Scripture Library

Shatapatha Brahmana · Chapter 13.7.1

13.7.1.13.7.1.1

brahma vai svayambhu tapo'tapyata tadaikṣata na vai tapasyānantyamasti hantāhambhūteṣvātmānaṃ juhavāni bhūtāni cāttmanīti tatsarveṣu bhūteṣvātmānaṃ hutvā bhūtāni cātmani sarveṣāṃ bhūtānāṃ śraiṣṭhyaṃ svārājyamādhipatyamparyaittathaivaitadyajamānaḥ sarvamedhe sarvānmedhānhutvā sarvāṇi bhūtāni śraiṣṭhyaṃ svārājyamādhipatyaṃ paryeti -

13.7.1.13.7.1.2

sa vā eṣa sarvamedho daśarātro yajñakraturbhavati daśākṣarā virāḍvirāḍu kṛtsnamannaṃ kṛtsnasyaivānnādyasyāvaruddhyai tasminnagniṃ parārdhyaṃ cinoti paramo vā eṣa yajñakratūnāṃ yatsarvamedhaḥ parameṇaivainaṃ paramatāṃ gamayati -

13.7.1.13.7.1.3

tasyāgniṣṭudagniṣṭomaḥ prathamamaharbhavati agnirvā agniṣṭudagniṣṭomo'gnimukhā u vai sarve devāḥ sarveṣāṃ devānāmāptyai tasyāgneyā grahā bhavantyāgneyyaḥ purorucaḥ sarvamāgneyamasaditi -

13.7.1.13.7.1.4

indrastudukthyo dvitīyamaharbhavati indro vai sarve devāḥ sarveṣāṃ devānāmāptyai tasyaindrā grahā bhavantyaindryaḥ purorucaḥ sarvamaindramasaditi -

13.7.1.13.7.1.5

sūryastudukthyastṛtīyamaharbhavati sūryo vai sarve devāḥ sarveṣāṃ devānāmāptyai sauryā grahā bhavanti sauryyaḥ purorucaḥ sarvaṃ sauryamasaditi -

13.7.1.13.7.1.6

vaiśvadevaścaturthamaharbhavati viśve vai sarve devāḥ sarveṣāṃ devānāmāptyai vaiśvadevā grahā bhavanti vaiśvadevyaḥ purorucaḥ sarvaṃ vaiśvadevamasaditi -

13.7.1.13.7.1.7

āśvamedhikaṃ madhyamaṃ pañcamamaharbhavati tasminnaśvammedhyamālabhate'śvamedhasyaivāptyai -

13.7.1.13.7.1.8

pauruṣamedhikaṃ madhyamaṃ ṣaṣṭhamaharbhavati tasminmedhyānpuruṣānālabhate puruṣamedhasyaivāptyai -

13.7.1.13.7.1.9

aptoryāmaḥ saptamamaharbhavati sarveṣāṃ yajñakratūnāmāptyai tasmintsarvānmedhyānālabhate yacca prāṇi yaccāprāṇaṃ vapā vapāvatāṃ juhoti tvaca utkartamavapākānāṃ samvraścamoṣadhivanaspatīnāṃ prakiranti śuṣkāṇāṃ cārdrāṇāṃ cānnamannaṃ juhotyannasyānnasyāptyai sarvaṃ juhoti sarvasmai juhoti sarvasyāptyai sarvasyāvaruddhyai prātaḥsavane hutāsu vapāsvevameva tṛtīyasavane huteṣu haviḥṣu -

13.7.1.13.7.1.10

triṇavamaṣṭamamaharbhavati vajro vai triṇavo vajreṇa khalu vai kṣatraṃ spṛtaṃ tadvajreṇaiva kṣatraṃ spṛṇoti -

13.7.1.13.7.1.11

trayastriṃśaṃ navamamaharbhavati pratiṣṭhā vai trayastriṃśaḥ pratiṣṭhityai -

13.7.1.13.7.1.12

viśvajitsarvapṛṣṭho'tirātro daśamamaharbhavati sarvaṃ vai viśvajitsarvapṛṣṭho'tirātraḥ sarvaṃ sarvamedhaḥ sarvasyāptyai sarvasyāvaruddhyai -

13.7.1.13.7.1.13

athāto dakṣiṇānām madhyaṃ prati rāṣṭrasya yadanyadbrāhmaṇasya vittātsabhūmi sapuruṣaṃ prācī digghoturdakṣiṇā brahmaṇaḥ pratīcyadhvaryorudīcyudgātustadeva hotṛkā anvābhaktāḥ -

13.7.1.13.7.1.14

tena haitena viśvakarmā bhauvana īje teneṣṭvā'tyatiṣṭhatsarvāṇi bhūtānīdaṃ sarvamabhavadatitiṣṭhati sarvāṇi bhūtānīdaṃ sarvaṃ bhavati ya evamvidvāntsarvamedhena yajate yo vaitadevaṃ veda -

13.7.1.13.7.1.15

taṃ ha kaśyapo yājayāṃcakāra tadapi bhūmiḥ ślokaṃ jagau na mā martyaḥ kaścana dātumarhati viśvakarmanbhauvana manda āsitha upamaṅkṣyati syā salilasya madhye mṛṣaiṣa te saṅgaraḥ kaśyapāyeti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0