Shatapatha Brahmana · Chapter 13.4.2

etasyāṃ tāyamānāyām aśvaṃ niktvodānayanti yasmintsarvāṇi rūpāṇi bhavanti yo vā javasamṛddhaḥ sahasrārhaṃ pūrvyaṃ yo dakṣiṇāyāṃ dhuryapratidhuraḥ -

tadyatsarvarūpo bhavati sarvaṃ vai rūpaṃ sarvamaśvamedhaḥ sarvasyāptyai sarvasyāvaruddhyā atha yajjavasamṛddho vīryaṃ vai javo vīryasyāptyai vīryasyāvaruddhyā atha yatsahasrārhaḥ sarvaṃ vai sahasraṃ sarvamaśvamedhaḥ sarvasyāptyai sarvasyāvaruddhyā atha yatpūrvyaḥ eṣa vā aparimitaṃ vīryamabhivardhate yatpūrvyo'parimitasyaiva vīryasyāvaruddhyā atha yaddakṣiṇāyāṃ dhuryapratidhuraḥ/ eṣa vā eṣa ya eṣa tapati na vā etaṃ kaścana pratipratiretasyaivāvaruddhyai -

tadu hovāca bhāllaveyo dvirūpa evaiṣo'śvaḥ syātkṛṣṇasāraṃgaḥ prajāpatervāeṣo'kṣṇaḥ samabhavaddvirūpaṃ vā idaṃ cakṣuḥ śuklaṃ caiva kṛṣṇaṃ ca tadenaṃ svena rūpeṇa samardhayatīti -

atha hovāca sātyayajñiḥ trirūpa evaiṣo'śvaḥ syāttasya kṛṣṇaḥ pūrvārdhaḥ śuklo'parārdhaḥ kṛttikāñjiḥ purastāttadyatkṛṣṇaḥ pūrvārdho bhavati yadevedaṃ kṛṣṇamakṣṇastadasya tadatha yacchuklo'parārdho yadevedaṃ śuklamakṣṇastadasyatadatha yatkṛttikāñjiḥ purastātsā kanīnakā sa eva rūpasamṛddho'to yatamo'syopakalpeta bahurūpo vā dvirūpo vā trirūpo vā kṛttikāñjistamālabheta javena tveva samṛddhaḥ syāt -

tasyaite purastādrakṣitāra upakḷptā bhavanti rājaputrāḥ kavacinaḥ śataṃ rājanyā niṣaṅgiṇaḥ śataṃ sūtagrāmaṇyāṃ putrā iṣuparṣiṇaḥ śataṃ kṣāttrasaṃgrahītṝṇāmputrā daṇḍinaḥ śatamaśvaśataṃ niraṣṭaṃ niramaṇaṃ yasminnenamapisṛjya rakṣanti -

atha sāvitrīmiṣṭiṃ nirvapati savitre prasavitre dvādaśakapālaṃ puroḍāśaṃ savitā vai prasavitā savitā ma imaṃ yajñaṃ prasuvāditi -

tasyai pañcadaśa sāmidhenyo bhavanti vārtraghnāvājyabhāgau ya imā viśvā jātānyādevo yātu savitā suratna ityupāṃśu haviṣo yājyānuvākye virājau saṃyājye hiraṇyaṃ dakṣiṇā suvarṇaṃ śatamānaṃ tasyoktaṃ brāhmaṇam -

tasyai prayājeṣu tāyamāneṣu brāhmaṇo vīṇāgāthī dakṣiṇata uttaramandrāmudāghnaṃstisraḥ svayaṃsambhṛtā gāthā gāyatītyayajatetyadadāditi tasyoktaṃ brāhmaṇam -

atha dvitīyāṃ nirvapati savitra āsavitre dvādaśakapālaṃ puroḍāśaṃ savitā vā āsavitā savitā ma imaṃ yajñamāsuvāditi -

tasyai saptadaśa sāmidhenyo bhavanti sadvantāvājyabhāgau sadevāvarunddhe viśvāni deva savitaḥ saghā no devaḥ savitā sahāvetyupāṃśu haviṣo yājyānuvākye anuṣṭubhau saṃyājye rajataṃ hiraṇyaṃ dakṣiṇā nānārūpatāyā atho utkramāyānapakramāya śatamānaṃ bhavati śatāyurvai puruṣaḥ śatendriya āyurevendriyaṃ vīryamātmandhatte -

