Shatapatha Brahmana · Chapter 14.1.2

mahāvīrādipravargyapātrasaṃbharaṇabrāhmaṇam
sa vai sambhārāntsambharati/ sa yadvā enānitthā cetthā ca sambharati tatsambhārāṇāṃ sambhāratvaṃ sa vai yatra yatra yajñasya nyaktaṃ tatastataḥ sambharati -

kṛṣṇājine sambharati/ yajño vai kṛṣṇajinaṃ yajña evainametatsambharati lomataśchandāṃsi vai lomāni chandaḥsvevainametatsambharatyuttarata udīcī hi manuṣyāṇāṃ dikprācīnagrīve taddhi devatrā -

abhryā/ vajro vā abhrirvīryaṃ vai vajro vīryeṇaivainametatsamardhayati kṛtsnaṃ karoti -

audumbarī bhavati/ ūrgvai rasa udumbara ūrjaivainametadrasena samardhayati kṛtsnaṃ karoti -

atho vaikaṅkatī/ prajāpatiryāṃ prathamāmāhutimajuhotsa hutvā yatra nyamṛṣṭa tato vikaṅkataḥ samabhavadyajño vā āhutiryajño vikaṅkato yajñenaivainametatsamardhayati kṛtsnaṃ karoti -

aratnimātrī bhavati/ bāhurvā aratnirbāhuno vai vīryaṃ kriyate vīryasammitaiva tadbhavati vīryeṇaivainametatsamardhayati kṛtsnaṃ karoti -

tāmādatte/ devasya tvā savituḥ prasave'śvinorbāhubhyāṃ pūṣṇo hastābhyāmādade nārirasītyasāveva bandhuḥ -

tāṃ savye pāṇau kṛtvā/ dakṣiṇenābhimṛśya japati yuñjate mana uta yuñjate dhiyo viprā viprasya bṛhato vipaścitaḥ/ vi hotrā dadhe vayunāvideka inmahī devasya savituḥ pariṣṭutirityasāveva bandhuḥ -

atha mṛtpiṇḍaṃ parigṛhṇāti/ abhryā ca dakṣiṇato hastena ca hastenaivottarato devī dyāvāpṛthivī iti yajñasya śīrṣacchinnasya raso vyakṣaratsa ime dyāvāpṛthivī agacchadyanmṛdiyaṃ tadyadāpo'sau tanmṛdaścāpāṃ ca mahāvīrāḥ kṛtā bhavanti tenaivainametadrasena samardhayati kṛtsnaṃ karoti tasmādāha devī dyāvāpṛthivī iti makhasya vāmadya śiro rādhyāsamiti yajño vai makho yajñasya vāmadya śiro rādhyāsamityevaitadāha devayajane pṛthivyā iti devayajane hi pṛthivyai sambharati makhāya tvā makhasya tvā śīrṣṇa iti yajño vai makho yajñāya tvā yajñasya tvā śīrṣṇa ityevaitadāha -

atha valmīkavapām/ devyo vamrya ityetā vā etadakurvata yathāyathaitadyajñasyaśiro'cchidyata tābhirevainametatsamardhayati kṛtsnaṃ karoti bhūtasya prathamajā itīyaṃ vai pṛthivī bhūtasya prathamajā tadanayaivainametatsamardhayati kṛtsnaṃ karoti makhasya vo'dya śiro rādhyāsaṃ devayajane pṛthivyā makhāya tvā makhasya tvā śīrṣṇa ityasāveva bandhuḥ -

atha varāhavihatam/ iyatyagra āsīditīyatī ha vā iyamagre pṛthivyāsa prādeśamātrī tāmemūṣa iti varāha ujjaghāna so'syāḥ patiḥ prajāpatistenaivainametanmithunena priyeṇa dhāmnā samardhayati kṛtsnaṃ karoti makhasya te'dya śiro rādhyāsaṃ devayajane pṛthivyā makhāya tvā makhasya tvā śīrṣṇa ityasāveva bandhuḥ -

athādārān/ indrasyauja stheti yatra vā enamindra ojasā paryagṛhṇāttadasya parigṛhītasya raso vyakṣaratsa pūyannivāśeta so'bravīdādīryeva bata ma eṣa raso'stauṣīditi tasmādādārā atha yatpūyannivāśeta tasmātpūtīkāstasmādagnāvāhutirivābhyāhitā jvalanti tasmādu surabhayo yajñasya hi rasātsambhūtā atha yadenaṃ tadindra ojasā paryagṛhṇāttasmādāhendrasyauja stheti makhasya vo'dya śiro rādhyāsaṃ devayajane pṛthivyā makhāya tvā makhasya tvā śīrṣṇa ityasāveva bandhuḥ -

athājākṣīram/ yajñasya śīrṣacchinnasya śugudakrāmattato'jāsamabhavattayaivainametacchucā samardhayati kṛtsnaṃ karoti makhāya tvā makhasya tvā śīrṣṇa ityasāveva bandhuḥ -

tānvā etānpañca sambhārāntsambharati pāṅkto yajñaḥ pāṅktaḥ paśuḥ pañcartavaḥ samvatsarasya samvatsara eṣa ya eṣa tapatyeṣa u pravargyastadetamevaitatprīṇāti tāntsambhṛtānabhimṛśati makhāya tvā makhasya tvā śīrṣṇa ityasāveva bandhuḥ -

