Shatapatha Brahmana · Chapter 13.5.1

atha prātargotamasya caturuttara stomo bhavati tasya catasṛṣu bahiṣpavamānamaṣṭāsvaṣṭāsvājyāni dvādaśasu mādhyandinaḥ pavamānaḥ ṣoḍaśasu pṛṣṭhāni viṃśatyāmārbhavaḥ pavamānaścaturviṃśatyāmagniṣṭomasāma -

tasya haike agniṣṭomasāma catuḥsāma kurvanti nāgniṣṭomo nokthya iti vadantastadyadi tathā kuryuḥ sārdhaṃ stotriyaṃ śastvā sārdhamanurūpaṃ śaṃsedrathantaraṃ pṛṣṭhaṃ rāthantaraṃ śastramagniṣṭomo yajñastenemaṃ lokamṛdhnoti -

ekaviṃśatiḥ savanīyāḥ paśavaḥ sarva āgneyāsteṣāṃ samānaṃ karmetyu haika āhurdve tvevaite ekādaśinyāvālabheta ya evaikādaśineṣu kāmastasya kāmasyāptyai -

saṃsthite'gniṣṭome parihṛtāsu vasatīvarīṣvadhvaryurannahomāñjuhoti teṣāmuktaṃ brāhmaṇaṃ prāṇāya svāhāpānāya svāheti dvādaśabhiranuvākairdvādaśamāsāḥ saṃvatsaraḥ sarvaṃ saṃvatsaraḥ sarvamaśvamedhaḥ sarvasyāptyai sarvasyāvaruddhyai -

ekaviṃśaṃ madhyamamaharbhavati asau vā āditya ekaviṃśaḥ so'śvamedhaḥ svenaivainaṃ stomena svāyāṃ devatāyāṃ pratiṣṭhāpayati tasmādekaviṃśam -

yadvevaikaviṃśam ekaviṃśo vai puruṣo daśa hastyā aṅgulayo daśa pādyā ātmaikaviṃśastadanenaikaviṃśenātmanaitasminnekaviṃśe pratiṣṭhāyāṃ pratitiṣṭhati tasmādekaviṃśam -

yadvevaikaviṃśam ekaviṃśo vai stomānāṃ pratiṣṭhā bahu khalu vā etadetasminnahanyuccāvacamiva karma kriyate tadyadetadetasminnahanyuccāvacambahu karma kriyate tadetasminnekaviṃśe pratiṣṭhāyāṃ pratiṣṭhitaṃ kriyātā iti tasmādvevaitadekaviṃśamahaḥ -

tasya prātaḥsavanam agniṃ taṃ manye yo vasuriti hotā pāṅktamājyaṃ śastvaikāhikamupasaṃśaṃsati bārhataṃ ca praugaṃ mādhucchandasaṃ ca tricaśa ubhe saṃśaṃsati yaśca bārhate prauge kāmo ya u ca mādhucchandase tayorubhayoḥ kāmayorāptyai kḷptaṃ prātaḥsavanam
-

athāto mādhyandinaṃ savanaṃ aticchandāḥ pratipanmarutvatīyasya trikadrukeṣu mahiṣo yavāśiramityatiṣṭhā vā eṣā chandasāṃ yadaticchandā atiṣṭhā aśvamedho yajñānāmaśvamedhasyaivāptyai saiṣaiva triḥ śastā tricaḥ sampadyate teno taṃ kāmamāpnoti yastrica idaṃ vaso sutamandha ityanucara eṣa eva nitya ekāhātānaḥ itthā hi soma inmade'vitāsi sunvato vṛktabarhiṣa iti paṅktīśca ṣaṭpadāśca śastvaikāhike nividaṃ dadhātīti marutvatīyam -

athāto niṣkevalyam mahānāmnyaḥ pṛṣṭhaṃ bhavanti sānurūpāḥ sapragāthāḥ śaṃsati sarve vai kāmā mahānāmnīṣu sarve kāmā aśvamedhe sarveṣāṃ kāmānāmāptyā indro madāya vāvṛdhe predaṃ brahma vṛtratūryeṣvāvitheti paṅktīśca ṣaṭpadāśca śastvaikāhike nividaṃ dadhāti kḷptaṃ mādhyandinaṃ savanam -