tasyai prayājeṣu tāyamāneṣu brāhmaṇo vīṇāgāthī dakṣiṇata uttaramandrāmudāghnaṃstisraḥ svayaṃsambhṛtā gāthā gāyatītyayajatetyadadāditi tasyoktaṃ brāhmaṇam -

atha tṛtīyāṃ nirvapati savitre satyaprasavāya dvādaśakapālaṃ puroḍāśameṣa ha vai satyaḥ prasavo yaḥ savituḥ satyena me prasavenemaṃ yajñaṃ prasuvāditi -

tasyai saptadaśaiva sāmidhenyo bhavanti rayimantāvājyabhāgau vīryaṃ vai rayirvīryasyāptyai vīryasyāvaruddhyā ā viśvadevaṃ satpatiṃ na pramiye saviturdaivyasya tadityupāṃśu haviṣo yājyānuvākye nitye saṃyājye nedyajñapathādayānīti kḷpta eva yajñe'ntataḥ pratitiṣṭhati triṣṭubhau bhavata indriyaṃ vai vīryaṃ triṣṭubindriyasyaiva vīryasyāvaruddhyai hiraṇyaṃ dakṣiṇā suvarṇaṃ śatamānaṃ tasyoktaṃ brāhmaṇam -

tasyai prayājeṣu tāyamāneṣu brāhmaṇo vīṇāgāthī dakṣiṇata uttaramandrāmudāghnaṃstisraḥ svayaṃsambhṛtā gāthā gāyatītyayajatetyadadāditi tasyoktaṃ brāhmaṇam -

etasyāṃ saṃsthitāyām upotthāyādhvaryuśca yajamānaścāśvasya dakṣiṇe karṇa ājapato
vibhūrmātrā prabhūḥ pitreti tasyoktaṃ brāhmaṇamathainamudañcaṃ prāñcamprasṛjata eṣā hobhayeṣāṃ devamanuṣyāṇāṃ digyadudīcī prācī svāyāmevainaṃ taddiśi dhatto na vai sva āyatane pratiṣṭhito riṣyatyariṣṭyai -

sa āha devā āśāpālāḥ etaṃ devebhyo'śvaṃ medhāya prokṣitaṃ rakṣatetyuktā mānuṣā āśāpālā athaite daivā āpyāḥ sādhyā anvādhyā marutastameta ubhaye devamanuṣyāḥ saṃvidānā apratyāvartayantaḥ saṃvatsaraṃ rakṣanti tadyaṃ na pratyāvartayantyeṣa vā eṣa tapati ka u hyetamarhati pratyāvarttayituṃ yadyenampratyāvartayeyuḥ parāgevedaṃ sarvaṃ syāttasmādapratyāvartayanto rakṣanti -

sa āhāśāpālāḥ ye vā etasyodṛcaṃ gamiṣyanti rāṣṭraṃ te bhaviṣyanti rājāno bhaviṣyantyabhiṣecanīyā atha ya etasyodṛcaṃ na gamiṣyantyarāṣṭraṃ te bhaviṣyantyarājāno bhaviṣyanti rājanyā viśo'nabhiṣecanīyāstasmānmā pramadata snātvāccaivainamudakānnirundhīdhvaṃ vaḍavābhyaśca te yadyadbrāhmaṇajātamupanigaccheta tattatpṛccheta brāhmaṇāḥ kiyadyūyamaśvamedhasya vittheti te ye na vidyurjinīyāta tāntsarvaṃ vā aśvamedhaḥ sarvasyaiṣa na veda yo brāhmaṇaḥ sannaśvamedhasya na veda so'brāhmaṇo jyeya eva sa pānaṃ karavātha khādaṃ nivapāthātha yatkiṃ ca janapade 'kṛtānnaṃ sarvaṃ vastatsutaṃ teṣāṃ rathakārakula eva vo vasatistaddhyaśvasyāyatanamiti -