Shatapatha Brahmana · Chapter 13.2.6

yuñjanti bradhnamaruṣaṃ carantamiti asau vā ādityo bradhno'ruṣo'mumevāsmā ādityaṃ yunakti svargasya lokasya samaṣṭyai -

tadāhuḥ parāṅvā etasmādyajña eti yasya paśurupākṛto'nyatra vederetītyetaṃ stotaranena pathā punaraśvamāvartayāsi na iti vāyurvai stotā tamevāsmā etatparastāddadhāti tathā nātyeti -

apa vā etasmāt teja indriyaṃ paśavaḥ śrīḥ krāmanti yo'śvamedhena yajate -

vasavastvāñjantu gāyatreṇa cchandaseti mahiṣyabhyanakti tejo vā ājyaṃ tejo gāyatrī tejasī evāsmintsamīcī dadhāti -

rudrāstvāñjantu traiṣṭubhena cchandaseti vāvātā tejo vā ājyamindriyaṃ triṣṭuptejaścaivāsminnindriyaṃ ca samīcī dadhāti -

ādityāstvāñjantu jāgatena cchandaseti parivṛktā tejo vā ājyaṃ paśavo jagatī tejaścaivāsminpaśūṃśca samīcī dadhāti -

patnyo'bhyañjanti śriyai vā etadrūpaṃ yatpatnyaḥ śriyamevāsmiṃstaddadhati nāsmātteja indriyaṃ paśavaḥ śrīrapakrāmanti -

yathā vai haviṣo'hutasya skandet evametatpaśo skandati yasya niktasya lomāni śīyante yatkācānāvayanti lomānyevāsya sambharanti hiraṇmayā bhavanti tasyoktaṃ brāhmaṇamekaśatamekaśataṃ kācānāvayanti śatāyurvai puruṣa ātmaikaśata āyuṣyevātmanpratitiṣṭhati bhūrbhuvaḥ svariti prājāpatyābhirāvayanti prājāpatyo'śvaḥ svayaivainaṃ devatayā samardhayanti lājī३ñchācī३ yavye gavya ityatiriktamannamaśvāyopāvaharati prajāmevānnādīṃ kuruta etadannamatta devā etadannamaddhi prajāpata iti prajāmevānnādyena samardhayati -

apa vā etasmāt tejo brahmavarcasaṃ krāmati yo'śvamedhena yajate hotā ca brahmā ca brahmodyaṃ vadata āgneyo vai hotā bārhaspatyo brahmā brahma bṛhaspatistejaścaivāsminbrahmavarcasaṃ ca samīcī dhatto yūpamabhito vadato yajamāno vai yūpo yajamānamevaitattejasā ca brahmavarcasena cobhayataḥ paridhattaḥ -

kaḥ svidekākī caratīti asau vā āditya ekākī caratyeṣa brahmavarcasambrahmavarcasamevāsmiṃstaddhattaḥ -

ka u svijjāyate punariti candramā vai jāyate punarāyurevāsmiṃstaddhattaḥ -

kiṃ sviddhimasya bheṣajamiti agnirvai himasya bheṣajaṃ teja evāsmiṃstaddhattaḥ -

kimvāvapanaṃ mahaditi ayaṃ vai lokaṃ āvapanaṃ mahadasminneva loke pratitiṣṭhati -

kā svidāsītpūrvacittiriti dyaurvai vṛṣṭiḥ pūrvacittirdivameva vṛṣṭimavarunddhe -

kiṃ svidāsīdbṛhadvaya iti aśvo vai bṛhadvaya āyurevāvarunddhe -

kā svidāsītpilippileti śrīrvai pilippilā śriyamevāvarunddhe -

kā svidāsītpiśaṃgileti ahorātre vai piśaṃgile ahorātrayoreva pratitiṣṭhati -