athātastṛtīyasavanam aticchandā eva pratipadvaiśvadevasyābhityaṃ devaṃ savitāramoṇyoriti tasyā etadeva brāhmaṇaṃ yatpūrvasyā abhi tvā deva savitarityanucaro'bhivānabhibhūtyai rūpamudu ṣya devaḥ savitā damūnā iti sāvitraṃ śastvaikāhike nividaṃ dadhāti mahī dyāvāpṛthivī iha jyeṣṭhe iti caturṛcaṃ dyāvāpṛthivīyaṃ śastvaikāhike nividaṃ dadhātyṛbhurvibhvā vāja indro no acchetyārbhavaṃ śastvaikāhike nividaṃ dadhāti ko nu vāṃ mitrāvaruṇāvṛtāyanniti vaiśvadevaṃ śastvaikāhike nividaṃ dadhātīti vaiśvadevam -

athāta āgnimārutam mūrdhānaṃ divo aratiṃ pṛthivyā iti vaiśvānarīyaṃ śastvaikāhike
nividaṃ dadhātyā rudrāsa indravantaḥ sajoṣasa iti mārutaṃ śastvaikāhike nividaṃ dadhātīmamūṣu vo atithimuṣarbudhamiti navarcaṃ jātavedasīyaṃ śastvaikāhike nividaṃ dadhāti tadyadaikāhikāni nividdhānāni bhavanti pratiṣṭhā vai jyotiṣtomaḥ pratiṣṭhāyā apracyutyai -

tasyaite paśavo bhavanti aśvastūparo gomṛga iti pañcadaśa paryaṅgyāsteṣāmuktambrāhmaṇamathaita āraṇyā vasantāya kapiñjalānālabhate grīṣmāya kalaviṅkānvarṣābhyastittirīniti teṣāmvevoktam -

athaitānekaviṃśataye cāturmāsyadevatābhya ekaviṃśatimekaviṃśatiṃ paśūnālabhata etāvanto vai sarve devā yāvatyaścāturmāsyadevatāḥ sarve kāmā aśvamedhe sarvāndevānprītvā sarvānkāmānāpnavānīti na tathā kuryāt -

saptadaśaiva paśūnmadhyame yūpa ālabhet prajāpatiḥ saptadaśaḥ sarvaṃ saptadaśaḥ sarvamaśvamedhaḥ sarvasyāptai sarvasyāvarudhyai ṣoḍaśa ṣoḍaśetareṣu ṣoḍaśakalaṃ vā idaṃ sarvaṃ sarvamaśvamedhaḥ sarvasyāptai sarvasyāvarudhyai trayodaśa trayodaśāraṇyānākāśeṣvālabhate trayodaśa māsāḥ samvatsaraḥ sarvaṃ samvatsaraḥ sarvamaśvamedhaḥ sarvasyāptai sarvasyāvarudhyai -

atha purā bahiṣpavamānāt aśvaṃ niktvodānayanti tena pāvamānāya sarpanti tasyoktaṃ brāhmaṇaṃ stute bahiṣpavamāne'śvamāstāvamākramayanti sa yadyava vā jighredvi vā vartet samṛddho me yajña iti ha vidyāttamupākṛtyādhvaryurāha hotarabhiṣṭuhīti tamekādaśabhirhotābhiṣṭauti -

yadakrandaḥ prathamaṃ jāyamāna iti triḥ prathamayā triruttamayā tāḥ pañcadaśa sampadyante pañcadaśo vai vajro vīryaṃ vajro vajreṇaivaitadvīryeṇa yajamānaḥ purastātpāpmānamapahate tadvai yajamānāyaiva vajraḥ pradīyate yo'sya stṛtyastaṃ startava upa prāgācchasanamvājyarvopa prāgātparamaṃ yatsadhasthamiti -

ete uddhṛtya mā no mitro varuṇo aryamā''yurityetatsūktamadhrigāvāvapati catustriṃśadvājino devabandhorityu haika etāṃ vaṅkrīṇāṃ purastāddadhati nedanāyatane praṇavaṃ dadhāmetyatho nedekavacanena bahuvacanaṃ vyavāyāmeti na tathā kuryātsārdhameṣa sūktamāvaped upa prāgācchasanaṃ vājyarvopa prāgātparamaṃ yatsadhasthamiti -