Shatapatha Brahmana · Chapter 13.6.1

puruṣo ha nārāyaṇo'kāmayata atitiṣṭheyaṃ sarvāṇi bhūtānyahamevedaṃ sarvaṃ syāmiti sa etaṃ puruṣamedhaṃ pañcarātramyajñakratumapaśyattamāharattenāyajata teneṣṭvātyatiṣṭhatsarvāṇi bhūtānīdaṃ sarvamabhavadatitiṣṭhati sarvāṇi bhūtānīdaṃ sarvaṃ bhavati ya evamvidvānpuruṣamedhena yajate yo vaitadevaṃ veda -

tasya trayoviṃśatirdīkṣāḥ dvādaśopasadaḥ pañca sutyāḥ sa eṣa catvāriṃśadrātraḥ sadīkṣopasatkaścatvāriṃśadakṣarā virāṭtadvirājamabhisampadyate tato virāḍajāyata virājo adhi pūruṣa ityeṣā vai sā virāḍetasyā evaitadvirājo yajñaṃ puruṣaṃ janayati -

tā vā etāḥ catasro daśato bhavanti tadyadetāścatasro daśato bhavantyeṣāṃ caiva lokānāmāptye diśāṃ cemameva lokaṃ prathamayā daśatāpnuvannantarikṣaṃ dvitīyayā divaṃ tṛtīyayā diśaścaturthyā tathaivaitadyajamāna imameva lokamprathamayā daśatāpnotyantarikṣaṃ dvitīyayā divaṃ tṛtīyayā diśaścaturthyaitāvadvā idaṃ sarvaṃ yāvādime ca lokā diśaśca sarvaṃ puruṣamedhaḥ sarvasyāptyai sarvasyāvaruddhyai -

ekādaśāgniṣomīyāḥ paśava upavasathe teṣāṃ samānaṃ karmaikādaśa yūpā ekādaśākṣarā triṣṭubvajrastriṣṭubvīryaṃ triṣṭubvajreṇaivaitadvīryeṇa yajamānaḥ purastātpāpmānamapahate -

ekādaśināḥ sutyāsu paśavo bhavanti ekādaśākṣarā triṣṭubvajrastriṣṭubvīryaṃ triṣṭubvajreṇaivaitadvīryeṇa yajamānaḥ purastātpāpmānamapahate -

yadvevaikādaśinā bhavanti ekādaśinī vā idaṃ sarvaṃ prajāpatirhyekādaśinī sarvaṃ hi prajāpatiḥ sarvaṃ puruṣamedhaḥ sarvasyāptyai sarvasyāvaruddhyai -

sa vā eṣa puruṣamedhaḥ pañcarātro yajñakraturbhavati pāṅkto yajñaḥ pāṅktaḥ paśuḥ pañcartavaḥ samvatsaro yatkiṃ ca pañcavidhamadhidevatamadhyātmaṃ tadenena sarvamāpnoti -

tasyāgniṣṭomaḥ prathamamaharbhavati athokthyo'thātirātro'thokthyo'thāgniṣṭomaḥ sa vā eṣa ubhayatojyotirubhayata'ukthyaḥ -

yavamadhyaḥ pañcarātro bhavati ime vai lokāḥ puruṣamedha ubhayatojyotiṣo vā ime lokā agnineta ādityenāmutastasmādubhayatojyotirannamukthya ātmātirātrastadyadetā ukthyāvatirātramabhito bhavatastasmādayamātmānnena parivṛḍho'tha yadeṣa varṣiṣṭho'tirātro'hnāṃ sa madhye tasmādyavamadhyo yute ha vai dviṣantaṃ bhrātṛvyamayamevāsti nāsya dviṣanbhrātṛvya ityāhurya evaṃ veda -

tasyāyameva lokaḥ prathamamahaḥ ayamasya loko vasantaṛturyadūrdhvamasmāllokādarvācīnamantarikṣāttaddvitīyamahastadvasyā grīṣmaṛturantarikṣamevāsya madhyamamaharantarikṣamasya varṣāśaradāvṛtū yadūrdhvamantarikṣādarvācīnaṃ divastaccaturthamahastadvasya hemantaṛturdyaurevāsya pañcamamahardyaurasya śiśira ṛturityadhidevatam -

athādhyātmam pratiṣṭhaivāsya prathamamahaḥ pratiṣṭho asya vasantaṛturyadūrdhvaṃ pratiṣṭhāyā avācīnaṃ maddhyāttaddvitīyamahastadvasya grīṣmaṛturmadhyamevāsya madhyamamaharmadhyamasya varṣāśaradāvṛtū yadūrdhvammadhyādavācīnaṃ śīrṣṇastaccaturthamahastadvasya hemanta ṛtuḥ śira evāsya pañcamamahaḥ śiro'sya śiśira ṛturevamime ca lokā samvatsaraścātmā ca puruṣamedhamabhisampadyante sarvaṃ vā ime lokāḥ sarvaṃ samvatsaraḥ sarvamātmā sarvaṃ puruṣamedhaḥ sarvasyāptyai sarvasyāvaruddhyai -