Shatapatha Brahmana · Chapter 13.5.4

etena hendroto daivāpaḥ śaunakaḥ janamejayaṃ pārikṣitaṃ yājayāṃcakāra teneṣṭvā sarvāṃ pāpakṛtyāṃ sarvāṃ brahmahatyāmapajaghāna sarvāṃ ha vai pāpakṛtyāṃ sarvāṃ brahmahatyāmapahanti yo'śvamedhena yajate -

tadetadgāthayābhigītam āsandīvati dhānyādaṃ rukmiṇaṃ haritasrajam abadhnādaśvaṃ sāraṅgaṃ devebhyo janamejaya iti -

ete eva pūrve ahanī jyotiratirātrastena bhīmasenamete eva pūrve ahanī gauratirātrastenograsenamete eva pūrve ahanī āyuratirātrastena śrutasenamityete pārikṣitīyāstadetadgāthayābhigītaṃ pārikṣitā yajamānā aśvamedhaiḥ paro'varam ajahuḥ karma pāpakaṃ puṇyāḥ puṇyena karmaṇeti -

ete eva pūrve ahanī abhijidatirātrastena ha para āṭṇāra īje kausalyo rājā tadetadgāthayābhigītamaṭṇārasya paraḥ putro'śvaṃ medhyamabandhayathairaṇyanābhaḥ kausalyo diśaḥ pūrṇā amaṃhateti -

ete eva pūrve ahanī viśvajidatirātrastena ha purukutso daurgaheṇeja aikṣvāko rājā tasmādetadṛṣiṇābhyanūktamasmākamatra pitarasta āsantsapta ṛṣayo daurgahe badhyamāna iti -

ete eva pūrve ahanī mahāvratamatirātrastena ha marutta āvikṣita īja āyogavo rājā tasya ha tato marutaḥ pariveṣṭāro'gniḥ kṣattā viśve devāḥ sabhāsado babhūvustadetadgāthayābhigītaṃ marutaḥ pariveṣṭāro maruttasyāvasangṛhe āvikṣitasyāgniḥ kṣattā viśve devāḥ sabhāsada iti maruto ha vai tasya pariveṣṭāro'gniḥ kṣattā viśve devāḥ sabhāsado bhavanti yo'śvamedhena yajate -

ete eva pūrve ahanī aptoryāmo'tirātrastena haitena kraivya'īje pāñcālo rājā krivaya iti ha vai purā pañcālānācakṣate tadetadgāthayābhigītamaśvaṃ medhyamālabhate krivīṇāmatipūruṣaḥ/ pāñcālaḥ parivakrāyāṃ sahasraśatadakṣiṇamiti -

atha dvitīyayā sahasramāsannayutā śatā ca pañcaviṃśatiḥ dikto diktaḥ pañcālānām brāhmaṇā yā vibhejira iti -

trivṛdagniṣṭomaḥ pañcadaśa ukthyaḥ saptadaśaṃ tṛtīyamahaḥ sokthakamekaviṃśaḥ ṣoḍaśī pañcadaśī rātristrivṛtsandhirityeṣo'nuṣṭupsampannastena haitena dhvasā dvaitavana īje mātsyo rājā yatraitaddvaitavanaṃ sarastadetadgāthayābhigītaṃ caturdaśa dvaitavano rājā saṅgrāmajiddhayānindrāya vṛtraghne'badhnāttasmāddvaitavanaṃ sara iti -

caturviṃśāḥ pavamānāḥ trivṛdabhyāvartaṃ catuścatvāriṃśāḥ pavamānā ekaviṃśamabhyāvartamaṣṭācatvāriṃśāḥ pavamānās trayastriṃśamabhyāvartamāgniṣṭomasāmād dvātriṃśānyukthānyekaviṃśaḥ ṣoḍaśī pañcadaśī rātristrivṛtsandhiriti -

etadviṣṇoḥ krāntam tena haitena bharato dauḥṣantirīje teneṣṭvemāṃ vyaṣṭiṃ vyānaśe yeyaṃ bharatānāṃ tadetadgāthayābhigītam aṣṭāsaptatiṃ bharato dauḥṣyantiryamunāmanu gaṅgāyāṃ vṛtraghne'badhnātpañcapañcāśataṃ hayāniti -

atha dvitīyayā trayastriṃśaṃ śataṃ rājāśvānbaddhvāya medhyānsaudyumniratyaṣṭādanyānamāyānmāyavattara iti -

atha tṛtīyayā śakuntalā nāḍapityapsarā bharataṃ dadhe paraḥ sahasrānindrāyāśvānmedhānya āharadvijitya pṛthivīṃ sarvāmiti -

