ભવતિ। અર્વાગ્બિલશ્ચમસ ઊર્ધ્વબુધ્નસ્તસ્મિન્યશો નિહિતં વિશ્વરૂપમ્। તસ્યાસત ઋષયઃ સપ્ત તીરે વાગષ્ટમી બ્રહ્મણા સંવિદાનેતિ -

અર્વાગ્બિલશ્ચમસ ઊર્ધ્વબુધ્ન ઇતિ। ઇદં તચ્છિર એષ હ્યર્વાગ્બિલશ્ચમસઽઊર્ધ્વબુધ્નસ્તસ્મિન્યશો નિહિતં વિશ્વરૂપમિતિ પ્રાણા વૈ યશો નિહિતં વિશ્વરૂપમ્પ્રાણાનેતદાહ તસ્યાસત ઋષયઃ સપ્ત તીર ઇતિ પ્રાણા વા ઋષયઃ પ્રાણાનેતદાહ વાગષ્ટમી બ્રહ્મણા સંવિદાનેતિ વાગ્ઘ્યષ્ટમી બ્રહ્મણા સંવિત્તે -

ઇમાવેવ ગોતમભરદ્વાજૌ। અયમેવ ગોતમોઽયં ભરદ્વાજ ઇમાવેવ વિશ્વામિત્રજમદગ્ની અયમેવ વિશ્વામિત્રોઽયં જમદગ્નિરિમાવેવ વસિષ્ઠકશ્યપાવયમેવ વસિષ્ઠોઽયં કશ્યપો વાગેવાત્રિર્વાચા હ્યન્નમદ્યતેઽત્તિર્હ વૈ નામૈતદ્યદત્રિરિતિ સર્વસ્યાત્તા ભવતિ સર્વમસ્યાન્નમ્ભવતિ ય એવં વેદ -