શતપથબ્રાહ્મણમ્ · અધ્યાય 13.8.4

અથૈનચ્છઙ્કુભિઃ પરિણિહન્તિ પાલાશં પુરસ્તાદ્બ્રહ્મ વૈ પલાશો બ્રહ્મપુરોગવમેવૈનં સ્વર્ગં લોકં ગમયતિ શમીમયમુત્તરતઃ શમ્મેઽસદિતિ વારણં પશ્ચાદઘં મે વારયાતા ઇતિ વૃત્રશઙ્કું દક્ષિણતોઽઘસ્યૈવાનત્યયાય -

અથ દક્ષિણતઃ પરિવક્રે ખનન્તિ તે ક્ષીરેણ ચોદકેન ચ પૂરયન્તિ તે હૈનમમુષ્મિંલોકેઽક્ષિતે કુલ્યે ઉપધાવતઃ સપ્તોત્તરસ્તા ઉદકેન પૂરયન્તિ ન હ વૈ સપ્ત સ્રવન્તીરઘમત્યેતુમર્હત્યઘસ્યૈવાનત્યયાય -

અશ્મનસ્ત્રીંસ્ત્રીન્પ્રકિરન્તિ તા અભ્યુત્તરન્ત્યશ્મન્વતી રીયતે સંરભધ્વમુત્તિષ્ઠત પ્રતરત સખાયઃ અત્રા જહીમોઽશિવા યેઽઅસઞ્છિવાન્વયમુત્તરેમાભિ વાજાનિતિ યથૈવ યજુસ્તથા બન્ધુઃ -

અપામાર્ગૈરપમૃજતે અઘમેવ તદપમૃજતેઽપાઘમપ કિલ્વિષમપ કૃત્યામપોરપઃ। અપામાર્ગ ત્વમસ્મદપ દુઃષ્વપ્ન્યં સુવેતિ યથૈવ યજુસ્તથા બન્ધુઃ -

યત્રોદકં ભવતિ તત્સ્નાન્તિ સુમિત્રિયા ન આપ ઓષધયઃ સન્ત્વિત્યઞ્જલિનાપ ઉપાચતિ વજ્રો વા આપો વજ્રેણૈવૈતન્મિત્રધેયં કુરુતે દુર્મિત્રિયાસ્તસ્મૈ સન્તુ યોઽસ્માન્દ્વેષ્ટિ યં ચ વયં દ્વિષ્મ ઇતિ યામસ્ય દિશં દ્વેષ્યઃ સ્યાત્તાં દિશં પરાસિઞ્ચેત્તેનૈવ તં પરાભાવયતિ -

સ યદિ સ્થાવરા આપો ભવન્તિ સ્થાપયન્ત્યેષાં પાપ્માનમથ યદિ વહન્તિ વહન્ત્યેવૈષાં પાપ્માનં સ્નાત્વાઽહતાનિ વાસાંસિ પરિધાયાનડુહઃ પુચ્છમન્વારભ્યાયન્ત્યાગ્નેયો વા અનડ્વાનગ્નિમુખા એવ તત્પિતૃલોકાજ્જીવલોકમભ્યાયન્ત્યથો અગ્નિર્વૈ પથોઽતિવોઢા સ એનાનતિવહતિ -

ઉદ્વયં તમસસ્પરીતિ એતામૃચં જપન્તો યન્તિ તત્તમસઃ પિતૃલોકાદાદિત્યં જ્યોતિરભ્યાયન્તિ તેભ્ય આગતેભ્ય આઞ્જનાભ્યઞ્જને પ્રયચ્છન્ત્યેષ હ માનુષોઽલઙ્કારસ્તેનૈવ તં મૃત્યુમન્તર્દધતે -

અથ ગૃહેષ્વગ્નિં સમાધાય વારણાન્પરિધીન્પરિધાય વારણેન સ્રુવેણાગ્નય આયુષ્મત આહુતિં જુહોત્યગ્નિર્વા આયુષ્માનાયુષ ઈષ્ટે તમેવૈભ્ય આયુર્યાચત્યગ્ન આયૂંષિ પવસ ઇતિ પુરોઽનુવાક્યાભાજનમ્ -

અથ જુહોતિ આયુષ્માનગ્ને હવિષા વૃધાનો ઘૃતપ્રતીકો ઘૃતયોનિરેધિ। ઘૃતં પીત્વા મધુ ચારુ ગવ્યં પિતેવ પુત્રમભિરક્ષતાદિમાન્ત્સ્વાહેતિ યથૈવૈનાનભિરક્ષેદ્યથાઽભિગોપાયેદેવમેતદાહ -

તસ્ય પુરાણોઽનડ્વાન્દક્ષિણા પુરાણા યવાઃ પુરાણ્યાસન્દી સોપબર્હણૈષા ઽન્વાદિષ્ટા દક્ષિણા કામં યથાશ્રદ્ધં ભૂયસીર્દદ્યાદિતિ ન્વગ્નિચિતઃ -

અથાનગ્નિચિતઃ એતદેવ ભૂમિજોષણમેતત્સમાનં કર્મ યદન્યદગ્નિકર્મણઃ કુર્યાદાહિતાગ્નેઃ શર્કરા ઇત્યુ હૈક આહુર્યા એવામૂરગ્ન્યાધેયશર્કરાસ્તા એતા ઇતિ ન તથા કુર્યાદિત્યેકઽઈશ્વરો હૈતા અનગ્નિચિતં સન્તપ્તોરિતિ સ યથા કામયેત તથા કુર્યાત્ -

મર્યાદાયા એવ લોષ્ટમાહૃત્ય અન્તરેણ નિદધાતીમં જીવેભ્યઃ પરિધિં દધામિ મૈષાં નુ ગાદપરો અર્થમેતં શતં જીવન્તુ શરદઃ પુરૂચીરન્તર્મૃત્યું દધતાં પર્વતેનેતિ જીવેભ્યશ્ચૈવૈતાં પિતૃભ્યશ્ચ મર્યાદાં કરોત્યસમ્ભેદાય તસ્માદુ હૈતજ્જીવાશ્ચ પિતરશ્ચ ન સન્દૃશ્યન્તે -