Shatapatha Brahmana · Chapter 14.1.1

pravargyasṛṣṭipratipādakaṃ brāhmaṇam
devā ha vai sattraṃ niṣeduḥ/ agnirindraḥ somo makho viṣṇurviśve devā anyatraivāśvibhyām -

teṣāṃ kurukṣetraṃ devayajanamāsa tasmādāhuḥ kurukṣetraṃ devānāṃ devayajanamiti tasmādyatra kva ca kurukṣetrasya nigacchati tadeva manyata idaṃ devayajanamiti taddhi devānāṃ devayajanam-

ta āsata/ śriyaṃ gacchema yaśaḥ syāmānnādāḥ syāmeti tatho eveme sattramāsate śriyaṃ gacchema yaśaḥ syāmānnādāḥ syāmeti-

te hocuḥ yo naḥ śrameṇa tapasā śraddhayā yajñenāhutibhiryajñasyodṛcampūrvo'vagacchātsa naḥ śreṣṭho'sattadu naḥ sarveṣāṃ saheti tatheti -

tadviṣṇuḥ prathamaḥ prāpa sa devānāṃ śreṣṭho'bhavattasmādāhurviṣṇurdevānāṃ śreṣṭha iti -

sa yaḥ sa viṣṇuryajñaḥ saḥ/ sa yaḥ sa yajño'sau sa ādityastaddhedaṃ yaśo viṣṇurna śaśāka saṃyantuṃ tadidamapyetarhi naiva sarva iva yaśaḥ śaknoti saṃyantum -

sa tisṛdhanvamādāyāpacakrāma/ sa dhanurārtnyā śira upastabhya tasthau taṃ devā anabhidhṛṣṇuvantaḥ samantaṃ pariṇyaviśanta -

tā ha vamrya ūcuḥ/ imā vai vamryo yadupadīkā yo'sya jyāmapyadyātkimasmai prayacchetetyannādyamasmai prayacchemāpi dhanvannapo'dhigacchettathāsmai sarvamannādyaṃ prayacchemeti tatheti -

tasyopaparāsṛtya/ jyāmapi jakṣustasyāṃ cchinnāyāṃ dhanurārtnyau viṣphurantyau viṣṇoḥ śiraḥ pracicchidatuḥ -

tadghṛṅṅiti papāta/ tatpatitvā'sāvādityo'bhavadathetaraḥ prāṅeva prāvṛjyata tadyadghṛṅṅityapatattasmādgharmo'tha yatprāvṛjyata tasmātpravargyaḥ -

te devā abruvan/ mahānbata no vīro'pādīti tasmānmahāvīrastasya yo raso vyakṣarattaṃ pā(pa?)ṇibhiḥ sammamṛjustasmātsammrāṭ -

taṃ devā abhyasṛjyanta/ yathā vittiṃ vetsyamānā evaṃ tamindraḥ prathamaḥ prāpa tamanvaṅgamanu nyapadyata taṃ paryagṛhṇāttaṃ parigṛhyedaṃ yaśo'bhavadyadidamindro yaśo yaśo ha bhavati ya evaṃ veda -

sa u eva makhaḥ sa viṣṇuḥ/ tata indro makhavānabhavanmakhavānha vai tammaghavānityācakṣate paro'kṣaṃ paro'kṣakāmā hi devāḥ -

tābhyo vamrībhyo'nnādyaṃ prāyacchan/ āpo vai sarvamannaṃ tābhirhīdamabhiknūyamivādanti yadidaṃ kiñcādanti -

athemaṃ viṣṇuṃ yajñaṃ tredhā vyabhajanta/ vasavaḥ prātaḥsavanaṃ rudrā mādhyandinaṃ savanamādityāstṛtīyasavanam -

agniḥ prātaḥsavanam/ indro mādhyandinaṃ savanaṃ viśve devāstṛtīyasavanam -

gāyatrī prātaḥsavanam/ triṣṭummādhyandinaṃ savanaṃ jagatī tṛtīyasavanaṃ tenāpaśīrṣṇā yajñena devā arcantaḥ śrāmyantaśceruḥ -

dadhyaṅ ha vā ātharvaṇaḥ/ etaṃ śukrametaṃ yajñaṃ vidāṃcakāra yathāyathaitadyajñasya śiraḥ pratidhīyate yathaiṣa kṛtsno yajño bhavati -

sa hendreṇokta āsa/ etaṃ cedanyasmā anubrūyāstata eva te śiraśchindyāmiti -

tadu hāśvinoranuśrutamāsa/ dadhyaṅṅu ha vā ātharvaṇa etaṃ śukrametaṃ yajñamveda yathāyathaitadyajñasya śiraḥ pratidhīyate yathaiṣa kṛtsno yajño bhavatīti -

