Shatapatha Brahmana · Chapter 14.2.1

gavājapayo'vasecanaṃ brāhmaṇam
athāto rohiṇau juhoti/ ahaḥ ketunā juṣatāṃ sujyotirjyotiṣā svāhetyubhāvetena yajuṣā prātā rātriḥ ketunā juṣatāṃ sujyotirjyotiṣā svāhetyubhāvetena yajuṣā sāyam -

tadyadrohiṇau juhoti/ agniśca ha vā ādityaśca rauhiṇāvetābhyāṃ hi devatābhyāṃ yajamānāḥ svargaṃ lokaṃ rohanti -

atho ahorātre vai rauhiṇau/ ādityaḥ pravargyo'muṃ tadādityamahorātrābhyāmparigṛhṇāti tasmādeṣo'horātrābhyāṃ parigṛhītaḥ -

atho imau vai lokau rauhiṇau/ ādityaḥ pravargyo'muṃ tadādityamābhyāṃ lokābhyāmparigṛhṇāti tasmādeṣa ābhyāṃ lokābhyāṃ parigṛhītaḥ -

atho cakṣuṣī vai rauhiṇau/ śiraḥ pravargyaḥ śīrṣaṃstaccakṣurdadhāti -

atha rajjumādatte/ devebhyastvā savituḥ prasave'śvinorbāhubhyāṃ pūṣṇo hastābhyāmādade rāsnāsītyasāveva bandhuḥ -

atha gāmāhvayati/ jaghanena gārhapatyaṃ yanniḍa ehyadita ehi sarasvatyehītīḍā hi gauraditirhi gauḥ sarasvatī hi gauratho tairāhvayati nāmnā'sāvehyasāvehīti triḥ

tāmāgatāmabhidadhāti/ adityai rāsnāsīndrāṇyā uṣṇīṣa itīndrāṇī ha vā indrasya priyā patnī tasyā uṣṇīṣo viśvarūpatamaḥ so'sīti tadāha tamevainametatkaroti -

atha vatsamupārjati/ pūṣā'sītyayaṃ vai pūṣā yo'yaṃ pavata eṣa hīdaṃ sarvampuṣyatyeṣa u pravargyastadetamevaitatprīṇāti tasmādāha pūṣā'sīti -

athonnayati/ gharmāya dīṣvetyeṣa vā atra gharmo raso bhavati yameṣā pinvate tasmai dayasvetyevaitadāha -

atha pinvane pinvayati/ aśvibhyāṃ pinvasvetyaśvināvevaitadāhāśvinau vā etadyajñasya śiraḥ pratyadhattāṃ tāvevaitatprīṇāti tasmādāhāśvibhyāṃ pinvasveti

sarasvatyai pinvasveti/ vāgvai sarasvatī vācā vā etadaśvinau yajñasya śiraḥ pratyadhattāṃ tāvevaitatprīṇāti tasmādāha sarasvatyai pinvasveti -

indrāya pinvasveti/ indro vai yajñasya devatā sā yaiva yajñasya devatā tayaivaitadaśvinau yajñasya śiraḥ pratyadhattāṃ tāvevaitatprīṇāti tasmādāhendrāya pinvasveti -

atha vipruṣo'bhimantrayate/ svāhendravatsvāhendravaditīndro vai yajñasya devatā sā yaiva yajñasya devatā tāmevaitatprīṇāti tasmādāha svāhendravatsvāhendravaditi triṣkṛtva āha trivṛddhi yajño'varaṃ svāhākāraṃ karoti parāṃ devatāmasāveva bandhuḥ -

athāsyai stanamabhipadyate/ yaste stanaḥ śaśayo yo mayobhūriti yaste stano nihito
guhāyāmityevaitadāha yo ratnadhā vasuvidyaḥ sudatra iti yo dhanānāṃ dātā vasuvitpaṇāyya ityevaitadāha yena viśvā puṣyasi vāryāṇīti yena sarvāndevāntsarvāṇi bhūtāni bibharṣītyevaitadāha sarasvati tamiha dhātave'kariti vāgvai sarasvatī saiṣā gharmadughā yajño vai vāgyajñamasmabhyaṃ prayaccha yena devānprīṇāmetyevaitadāhātha gārhapatyasyārdhamaityurvantarikṣamanvemītyasāveva bandhuḥ -

atha śaphāvādatte/ gāyatraṃ cchando'si traiṣṭubhaṃ cchando'sīti gāyatreṇa caivaināvetattraiṣṭubhena ca cchandasādatte dyāvāpṛthivībhyāṃ tvā parigṛhṇāmītīme vai dyāvāpṛthivī parīśāsāvādityaḥ pravargyo'muṃ tadādityamābhyāṃ dyāvāpṛthivībhyāṃ parigṛhṇātyatha mauñjena vedenopamārṣṭyasāveva bandhuḥ -

athopayamanyopagṛhṇāti/ antarikṣeṇopayacchāmītyantarikṣaṃ vā upayamanyantarikṣeṇa hīdaṃ sarvamupayatamatho udaraṃ vā upayamanyudareṇa hīdaṃ sarvamannādyamupayataṃ tasmādāhāntarikṣeṇopayacchāmīti -

athājākṣīramānayati/ tapto vā eṣa śuśucāno bhavati tamevaitacchamayati tasmiñchānte
gokṣīramānayati -

indrāśvineti/ indro vai yajñasya devatā sā yaiva yajñasya devatā tāmevaitatprīṇātyaśvinetyaśvināvevaitadāhāśvinau vā etadyajñasya śiraḥ pratyadhattāṃ tāvevaitatprīṇāti tasmādāhendrāśvineti -

madhunaḥ sāraghasyeti/ etadvai madhu sāraghaṃ gharmaṃ pāteti rasampātetyevaitadāha vasava ityete vai vasava ete hīdaṃ sarvaṃ vāsayante yajata vāḍiti tadyathā vaṣaṭkṛtaṃ hutamevamasyaitadbhavati -

svāhā sūryasya raśmaye vṛṣṭivanaya iti/ sūryasya ha vā eko raśmirvṛṣṭivanirnāma yenemāḥ sarvāḥ prajā bibharti tamevaitatprīṇāti tasmādāha svāhā sūryasya raśmaye vṛṣṭivanaya ityavaraṃ svāhākāraṃ karoti parāṃ devatāmasāveva bandhuḥ -

athaitadvai/ āyuretajjyotiḥ praviśati ya etamanu vā brūte bhakṣayati vā tasya vratacaryā yā sṛṣṭau -