Scripture Library

Shatapatha Brahmana · Chapter 13.2.7

13.2.7.13.2.7.1

niyukteṣu paśuṣu prokṣaṇīradhvaryurādatte'śvaṃ prokṣiṣyannanvārabdhe yajamāna ādhvarikaṃ yajuranudrutyāśvamedhikaṃ yajuḥ pratipadyate -

13.2.7.13.2.7.2

vāyuṣṭvā pacatairavatviti vāyurevainaṃ pacatyasitagrīvaśchāgairityagnirvā asitagrīvo'gnirevainaṃ chāgaiḥ pacati -

13.2.7.13.2.7.3

nyagrodhaścamasairiti yatra vai devā yajñenāyajanta ta etāṃścamasānnyaubjaṃste nyañco nyagrodhā rohanti -

13.2.7.13.2.7.4

śalmalirvṛddhyeti śalmalau vṛddhiṃ dadhāti tasmācchalmalirvanaspatīnāṃ varṣiṣṭhaṃ vardhate -

13.2.7.13.2.7.5

eṣa sya rāthyo vṛṣeti aśvenaiva rathaṃ sampādayati tasmādaśvo nānyadrathādvahati -

13.2.7.13.2.7.6

paḍbhiścaturbhiredaganniti tasmādaśvastribhistiṣṭhaṃstiṣṭhatyatha yuktaḥ sarvaiḥ padbhiḥ samamāyute -

13.2.7.13.2.7.7

brahmā'kṛṣṇaśca no'vatviti candramā vai brahmā'kṛṣṇaścandramasa evainamparidadāti namo'gnaya ityagnaya eva namaskaroti -

13.2.7.13.2.7.8

saṃśito raśminā ratha iti raśminaiva rathaṃ sampādayati tasmādrathaḥ paryuto darśanīyatamo bhavati -

13.2.7.13.2.7.9

saṃśito raśminā haya iti raśminaivāśvaṃ sampādayati tasmādaśvo raśminā pratihṛto
bhūyiṣṭhaṃ rocate -

13.2.7.13.2.7.10

saṃśito apsvapsujā iti apsuyonirvā aśvaḥ svayaivainaṃ yonyā samardhayati brahmā
somapurogava iti somapurogavamevainaṃ svargaṃ lokaṃ gamayati -

13.2.7.13.2.7.11

svayaṃ vājiṃstanvaṃ kalpayasveti svayaṃ rūpaṃ kuruṣva yādṛśamicchasītyevainaṃ tadāha svayaṃ yajasveti svārājyamevāsmindadhāti svayaṃ juṣasveti svayaṃ lokaṃ rocayasva yāvantamicchasītyevainaṃ tadāha mahimā te'nyena na saṃnaśa ityaśvameva mahimnā samardhayati -

13.2.7.13.2.7.12

na vā u etanmriyase na riṣyasīti praśvāsayatyevainaṃ taddevāṃ ideṣi pathibhiḥ sugebhiriti devayānānevainaṃ patho darśayati yatrāsate sukṛto yatra te yayuriti sukṛdbhirevainaṃ salokaṃ karoti tatra tvā devaḥ savitā dadhātviti savitaivainaṃ svarge loke dadhāti prajāpataye tvā juṣṭaṃ prokṣāmītyupāṃśvathopagṛhṇāti -

13.2.7.13.2.7.13

agniḥ paśurāsīt tenāyajanta sa etaṃ lokamajayadyasminnagniḥ sa te loko bhaviṣyati taṃ jeṣyasi pibaitā apa iti yāvānagnervijayo yāvāṃlloko yāvadaiśvaryaṃ tāvāṃste vijayastāvāṃllokastāvadaiśvaryaṃ bhaviṣyatītyevainaṃ tadāha -

13.2.7.13.2.7.14

vāyuḥ paśurāsīt tenāyajanta sa etaṃ lokamajayadyasminvāyuḥ sa te loko bhaviṣyati
taṃ jeṣyasi pibaitā apa iti yāvānvāyorvijayo yāvāṃlloko yāvadaiśvaryaṃ tāvāṃste vijayastāvāṃllokastāvadaiśvaryaṃ bhaviṣyatītyevainaṃ tadāha -

13.2.7.13.2.7.15

sūryaḥ paśurāsīt tenāyajanta sa etaṃ lokamajayadyasmintsūryaḥ sa te loko bhaviṣyati
taṃ jeṣyasi pibaitā apa iti yāvāntsūryasya vijayo yāvāṃlloko yāvadaiśvaryaṃ tāvāṃste
vijayastāvāṃllokastāvadaiśvaryaṃ bhaviṣyatītyevainaṃ tadāha tarpayitvāśvaṃ punaḥ saṃskṛtya prokṣaṇīritarānpaśūnprokṣati tasyātaḥ -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0