Shatapatha Brahmana · Chapter 13.8.4

athainacchaṅkubhiḥ pariṇihanti pālāśaṃ purastādbrahma vai palāśo brahmapurogavamevainaṃ svargaṃ lokaṃ gamayati śamīmayamuttarataḥ śamme'saditi vāraṇaṃ paścādaghaṃ me vārayātā iti vṛtraśaṅkuṃ dakṣiṇato'ghasyaivānatyayāya -

atha dakṣiṇataḥ parivakre khananti te kṣīreṇa codakena ca pūrayanti te hainamamuṣmiṃloke'kṣite kulye upadhāvataḥ saptottarastā udakena pūrayanti na ha vai sapta sravantīraghamatyetumarhatyaghasyaivānatyayāya -

aśmanastrīṃstrīnprakiranti tā abhyuttarantyaśmanvatī rīyate saṃrabhadhvamuttiṣṭhata pratarata sakhāyaḥ atrā jahīmo'śivā ye'asañchivānvayamuttaremābhi vājāniti yathaiva yajustathā bandhuḥ -

apāmārgairapamṛjate aghameva tadapamṛjate'pāghamapa kilviṣamapa kṛtyāmaporapaḥ/ apāmārga tvamasmadapa duḥṣvapnyaṃ suveti yathaiva yajustathā bandhuḥ -

yatrodakaṃ bhavati tatsnānti sumitriyā na āpa oṣadhayaḥ santvityañjalināpa upācati vajro vā āpo vajreṇaivaitanmitradheyaṃ kurute durmitriyāstasmai santu yo'smāndveṣṭi yaṃ ca vayaṃ dviṣma iti yāmasya diśaṃ dveṣyaḥ syāttāṃ diśaṃ parāsiñcettenaiva taṃ parābhāvayati -

sa yadi sthāvarā āpo bhavanti sthāpayantyeṣāṃ pāpmānamatha yadi vahanti vahantyevaiṣāṃ pāpmānaṃ snātvā'hatāni vāsāṃsi paridhāyānaḍuhaḥ pucchamanvārabhyāyantyāgneyo vā anaḍvānagnimukhā eva tatpitṛlokājjīvalokamabhyāyantyatho agnirvai patho'tivoḍhā sa enānativahati -

udvayaṃ tamasasparīti etāmṛcaṃ japanto yanti tattamasaḥ pitṛlokādādityaṃ jyotirabhyāyanti tebhya āgatebhya āñjanābhyañjane prayacchantyeṣa ha mānuṣo'laṅkārastenaiva taṃ mṛtyumantardadhate -

atha gṛheṣvagniṃ samādhāya vāraṇānparidhīnparidhāya vāraṇena sruveṇāgnaya āyuṣmata āhutiṃ juhotyagnirvā āyuṣmānāyuṣa īṣṭe tamevaibhya āyuryācatyagna āyūṃṣi pavasa iti puro'nuvākyābhājanam -

atha juhoti āyuṣmānagne haviṣā vṛdhāno ghṛtapratīko ghṛtayoniredhi/ ghṛtaṃ pītvā madhu cāru gavyaṃ piteva putramabhirakṣatādimāntsvāheti yathaivainānabhirakṣedyathā'bhigopāyedevametadāha -

tasya purāṇo'naḍvāndakṣiṇā purāṇā yavāḥ purāṇyāsandī sopabarhaṇaiṣā 'nvādiṣṭā dakṣiṇā kāmaṃ yathāśraddhaṃ bhūyasīrdadyāditi nvagnicitaḥ -

athānagnicitaḥ etadeva bhūmijoṣaṇametatsamānaṃ karma yadanyadagnikarmaṇaḥ kuryādāhitāgneḥ śarkarā ityu haika āhuryā evāmūragnyādheyaśarkarāstā etā iti na tathā kuryādityeka'īśvaro haitā anagnicitaṃ santaptoriti sa yathā kāmayeta tathā kuryāt -

maryādāyā eva loṣṭamāhṛtya antareṇa nidadhātīmaṃ jīvebhyaḥ paridhiṃ dadhāmi maiṣāṃ nu gādaparo arthametaṃ śataṃ jīvantu śaradaḥ purūcīrantarmṛtyuṃ dadhatāṃ parvateneti jīvebhyaścaivaitāṃ pitṛbhyaśca maryādāṃ karotyasambhedāya tasmādu haitajjīvāśca pitaraśca na sandṛśyante -