Shatapatha Brahmana · Chapter 13.8.3

atha sarvauṣadhaṃ vapati yadevādaḥ sarvauṣadhaṃ tadetadbahvībhistadvapatyekayedaṃ daivaṃ caiva tatpitryaṃ ca vyākarotyaśvatthe vo niṣadanaṃ parṇe vo vasatiṣkṛteti jyogjīvātumevaibhya etadāśāste tatho haiṣāmekaiko'paro jarasānupraiti -

athainannivapati(atha ha enaṃ nivapati)/ iyaṃ vai pṛthivī pratiṣṭhā'syāmevainametatpratiṣṭhāyāmpratiṣṭhāpayati purādityasyodayāttiraiva vai pitarastiraiva rātristira eva tatkaroti yathā kurvato'bhyudiyāttadenamubhayorahorātrayoḥ pratiṣṭhāpayati -

savitā te śarīrāṇi māturupastha āvapatviti savitaivāsyaitaccharīrāṇyasyai pṛthivyai
māturupastha āvapati tasyai pṛthivi śambhaveti yathaivāsmā iyaṃ śaṃsyādevametadāha prajāpatau tvā devatāyāmupodake loke nidadhāmyasāviti nāma gṛhṇātyayaṃ vai loka upodakastadenaṃ prajāpatau devatāyāmupodake loke nidadhāti -

atha kañcidāha etāṃ diśamanavānantsṛtvā kumbhaṃ prakṣīyānapekṣamāṇa ehīti tatra japati paraṃ mṛtyo anu parehi panthāṃ yaste anya itaro devayānāt cakṣuṣmate śṛṇvate te bravīmi mā naḥ prajāṃ rīriṣo mota vīrāniti jyogjīvātumevaibhya etadāśāste tatho haiṣāmekaiko'paro jarasānupraiti -

athainaṃ yathāṅgaṃ kalpayati śaṃ vātaḥ śaṃ hi te ghṛṇiḥ śaṃ te bhavantviṣṭakāḥ śaṃ te bhavantvagnayaḥ pārthivāso mā tvābhiśūśucan kalpantāṃ te diśastubhyamāpaḥ śivatamāstubhyaṃ bhavantu sindhavaḥ antarikṣaṃ śivaṃ tubhyaṃ kalpantāṃ te diśaḥ sarvā ityetadevāsmai sarvaṃ kalpayatyetadasmai śivaṃ karoti -

atha trayodaśa pādamātrya iṣṭakā alakṣaṇāḥ kṛtā bhavanti yā evāmūragnāviṣṭakāstā
etā yajuṣā tā upadadhāti tūṣṇīmimā daivaṃ caiva tatpitryaṃ ca vyākaroti -

trayodaśa bhavanti trayodaśa māsāḥ samvatsara ṛtuṣvevainametatsamvatsare pratiṣṭhāyāṃ pratiṣṭhāpayati -

pādamātryo bhavanti pratiṣṭhā vai pādaḥ pratiṣṭhāmevāsmai karotyalakṣaṇā bhavanti tiraiva vai pitarastiraiva tadyadalakṣaṇaṃ tira eva tattiraḥ karoti -

tāsāmekāṃ madhye prācīmupadadhāti sa ātmā tisraḥ purastānmūrddhasaṃhitāstacchirastisro dakṣiṇataḥ sa dakṣiṇaḥ pakṣastisra uttarataḥ sa uttaraḥ pakṣastisraḥ paścāttatpucchaṃ so'syaiṣa pakṣapucchavānātmā yathaivāgnestathā -

atha pradarātpurīṣamāhartavā āha etaddhāsyāḥ pitryamanatiriktamatho aghameva tadbaddhṛ karotyasminnu haike'vāntaradeśe karṣūṃ khātvā tato'bhyāhāraṃ kurvanti parikṛṣantyu haike dakṣiṇataḥ paścāduttaratastato'bhyāhāraṃ kurvanti sa yathā kāmayeta tathā kuryāt -

tadvai na mahatkuryāt nenmahadaghaṃ karavāṇīti yāvānudbāhuḥ puruṣastāvatkṣatriyasya kuryānmukhadaghnaṃ brāhmaṇasyopasthadaghnaṃ striyā ūrudaghnaṃ vaiśyasyāṣṭhīvaddaghnaṃ śūdrasyaivamvīryā hyeta iti -

adhojānu tveva kuryāt tathāparasmā avakāśaṃ na karoti tasya kriyamāṇasya tejanīmuttarato dhārayanti prajā ha sā prajāmeva taduttarato dhārayanti tāṃ na nyasyeddhṛtvā vaināmūḍhvā vā gṛheṣūcchrayetprajāmeva tadgṛheṣūcchrayati -

kṛtvā yavānvapati aghaṃ me yavayānityavakābhiḥ pracchādayati kaṃ me'saditi darbhaiḥ pracchādayatyarūkṣatāyai -