atha caturthyā mahadadya bharatasya na pūrve nāpare janāḥ divaṃ martyaiva bāhubhyāṃ nodāpuḥ pañca mānavā iti -

ekaviṃśastomena ṛṣabho yājñatura īje śviknānāṃ rājā tadetadgāthayābhigītaṃ yājñature yajamāne brahmāṇa ṛṣabhe janāḥ/ aśvamedhe dhanaṃ labdhvā vibhajantesma dakṣiṇā iti -

trayastriṃśastomena śoṇaḥ sātrāsāha īje pāñcālo rājā tadetadgāthayābhigītaṃ sātrāsahe yajamāne'śvamedhena taurvaśāḥ/ udīrate trayastriṃśāḥ ṣaṭsahasrāṇi varmiṇāmiti -

atha dvitīyayā ṣaṭṣaṭ ṣaḍḍhā sahasrāṇi yajñe kokapitustava/ udīrate trayastriṃśāḥ ṣaṭsahasrāṇi varmiṇāmiti -

atha tṛtīyayā sātrāsahe yajamāne pāñcāle rājñi susraji/ amādyadindraḥ somenātṛpyanbrāhmaṇā dhanairiti -

govinatena śatānīkaḥ sātrājita īje kāśyasyāśvamādāya tato haitardavākkāśayo'gnīnnādadhata āttasomapīthāḥ sma iti vadantaḥ -

tasya vidhā/ caturviṃśāḥ pavamānāḥ trivṛdabhyāvartaṃ catuścatvāriṃśāḥ pavamānā ekaviṃśānyājyāni triṇavānyukthānyekaviṃśāni pṛṣṭhāni ṣaṭtriṃśāḥ pavamānāstrayastriṃśamabhyāvartamāgniṣṭomasāmādekaviṃśānyukthānyekaviṃśaḥ ṣoḍaśī pañcadaśī rātristrivṛtsandhiḥ -

tadetadgāthayābhigītam śatānīkaḥ samantāsu medhyaṃ sātrājito hayam/ ādatta yajñaṃ kāśīnāṃ bharataḥ satvatāmiveti -

atha dvitīyayā / śvetaṃ samantāsu vaśaṃ carantaṃ śatānīko dhṛtarāṣṭrasya medhyam/ ādāya sahvā daśamāsyamaśvaṃ śatānīko govinatena heja iti -

atha caturthyā / mahadadya bharatānāṃ na pūrve nāpare janāḥ/ divaṃ martyaiva pakṣābhyāṃ nodāpuḥ sapta mānavā iti -

athāto dakṣiṇānām / madhyaṃ prati rāṣṭrasya yadanyadbhūmeśca puruṣebhyaśca brāhmaṇasya ca vittātprācī digghoturdakṣiṇā brahmaṇaḥ pratīcyadhvaryorudīcyudgātustadeva hotṛkā anvābhaktāḥ -

udayanīyāyāṃ saṃsthitāyām ekaviṃśatiṃ vaśā anūbandhyā ālabhate maitrāvaruṇīrvaiśvadevīrbārhaspatyā etāsāṃ devatānāmāptyai tadyadbārhaspatyāntyā bhavanti brahma vai bṛhaspatistadu brahmaṇyevāntataḥ pratitiṣṭhati -

atha yadekaviṃśatirbhavanti ekaviṃśo vā eṣa ya eṣa tapati dvādaśa māsāḥ pañcartavastraya ime lokā asāvāditya ekaviṃśa etāmabhisampadam -

udavasānīyāyāṃ saṃsthitāyām catasraśca jāyāḥ kumārīṃ pañcamīṃ catvāri ca śatānyanucarīṇāṃ yathāsamuditaṃ dakṣiṇāṃ dadāti -

athottaraṃ samvatsaramṛtupaśubhiryajate ṣaḍbhirāgneyairvasante ṣaḍbhiraindrairgrīṣme ṣaḍbhiḥ pārjanyairvā mārutairvā varṣāsu ṣaḍbhirmaitrāvaruṇaiḥ śaradi ṣaḍbhiraindrāvaiṣṇavairhemante ṣaḍbhiraindrābārhaspatyaiḥ śiśire ṣaḍṛtavaḥ samvatsaraḥ ṛtuṣveva samvatsare pratitiṣṭhati ṣaṭtriṃśadete paśavo bhavanti ṣaṭtriṃśadakṣarā bṛhatī bṛhatyāmadhisvargo lokaḥ pratiṣṭhitastadvantato bṛhatyaiva cchandasā svarge loke pratitiṣṭhati -