athottarataḥ pariśritaṃ bhavati/ tadabhiprayanto japanti praitu brahmaṇaspatirityeṣa vai brahmaṇaspatirya eṣa tapatyeṣa u pravargyastadetamevaitatprīṇāti tasmādāha praitu brahmaṇaspatiriti pra devyetu sūnṛteti devī hyeṣā sūnṛtā'cchā vīraṃ naryaṃ paṅktirādhasamityupastautyevainametanmahayatyeva devā yajñaṃ nayantu na iti sarvānevāsmā etaddevānabhigoptṝnkaroti -

pariśritaṃ bhavati/ etadvai devā abibhayuryadvai na imamiha rakṣāṃsi nāṣṭrā na hanyuriti tasmā etāṃ puraṃ paryaśrayaṃstathaivāsmā ayametāṃ puraṃ pariśrayati -

atha khare sādayati/ makhāya tvā makhasya tvā śīrṣṇa ityasāveva bandhuratha mṛtpiṇḍamupādāya mahāvīraṃ karoti makhāya tvā makhasya tvā śīrṣṇa ityasāveva bandhuḥ prādeśamātraṃ prādeśamātramiva hi śiro madhye saṅgṛhītaṃ madhye saṅgṛhītamiva hi śiro'thāsyopariṣṭāttryaṅgulaṃ mukhamunnayati nāsikāmevāsminnetaddadhāti taṃ niṣṭhitamabhimṛśati makhasya śiro'sīti makhasya hyetatsaumyasya śira evamitarau tūṣṇīṃ pinvane tūṣṇīṃ rauhiṇakapāle -

prajāpatirvā eṣa yajño bhavati/ ubhayaṃ vā etatprajāpatirniruktaścāniruktaśca parimitaścāparimitaśca tadyadyajuṣā karoti yadevāsya niruktaṃ parimitaṃ rūpaṃ tadasya tena saṃskarotyatha yattūṣṇīṃ yadevāsyāniruktamaparimitaṃ rūpaṃ tadasya tena saṃskaroti sa ha vā etaṃ sarvaṃ kṛtsnaṃ prajāpatiṃ saṃskaroti ya evamvidvānetadevaṃ karotyathopaśayāyai piṇḍaṃ pariśinaṣṭi prāyaścittibhyaḥ -

atha gavedhukābhirhinvati/ yajñasya śīrṣacchinnasya raso vyakṣarattata etā oṣadhayo jajñire tenaivainametadrasena samardhayati kṛtsnaṃ karoti makhāya tvā makhasya tvā śīrṣṇa ityasāveva bandhurevamitarau tūṣṇīṃ pinvane tūṣṇīṃ rauhiṇakapāle -

athaināndhūpayati/ aśvasya tvā vṛṣṇaḥ śaknā dhūpayāmīti vṛṣā vā aśvo vīryaṃ vai vṛṣā vīryeṇaivainametatsamardhayati kṛtsnaṃ karoti devayajane pṛthivyā makhāya tvā makhasya tvā śīrṣṇa ityasāveva bandhurevamitarau tūṣṇīṃ pinvane tūṣṇīṃ rauhiṇakapāle -

athaināñchrapayati/ śṛtaṃ hi devānāmiṣṭkābhiḥ śrapayatyetā vā etadakurvata yathāyathaitadyajñasya śiro'cchidyata tābhirevainametatsamardhayati kṛtsnaṃ karoti tadu yenaiva suśṛtāḥ syustena śrapayedatha pacanamavadhāya mahāvīramavadadhāti makhāya tvā makhasya tvā śīrṣṇa ityasāveva bandhurevamitarau tūṣṇīṃ pinvane tūṣṇīṃ rauhiṇakapāle tāndivaivopavapeddivodvapedaharhi devānām -

sa udvapati/ ṛjave tvetyasau vai loka ṛjuḥ satyaṃ hyṛjuḥ satyameṣa ya eṣa tapatyeṣa u prathamaḥ pravargyastadetamevaitatprīṇāti tasmādāharjave tveti -

sādhave tveti/ ayaṃ vai sādhuryo'yaṃ pavata eṣa hīmāṃllokāntsiddho'nupavata eṣa u dvitīyaḥ pravargyastadetamevaitatprīṇāti tasmādāha sādhave tveti -

sukṣityai tveti/ ayaṃ vai lokaḥ sukṣitirasminhi loke sarvāṇi bhūtāni kṣiyantyatho agnirvai sukṣitiragnirhyevāsmiṃlloke sarvāṇi bhūtāni kṣiyatyeṣa u tṛtīyaḥ pravargyastadetamevaitatprīṇāti tasmādāha sukṣityai tveti tūṣṇīṃ pinvane tūṣṇīṃ rauhiṇakapāle -

athainānācchṛṇatti/ ajāyai payasā makhāya tvā makhasya tvā śīrṣṇa ityasāveva bandhurevamitarau tūṣṇīṃ pinvane tūṣṇīṃ rauhiṇakapāle -

athaitadvai/ āyuretajjyotiḥ praviśati ya etamanu vā brūte bhakṣayati vā tasya vratacaryā yā sṛṣṭau -