Scripture Library

Shatapatha Brahmana · Chapter 13.1.1

13.1.1.13.1.1.1

brahmaudanaṃ pacati reta eva taddhatte yadājyamucchiṣyate tena raśanāmabhyajyādatte tejo vā ājyaṃ prājāpatyo'śvaḥ prajāpatimeva tejasā samardhayatyapūto vā eṣo'medhyo yadaśvaḥ -

13.1.1.13.1.1.2

darbhamayī raśanā bhavati pavitraṃ vai darbhāḥ punātyevainaṃ pūtamevainammedhyamālabhate -

13.1.1.13.1.1.3

aśvasya vā ālabdhasya reta udakrāmattatsuvarṇaṃ hiraṇyamabhavadyatsuvarṇaṃ hiraṇyaṃ dadātyaśvameva retasā samardhayati -

13.1.1.13.1.1.4

prajāpatiryajñamasṛjata tasya mahimāpākrāmatsa mahartvijaḥ prāviśattammahartvigbhiranvaicchattaṃ mahartvigbhiranvavindadyanmahartvijo brahmaudanamprāśnanti mahimānameva tadyajñasya yajamāno'varunddhe brahmaudane suvarṇaṃ hiraṇyaṃ dadāti reto vā odano reto hiraṇyaṃ retasaivāsmiṃstadreto dadhāti śatamānambhavati śatāyurvai puruṣaḥ śatendriya āyurevendriyaṃ vīryamātmandhatte catuṣṭayīrapo vasatīvarīrmadhyamāyāhne gṛhṇāti tā digbhyaḥ samāhṛtā bhavanti dikṣu vā annamannamāpo'nnenaivāsmā annamavarunddhe -

Original text: śatapathabrāhmaṇam · Sanskrit Wikisource contributors · Sanskrit Wikisource · CC BY-SA 4.0