Scripture Library

Shatapatha Brahmana · Chapter 13.5.2

13.5.2.13.5.2.1

ete'uktvā yadadhrigoḥ pariśiṣṭaṃ bhavati tadāha vāso'dhivāsaṃ hiraṇyamityaśvāyopastṛṇanti tasminnenamadhi sañjñapayanti sañjñapteṣu paśuṣu patnyaḥ pānnejanairudāyanti catasraśca jāyāḥ kumārī pañcamī catvāri ca śatānyanucarīṇām -

13.5.2.13.5.2.2

niṣṭhiteṣu pānnejaneṣu mahiṣīmaśvāyopanipādayantyathaināvadhivāsena samprorṇuvanti svarge loke prorṇuvāthāmityeṣa vai svargo loko yatra paśuṃ sañjñapayanti nirāyatyāśvasya śiśnaṃ mahiṣyupasthe nidhatte vṛṣā vājī retodhā reto dadhātviti mithunasyaiva sarvatvāya -

13.5.2.13.5.2.3

tayoḥ śayānayoḥ aśvaṃ yajamāno'bhimethatyutsakthyā ava gudaṃ dhehīti taṃ na kaścana pratyabhimethati nedyajamānaṃ pratipratiḥ kaścidasaditi -

13.5.2.13.5.2.4

athādhvaryuḥ kumārīmabhimethati kumāri hayehaye kumāri yakāsakau śakuntiketi taṃ kumārī pratyabhimethatyadhvaryo hayehaye'dhvaryo yako'sakau śakuntaka iti -

13.5.2.13.5.2.5

atha brahmā mahiṣīmabhimethati mahiṣi hayehaye mahiṣi mātā ca te pitā ca te'graṃ vṛkṣasya rohata iti tasyai śataṃ rājaputryo'nucaryo bhavanti tā brahmāṇampratyabhimethanti brahmanhayehaye brahmanmātā ca te pitā ca te'gre vṛkṣasya krīḍata iti -

13.5.2.13.5.2.6

athodgātā vāvātāmabhimethati vāvāte hayehaye vāvāta ūrdhvāmenāmucchrāpayeti tasyai śataṃ rājanyā anucaryo bhavanti tā udgātārampratyabhimethantyudgātarhayehaya udgātarūdhvarmenamucchrayatāditi -

13.5.2.13.5.2.7

atha hotā parivṛktāmabhimethati parivṛkte hayehaye parivṛkte yadasyā aṃhubhedyā iti tasyai śataṃ sūtagrāmaṇyāṃ duhitaro'nucaryo bhavanti tā hotārampratyabhimethanti hotarhayehaye hotaryaddevāso lalāmagumiti -

13.5.2.13.5.2.8

atha kṣattā pālāgalīmabhimethati pālāgali hayehaye pālāgali yaddhariṇo yavamatti
na puṣṭaṃ paśu manyata iti tasyai śataṃ kṣātrasaṅgrahītṝṇāṃ duhitaro'nucaryo bhavanti tāḥ kṣattāraṃ pratyabhimethanti kṣattarhayehaye kṣattaryaddhariṇo yavamatti na puṣṭaṃ bahu manyata iti -

13.5.2.13.5.2.9

sarvāptirvā eṣā vācaḥ yadabhimethikāḥ sarve kāmā aśvamedhe sarvayā vācā sarvānkāmānāpnavāmetyutthāpayanti mahiṣīṃ tatastā yathetampratiparāyantyathetare surabhimatīmṛcamantato'nvāhurdadhikrāvṇo akāriṣamiti -

13.5.2.13.5.2.10

apa vā etebhya āyurdevatāḥ krāmanti ye yajñepūtāṃ vācaṃ vadanti vācamevaitatpunate devayajyāyai devatānāmanapakramāya yā ca gomṛge vapā bhavati yā cāje tūpare te aśve pratyavadhāyāharanti nāśvasya vapāstīti vadanto na tathā kuryādaśvasyaiva pratyakṣaṃ meda āharetprajñātā itarāḥ -

13.5.2.13.5.2.11

śṛtāsu vapāsu svāhākṛtibhiścaritvā pratyañcaḥ pratiparetya sadasi brahmodyamvadanti pūrvayā dvārā prapadya yathādhiṣṇyaṃ vyupaviśanti -

13.5.2.13.5.2.12

sa hotādhvaryuṃ pṛcchati kaḥ svidekākī caratīti taṃ pratyāha sūrya ekākī caratīti -

13.5.2.13.5.2.13

athādhvaryurhotāraṃ pṛcchati kiṃ svitsūryasamaṃ jyotiriti taṃ pratyāha brahma sūryasamaṃ jyotiriti -

13.5.2.13.5.2.14

atha brahmodgātāraṃ pṛcchati pṛcchāmi tvā citaye devasakheti taṃ pratyāhāpi teṣu triṣu padeṣvasmīti -

13.5.2.13.5.2.15

athodgātā brahmāṇaṃ pṛcchati keṣvantaḥ puruṣa āviveśeti taṃ pratyāha pañcasvantaḥ puruṣa āviveśeti -

13.5.2.13.5.2.16

etasyāmuktāyāmutthāya sadaso'dhi prāñco yajamānamabhyāyantyagreṇa havirdhāne āsīnametya yathāyatanaṃ paryupaviśanti -

13.5.2.13.5.2.17

sa hotādhvaryuṃ pṛcchati kā svidāsītpūrvacittiriti taṃ pratyāha dyaurāsītpūrvacittiriti -

13.5.2.13.5.2.18

athādhvaryurhotāraṃ pṛcchati ka īmare piśaṅgileti taṃ pratyāhājāre piśañgileti -

13.5.2.13.5.2.19

atha brahmodgātāraṃ pṛcchati katyasya viṣṭhāḥ katyakṣarāṇīti taṃ pratyāha ṣaḍasya viṣṭhāḥ śatamakṣarāṇīti -

13.5.2.13.5.2.20

athodgātā brahmāṇaṃ pṛcchati ko asya veda bhuvanasya nābhimiti taṃ pratyāha vedāhamasya bhuvanasya nābhimiti -

13.5.2.13.5.2.21

athādhvaryuṃ yajamānaḥ pṛcchati pṛcchāmi tvā paramantaṃ pṛthivyā 'iti tampratyāheyaṃ vediḥ paro antaḥ pṛthivyā'iti -

13.5.2.13.5.2.22

sarvāptirvā eṣā vācaḥ yadbrahmodyaṃ sarve kāmā aśvamedhe sarvayā vācā sarvānkāmānāpnavāmeti -

13.5.2.13.5.2.23

udite brahmodye prapadyādhvaryurhiraṇmayena pātreṇa prājāpatyaṃ mahimānaṃ grahaṃ gṛhṇāti tasya purorugghiraṇyagarbhaḥ samavartatāgra ityathāsya puro'nuvākyā subhūḥ svayambhūḥ prathama iti hotā yakṣatprajāpatimiti praiṣaḥ prajāpate na tvadetānyanya iti hotā yajati vaṣaṭkṛte juhoti yaste'hantsamvatsare mahimā sambabhūveti nānuvaṣaṭkaroti sarvahutaṃ hi juhoti/athāto vapānāṃ homaḥ nānaiva careyurā vaiśvadevasya vapāyai vaiśvadevasya vapāyāṃ hutāyāṃ tadanvitarā juhuyuriti ha smāha satyakāmo jābālo viśve vai sarve devāstadenānyathādevataṃ prīṇātīti -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0