Shatapatha Brahmana · Chapter 13.2.5

prajāpatiraśvamedhamasṛjata so'smātsṛṣṭaḥ parāṅaitsa paṅktirbhūtvā saṃvatsaramprāviśatte'rdhamāsā abhavaṃstaṃ pañcadaśibhiranuprāyuṅkta tamāpnottamāptvā pañcadaśibhiravārunddhārdhamāsānāṃ vā eṣā pratimā yatpañcadaśino yatpañcadaśina ālabhate'rdhamāsāneva tairyajamāno'varunddhe -

tadāhuḥ anavaruddho vā etasya saṃvatsaro bhavati yo'nyatra cāturmāsyebhyaḥsaṃvatsaraṃ tanuta ityeṣa vai sākṣātsaṃvatsaro yaccāturmāsyāni yaccāturmāsyānpaśūnālabhate sākṣādeva tatsaṃvatsaramavarunddhe vi vā eṣa prajayā paśubhirṛdhyate'pa svargaṃ lokaṃ rādhnoti yo'nyatraikādaśinebhyaḥ saṃvatsaraṃ tanuta ityeṣa vai samprati svargo loko yadekādaśinī prajā vai paśava ekādaśinī yadaikādaśinānpaśūnālabhate na svargaṃ lokamaparādhnoti na prajayā paśubhirvyṛdyate -

prajāpatirvirājamasṛjata sāsmātsṛṣṭā parācyetsāśvaṃ medhyaṃ prāviśattāṃ daśibhiranuprāyuṅkta tāmāpnottāmāptvā daśibhiravārunddha yaddaśina ālabhate virājameva tairyajamāno'varunddhe śatamālabhate śatāyurvai puruṣaḥ śatendriya āyurevendriyaṃ vīryamātmandhatte -

ekādaśa daśata ālabhate ekādaśākṣarā vai triṣṭubindriyamu vai vīryaṃ triṣṭubindriyasyaiva vīryasyāvaruddhyā ekādaśa daśata ālabhate daśa vai paśoḥ prāṇā ātmaikādaśaḥ prāṇaireva paśūntsamardhayati vaiśvadevā bhavanti vaiśvadevo vā aśvo'śvasyaiva sarvatvāya bahurūpā bhavanti tasmādbahurūpāḥ paśavo nānārūpā bhavanti tasmānnānārūpāḥ paśavaḥ -