Shatapatha Brahmana · Chapter 13.6.2

atha yasmātpuruṣamedho nāma ime vai lokāḥ pūrayameva puruṣo yo'yaṃ pavate so'syāṃ puri śete tasmātpuruṣastasya yadeṣu lokeṣvannaṃ tadasyānnammedhastadyadasyaitadannaṃ medhastasmātpuruṣamedho'tho yadasminmedhyānpuruṣānālabhate tasmādveva puruṣamedhaḥ -

tānvai madhyame'hannālabhate antarikṣaṃ vai madhyamamaharantarikṣamu vai sarveṣāṃ bhūtānāmāyatanamatho annaṃ vā ete paśava udarammadhyamamaharudare tadannaṃ dadhāti -

tānvai daśadaśālabhate daśākṣarā virāḍvirāḍu kṛtsnamannaṃ kṛtsnasyaivānnādyasyāvaruddhyai -

ekādaśa daśata ālabhate ekādaśākṣarā triṣṭubvajrastriṣṭubvīryaṃ triṣṭubvajreṇaivaitadvīryeṇa yajamāno madhyataḥ pāpmānamapahate -

aṣṭācatvāriṃśataṃ madhyame yūpa ālabhate aṣṭācatvāriṃśadakṣarā jagatī jāgatāḥ paśavo jagatyaivāsmai paśūnavarunddhe -

ekādaśaikādaśetareṣu ekādaśākṣarā triṣṭubvajrastriṣṭubvīryaṃ triṣṭubvajreṇaivaitadvīryeṇa yajamāno'bhitaḥ pāpmānamapahate -

aṣṭā uttamānālabhate aṣṭākṣarā gāyatrī brahma gāyatrī tadbrahmaivaitadasya sarvasyottamaṃ karoti tasmādbrahmāsya sarvasyottamamityāhuḥ -

te vai prājāpatyā bhavanti brahma vai prajāpatirbrāhmo hi prajāpatistasmātprājāpatyā bhavanti -

sa vai paśūnupākariṣyan etāstisraḥ sāvitrīrāhutīrjuhoti devasavitastatsaviturvareṇyaṃ viśvāni deva savitariti savitāraṃ prīṇāti so'smai prīta etānpuruṣānprasauti tena prasūtānālabhate -

brahmaṇe brāhmaṇamālabhate brahma vai brāhmaṇo brahmaiva tadbrahmaṇā samardhayati kṣatrāya rājanyaṃ kṣatraṃ vai rājanyaḥ kṣatrameva tatkṣatreṇa samardhayati marudbhyo vaiśyam viśo vai maruto viśameva tadviśā samardhayati tapase śūdraṃ tapo vai śūdrastapa eva tattapasā samardhayatyevametā devatā yathārūpaṃ paśubhiḥ samardhayati tā enaṃ samṛddhāḥ samardhayanti sarvaiḥ kāmaiḥ -

ājyena juhoti tejo vā ājyaṃ tejasaivāsmiṃstattejo dadhātyājyena juhotyetadvai
devānāṃ priyaṃ dhāma yadājyaṃ priyeṇaivaināndhāmnā samardhayati ta enaṃ samṛddhāḥ samardhayanti sarvaiḥ kāmaiḥ -

niyuktānpuruṣān brahmā dakṣiṇataḥ puruṣeṇa nārāyaṇenābhiṣṭauti sahasraśīrṣā puruṣaḥ sahasrākṣaḥ sahasrapādityetena ṣoḍaśarcena ṣoḍaśakalaṃ vā idaṃ sarvaṃ sarvaṃ puruṣamedhaḥ sarvasyāptyai sarvasyāvaruddhyā itthamasītthamasītyupastautyevainametanmahayatyevātho yathaiṣa
tathainametadāha tatparyagnikṛtāḥ paśavo babhūvurasañjñaptāḥ -

atha hainaṃ vāgabhyuvāda puruṣa mā santiṣṭhipo yadi saṃsthāpayiṣyasi puruṣa eva puruṣamatsyatīti tānparyagnikṛtānevodasṛjattaddevatyā āhutīrajuhottābhistā devatā aprīṇāttā enaṃ prītā aprīṇantsarvaiḥ kāmaiḥ -

ājyena juhoti tejo vā ājyaṃ tejasaivāsmiṃstattejo dadhāti -

ekādaśinaiḥ saṃsthāpayati ekādaśākṣarā triṣṭubvajrastriṣṭubvīryaṃtriṣṭubvajreṇaivaitadvīryeṇa yajamāno madhyataḥ pāpmānamapahate -

udayanīyāyāṃ saṃsthitāyām ekādaśa vaśā anūbandhyā ālabhate maitrāvaruṇīrvaiśvadevīrbārhaspatyā etāsāṃ devatānāmāptyai tadyadbārhaspatyā antyā bhavanti brahma vai bṛhaspatistadu brahmaṇyevāntataḥ pratitiṣṭhati -

atha yadekādaśa bhavanti ekādaśākṣarā triṣṭubvajrastriṣṭubvīryaṃ triṣṭubvajreṇaivaitadvīryeṇa yajamāno madhyataḥ pāpmānamapahate traidhātavyudavasānīyā''sāveva bandhuḥ -

athāto dakṣiṇānām madhyaṃ prati rāṣṭrasya yadanyadbhūmeśca brāhmaṇasya ca vittātsatpuruṣaṃ prācī digghortudakṣiṇā brahmaṇaḥ pratīcyadhvaryorudīcyudgātustadeva hotṛkā anvābhaktāḥ -

atha yadi brāhmaṇo yajeta sarvavedasaṃ dadyātsarvaṃ vai brāhmaṇaḥ sarvaṃ sarvavedasaṃ sarvaṃ puruṣamedhaḥ sarvasyāptyai sarvasyāvaruddhyai -

athātmannagnī samārohya uttaranārāyaṇenādityamudasthāyānapekṣamāṇo'raṇyamabhipreyāttadeva manuṣyebhyastiro bhavati yadyu grāme vivatsedaraṇyoragnī samārohyottaranārāyaṇenaivādityamupasthāya gṛheṣu pratyavasyedatha tānyajñakratūnāhareta yānabhyāpnuyātsa vā eṣa na sarvasmā anuvaktavyaḥ sarvaṃ hi puruṣamedho netsarvasmā'iva sarvaṃ bravāṇīti yo nveva jñātastasmai brūyādatha yo'nūcāno'tha yo'sya priyaḥ syānnaittveva sarvasmā iva -