Shatapatha Brahmana · Chapter 14.1.4

pravargye'vakāśopasthānaṃ brāhmaṇam
sa yadaitadadhvaryuḥ upottiṣṭhannāha rucito gharma iti/ tadupotthāyāvakāśairupatiṣṭhante prāṇā vā avakāśāḥ prāṇānevāsminnetaddadhāti ṣaḍupatiṣṭhante ṣaḍvā ime śīrṣanprāṇāstānevāsminnetaddadhāti -

garbho devānāmiti/ eṣa vai garbho devānāṃ ya eṣa tapatyeṣa hīdaṃ sarvaṃ gṛhṇātyetenedaṃ sarvaṃ gṛbhītameṣa u pravargyastadetamevaitatprīṇāti tasmādāha garbho devānāmiti -

pitā matīnāmiti/ pitā hyeṣa matīnāṃ patiḥ prajānāmiti patirhyeṣa prajānām -

saṃ devo devena savitrā gateti/ saṃ hi devo devena savitrā gata/ saṃ sūryeṇa rocata iti saṃ hi sūryeṇa rocate -

samagniragnināgateti/ saṃ hyagniragnināgata saṃ daivena savitreti saṃ hi daivena savitrā gata saṃ sūryeṇārociṣṭeti saṃ hi sūryeṇārociṣṭa -

svāhā samagnistapasāgateti/ saṃ hyagnistapasā gatā'varaṃ svāhākāraṃ karoti parāṃ devatāmasāveva bandhuḥ saṃ daivyena savitreti saṃ hi daivyena savitrā gata saṃ sūryeṇārūrucateti saṃ hi sūryeṇārūrucata -

te vā ete trayo'vakāśā bhavanti trayo vai prāṇāḥ prāṇa udāno vyānastenaivāsminnetaddadhāti -

dhartā divo vibhāti tapasaspṛthivyāmiti/ dhartā hyeṣa divo vibhāti tapasaspṛthivyāṃ dhartā devo devānāmamartyastapojā iti dhartā hyeṣa devo devānāmamartyastapojā vācamasme niyaccha devāyuvamiti yajño vai vāgyajñamasmabhyaṃ prayaccha yena devānprīṇāmetyevaitadāha -

apaśyaṃ gopāmanipadyamānamiti/ eṣa vai gopā ya eṣa tapatyeṣa hīdaṃ sarvaṃ gopāyatyatho na nipadyate tasmādāhāpaśyaṃ gopāmanipadyamānamiti -

ā ca parā ca pathibhiścarantamiti/ ā ca hyeṣa parā ca devaiḥ pathibhiścarati sa sadhrīcīḥ sa viṣūcīrvasāna iti sadhrīcīśca hyeṣa viṣūcīśca diśo vaste'tho raśmīnāvarīvartti bhuvaneṣvantariti punaḥ punarhyeṣa eṣu lokeṣu varīvartyamānaścarati -

viśvāsāṃ bhuvāṃ pate/ viśvasya manasaspate viśvasya vacasaspate sarvasya vacasaspata ityetasya sarvasya pata ityetaddevaśruttvaṃ deva dharma devo devānpāhīti nātra tirohitamivāsti -

atra prāvīranu vāṃ devavītaya iti/ aśvināvevaitadāhāśvinau vā etadyajñasya śiraḥ pratyadhattāṃ tāvevaitatprīṇāti tasmādāhātra prāvīranu vāṃ devavītaya iti -

madhu mādhvībhyāṃ madhu mādhūcībhyāmiti/ dadhyaṅha vā ābhyāmātharvaṇo madhu nāma brāhmaṇamuvāca tadenayoḥ priyaṃ dhāma tadevainayoretenopagacchati tasmādāha madhu mādhvībhyāṃ madhu mādhūcībhyāmiti -

hṛde tvā manase tvā dive tvā sūryāya tvā/ ūrdhvo adhvaraṃ divi deveṣu dhehīti nātra tirohitamivāsti -

pitā no'si pitā no bodhīti/ eṣa vai pitā ya eṣa tapatyeṣa u pravargyastadetamevaitatprīṇāti tasmādāha pitā no'si pitā no bodhīti namaste astu mā mā hiṃsīrityāśiṣamevaitadāśāste -

atha patnyai śiro'pāvṛtya/ mahāvīramīkṣamāṇāṃ vācayati tvaṣṭṛmantastvā sapemeti vṛṣā vai pravargyo yoṣā patnī mithunamevaitatprajananaṃ kriyate -

athaitadvai/ āyuretjjyotiḥ praviśati ya e'tamanu vā brūte bhakṣayati vā tasya vratacaryā yā sṛṣṭau -