શતપથબ્રાહ્મણમ્ · અધ્યાય 13.7.1

બ્રહ્મ વૈ સ્વયમ્ભુ તપોઽતપ્યત તદૈક્ષત ન વૈ તપસ્યાનન્ત્યમસ્તિ હન્તાહમ્ભૂતેષ્વાત્માનં જુહવાનિ ભૂતાનિ ચાત્ત્મનીતિ તત્સર્વેષુ ભૂતેષ્વાત્માનં હુત્વા ભૂતાનિ ચાત્મનિ સર્વેષાં ભૂતાનાં શ્રૈષ્ઠ્યં સ્વારાજ્યમાધિપત્યમ્પર્યૈત્તથૈવૈતદ્યજમાનઃ સર્વમેધે સર્વાન્મેધાન્હુત્વા સર્વાણિ ભૂતાનિ શ્રૈષ્ઠ્યં સ્વારાજ્યમાધિપત્યં પર્યેતિ -

સ વા એષ સર્વમેધો દશરાત્રો યજ્ઞક્રતુર્ભવતિ દશાક્ષરા વિરાડ્વિરાડુ કૃત્સ્નમન્નં કૃત્સ્નસ્યૈવાન્નાદ્યસ્યાવરુદ્ધ્યૈ તસ્મિન્નગ્નિં પરાર્ધ્યં ચિનોતિ પરમો વા એષ યજ્ઞક્રતૂનાં યત્સર્વમેધઃ પરમેણૈવૈનં પરમતાં ગમયતિ -

તસ્યાગ્નિષ્ટુદગ્નિષ્ટોમઃ પ્રથમમહર્ભવતિ અગ્નિર્વા અગ્નિષ્ટુદગ્નિષ્ટોમોઽગ્નિમુખા ઉ વૈ સર્વે દેવાઃ સર્વેષાં દેવાનામાપ્ત્યૈ તસ્યાગ્નેયા ગ્રહા ભવન્ત્યાગ્નેય્યઃ પુરોરુચઃ સર્વમાગ્નેયમસદિતિ -

ઇન્દ્રસ્તુદુક્થ્યો દ્વિતીયમહર્ભવતિ ઇન્દ્રો વૈ સર્વે દેવાઃ સર્વેષાં દેવાનામાપ્ત્યૈ તસ્યૈન્દ્રા ગ્રહા ભવન્ત્યૈન્દ્ર્યઃ પુરોરુચઃ સર્વમૈન્દ્રમસદિતિ -

સૂર્યસ્તુદુક્થ્યસ્તૃતીયમહર્ભવતિ સૂર્યો વૈ સર્વે દેવાઃ સર્વેષાં દેવાનામાપ્ત્યૈ સૌર્યા ગ્રહા ભવન્તિ સૌર્ય્યઃ પુરોરુચઃ સર્વં સૌર્યમસદિતિ -

વૈશ્વદેવશ્ચતુર્થમહર્ભવતિ વિશ્વે વૈ સર્વે દેવાઃ સર્વેષાં દેવાનામાપ્ત્યૈ વૈશ્વદેવા ગ્રહા ભવન્તિ વૈશ્વદેવ્યઃ પુરોરુચઃ સર્વં વૈશ્વદેવમસદિતિ -

આશ્વમેધિકં મધ્યમં પઞ્ચમમહર્ભવતિ તસ્મિન્નશ્વમ્મેધ્યમાલભતેઽશ્વમેધસ્યૈવાપ્ત્યૈ -

પૌરુષમેધિકં મધ્યમં ષષ્ઠમહર્ભવતિ તસ્મિન્મેધ્યાન્પુરુષાનાલભતે પુરુષમેધસ્યૈવાપ્ત્યૈ -

અપ્તોર્યામઃ સપ્તમમહર્ભવતિ સર્વેષાં યજ્ઞક્રતૂનામાપ્ત્યૈ તસ્મિન્ત્સર્વાન્મેધ્યાનાલભતે યચ્ચ પ્રાણિ યચ્ચાપ્રાણં વપા વપાવતાં જુહોતિ ત્વચ ઉત્કર્તમવપાકાનાં સમ્વ્રશ્ચમોષધિવનસ્પતીનાં પ્રકિરન્તિ શુષ્કાણાં ચાર્દ્રાણાં ચાન્નમન્નં જુહોત્યન્નસ્યાન્નસ્યાપ્ત્યૈ સર્વં જુહોતિ સર્વસ્મૈ જુહોતિ સર્વસ્યાપ્ત્યૈ સર્વસ્યાવરુદ્ધ્યૈ પ્રાતઃસવને હુતાસુ વપાસ્વેવમેવ તૃતીયસવને હુતેષુ હવિઃષુ -

ત્રિણવમષ્ટમમહર્ભવતિ વજ્રો વૈ ત્રિણવો વજ્રેણ ખલુ વૈ ક્ષત્રં સ્પૃતં તદ્વજ્રેણૈવ ક્ષત્રં સ્પૃણોતિ -

ત્રયસ્ત્રિંશં નવમમહર્ભવતિ પ્રતિષ્ઠા વૈ ત્રયસ્ત્રિંશઃ પ્રતિષ્ઠિત્યૈ -

વિશ્વજિત્સર્વપૃષ્ઠોઽતિરાત્રો દશમમહર્ભવતિ સર્વં વૈ વિશ્વજિત્સર્વપૃષ્ઠોઽતિરાત્રઃ સર્વં સર્વમેધઃ સર્વસ્યાપ્ત્યૈ સર્વસ્યાવરુદ્ધ્યૈ -

અથાતો દક્ષિણાનામ્ મધ્યં પ્રતિ રાષ્ટ્રસ્ય યદન્યદ્બ્રાહ્મણસ્ય વિત્તાત્સભૂમિ સપુરુષં પ્રાચી દિગ્ઘોતુર્દક્ષિણા બ્રહ્મણઃ પ્રતીચ્યધ્વર્યોરુદીચ્યુદ્ગાતુસ્તદેવ હોતૃકા અન્વાભક્તાઃ -

તેન હૈતેન વિશ્વકર્મા ભૌવન ઈજે તેનેષ્ટ્વાઽત્યતિષ્ઠત્સર્વાણિ ભૂતાનીદં સર્વમભવદતિતિષ્ઠતિ સર્વાણિ ભૂતાનીદં સર્વં ભવતિ ય એવમ્વિદ્વાન્ત્સર્વમેધેન યજતે યો વૈતદેવં વેદ -

તં હ કશ્યપો યાજયાંચકાર તદપિ ભૂમિઃ શ્લોકં જગૌ ન મા મર્ત્યઃ કશ્ચન દાતુમર્હતિ વિશ્વકર્મન્ભૌવન મન્દ આસિથ ઉપમઙ્ક્ષ્યતિ સ્યા સલિલસ્ય મધ્યે મૃષૈષ તે સઙ્ગરઃ કશ્યપાયેતિ -