tau haityocatuḥ/ upa tvā'yāveti kimanuvakṣyamāṇāvityetaṃ śukrametaṃ yajñaṃ yathāyathaitadyajñasya śiraḥ pratidhīyate yathaiṣa kṛtsno yajño bhavatīti -

sa hovāca/ indreṇa vā ukto'smyetaṃ cedanyasmā anubrūyāstata eva te śiraśchindyāmiti tasmādvai bibhemi yadvai me sa śiro na cchindyānna vāmupaneṣya iti -

tau hocatuḥ/ āvāṃ tvā tasmāttrāsyāvaha iti kathaṃ mā trāsyethe iti yadā nā'upaneṣyase'tha te śiraśchittvānyatrāpanidhāsyāvo'thāśvasya śira āhṛtya tatte pratidhāsyāvastena nāvanuvakṣyasi sa yadā nāvanuvakṣyasyatha te tadindraḥ śiraśchetsyatyatha te svaṃ śira āhṛtya tatte pratidhāsyāva iti tatheti -

tau hopaninye/ tau yadopaninye'thāsya śiraśchittvānyatrāpanidadhaturathāśvasya śira āhṛtya taddhāsya pratidadhatustena hābhyāmanūvāca sa yadābhyāmanūvācāthāsya tadindraḥ śiraścicchedāthāsya svaṃ śira āhṛtya taddhāsya pratidadhatuḥ -

tasmādetadṛṣiṇābhyanūktam/ dadhyaṅ ha yanmadhvātharvaṇo vāmaśvasya śīrṣṇā pra yadīmuvācetyayataṃ taduvāceti haivaitaduktam -

tanna sarvasmā anubrūyāt enasyaṃ hi tadatho nenma indraḥ śiraśchinadaditi yo nveva jñātastasmai brūyādatha yo'nūcāno'tha yo'sya priyaḥ syānna tveva sarvasmā iva -

samvatsaravāsine'nubrūyāt/ eṣa vai samvatsaro ya eṣa tapatyeṣa u pravargyastadetamevaitatprīṇāti tasmātsamvatsaravāsine'nubrūyāt -

tisro rātrīrvrataṃ carati/ trayo vā ṛtavaḥ samvatsarasya samvatsara eṣa ya eṣa tapatyeṣa u pravargyastadetamevaitatprīṇāti tasmāttisro rātrīrvrataṃ carati -

taptamācāmati/ tapasvyanubravā ityamāṃsāśyanubrūte tapasvyanubravā iti-

amṛṇmayapāyī/ asti vā asyāṃ saṃsṛṣṭamiva yadasyāmanṛtaṃ vadati tasmādamṛṇmayapāyī -

aśūdrocchiṣṭī/ eṣa vai gharmo ya eṣa tapati saiṣā śrīḥ satyaṃ jyotiranṛtaṃ strī śūdraḥ śvā kṛṣṇaḥ śakunistāni na prekṣeta necchriyaṃ ca pāpmānaṃ ca nejjyotiśca tamaśca netsatyānṛte saṃsṛjānīti -

athaiṣa vāva yaśaḥ/ ya eṣa tapati tadyattadādityo yaśo yajño haiva tadyaśastadyattadyajño yaśo yajamāno haiva tadyaśastadyattadyajamāno yaśa ṛtvijo haiva tadyaśastadyattadṛtvijo yaśo dakṣiṇā haiva tadyaśastasmādyāmasmai dakṣiṇāmānayeyurna tā itsadyo'nyasmā atidiśennedyanmedaṃ yaśa āgaṃstatsadyo'nyasmā atidiśānīti śvo vaiva bhūte dvyahe vā tadātmanyevaitadyaśaḥ kṛtvā yadeva tadbhavati tatsaddadāti hiraṇyaṃ gāṃ vāso'śvaṃ vā -

athaitadvā/ āyuretajjyotiḥ praviśati ya etamanu vā brūte bhakṣayati vā tasya vratacaryā nātapati pracchādayeta nedetasmāttiro'sānīti nātapati niṣṭhīvennedetamabhiniṣṭhīvānīti nātapati prasrāvayeta nedetamabhiprasrāvayā iti yāvadvā eṣa ātapati tāvāneṣa nedetametairhinasānītyavajyotya rātrāvaśnīyāttadetasya rūpaṃ kriyate ya eṣa tapati tadu hovācāsurirekaṃ ha vai devā vrataṃ caranti yatsatyaṃ tasmādu satyameva vadet -